Македонија
Петровска не гледа задна намера во ставањето на Анѓушев на црната листа, тоа е порака институциите да направат дополнителни проверки

Објавувањето имиња на црната листа на САД значи дека треба домашните институции да направат дополнителни проверки, вели министерката за одбрана, Славјанска Петровска. Иако не се гледа себеси како прва повикана да зборува за справување со корупцијата, за Петровска – корупцијата е безбедносно прашање и токму поради тоа очекува поголема агилност од институциите по ставањето на поранешниот вицепремиер за економски прашања, Кочо Анѓушев, на листата и најавата од амбасадорката Анџела Агелер дека црната листа ќе се проширува.
„Во сите оние пораки што ги слушавме и вчера, меѓутоа и изминативе денови, и од амбасадорката и од претставниците на САД, јас не гледам задна намера. Напротив, сметам дека тие само одат во поддршка на сето она што ние како држава и како општество се обидуваме да го направиме. Иако можеби не сум прва повикана да зборувам за корупцијата, како министерка за одбрана и, пред сè, како граѓанин на оваа држава, ќе кажам дека за мене корупцијата претставува безбедносно прашање. Ако немате контрола на тој сегмент од општеството, не можете никогаш да бидете сигурни каде тие пари ќе завршат, кого сè ќе финансираат, и сега не зборувам за големи дестабилизации, меѓутоа во даден момент може да ја дестабилизираат државата на каков било начин. Јас очекувам и сега, но и во иднина, институциите во нашата држава, кои се задолжени за борба против корупцијата или кои се задолжени за спроведување на законот во тој дел, во иднина поагилно да реагираат затоа што секогаш кога ги добиваме ваквите изјави, дури и објавувањето имиња на црната листа на САД, значи дека треба да направиме дополнителни проверки од страна на институциите за тоа како тие луѓе се нашле на тие листи“, рече министерката за одбрана пред почетокот на денешната конференција „Мир и просперитет на Западен Балкан“.
Дополнителните проверки дома на лица што станство на кој било начин ќе бидат поврзани со корупција, ќе биде дел и од нашите закони.
„Се работи и на измена на законодавството со кое во иднина ќе можеме лицата што ќе се најдат на црните листи или на каков бил друг начин ќе претрпат санкции, дали од ЕУ или од напите стратешки партнери, ќе може веднаш, без одлагање, да бидат преземени мерки и во РСМ“, рече министерката Петровска.
Според неа, клучен фактор за решавање и на корупцијата во земјата е да ја преминеме точката во која сега стоиме како држава со неизгласаните уставни измени.
Амбасадорката Агелер вчера на брифинг со неколкумина новинари рече дека за Кочо Анѓушев има многу докази во голем број случаи, кои упатуваат на корупција, но не ѝ дозволено да зборува за детали. Уверува дека не е лична работа и дека не е закана, туку се работи, едноставно, за постапување по американското законодавство.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Ние сме единствената партија во која што членството бира претседател на директни внатрепартиски избори што говори за демократскиот капацитет

Попладнево се одржа седница на Централниот одбор на СДСМ.
На седницата, Централниот одбор оцени дека со погрешните политики на актуелната власт на ВМРО-ДПМНЕ животниот стандард на граѓаните со месеци се влошува, граѓаните имаат се помалку пари додека платите стагнираат.
„Власта покажува голема неспособност, нема одговор за покачувањето на цените, за осум месеци не понуди ниту една успешна економска мерка додека во здравството се случува хаос и недостаток на лекови, образованието уназадува и генерално земјата се движи во погрешна насока. СДСМ останува посветена на борбата за подобар животен стандард. Како одговорна партија СДСМ ќе понуди пакет на законски решенија за заштита и подобрување на животниот стандард на граѓаните. Согласно Статутарните одредби, Централниот одбор донесе Одлука за распишување на директни внатрепартиски избори за избор на Претседател на СДСМ кои ќе се одржат на 16 март 2025 година“, велат од Централниот одбор на СДСМ.
Воедно Централниот одбор избра нов состав на Централна изборна комисија на СДСМ и го усвои Правилникот за критериумите, начинот и постапката за кандидирање и избор на Претседател на партијата.
„СДСМ е единствената партија во земјата во која што членството бира претседател на директни внатрепартиски избори што говори за демократскиот капацитет и на партијата и на членовите. На оваа седница Централниот одбор го одобри и планот за интензивни теренски активности кои ќе започнат овој месец, на средби со членовите и граѓаните ширум земјата. Паралелно ќе течат и подготовките за локалните избори оваа година“, рекоа оттаму.
Македонија
МНР на Бугарија со длабоко разочарување: Изјавите на Мицкоски ги поткопуваат напорите за градење добрососедски односи и европска интеграција

Министерството за надворешни работи на Бугарија, се огласи по повод изјавите на премиерот Христијан Мицкоски. Тој рече дека „нема потреба да се внесуваат Бугарите во Уставот“.
„Министерството за надворешни работи на Република Бугарија го изразува своето длабоко разочарување и категорично ги осудува неодамнешните изјави на претседателот на Владата на Република Северна Македонија, г-дин Христијан Мицкоски. Овие изјави не само што ја искривуваат реалноста, туку и ги поткопуваат напорите за градење добрососедски односи и европска интеграција.
Сакаме да нагласиме дека прашањето за правата на Бугарите во Република Северна Македонија не е билатерален спор меѓу нашите две земји, туку е прашање кое влијае на темелните европски вредности и стандарди. Напредокот во процесот на европска интеграција на РСМ е можен само преку целосна и сеопфатна имплементација на Европскиот консензус, договорен и усвоен од Советот на ЕУ во 2022 година, чиј важен дел се измените на Уставот на РСМ. Почитувањето на правата на малцинствата и обезбедувањето на нивната еднаквост се основни принципи на Европската Унија. Во овој контекст, Република Северна Македонија, како земја кандидат за членство во ЕУ, има одговорност да го усогласи своето законодавство и практика со овие принципи“, велат оттаму и додаваат:
„Исто така, сакаме да го посочиме фактот дека огромен број граѓани на Република Северна Македонија се стекнале со бугарско државјанство, признавајќи го своето бугарско потекло и идентитет. Ги повикуваме властите во Република Северна Македонија да се воздржат од реторика која поттикнува поделби и омраза и наместо тоа да се фокусираат на исполнување на критериумите за членство во Европската унија, вклучително и заштита на правата на сите етнички заедници во земјата. Само преку искрен дијалог и меѓусебно почитување можеме да постигнеме одржлив развој и просперитет за нашите народи во обединета Европа“, соопштија од бугарското МНР.
Македонија
Мисајловски на состанокот на контакт групата за Украина, за првпат реализирана под водство на Обединетото Кралство

Министерот за одбрана Владо Мисајловски денеска во Брисел во рамки на предвидените состаноци на министри за одбрана на Северноатлантскиот совет на НАТО, учествуваше на состанокот на Контакт групата за Украина, кој за првпат се реализира под водство на Обединетото Кралство.
На состанокот предводен од секретарот за одбрана на Обединетото Кралство, Џон Хили, на кој учествуваа министри и високи претставници на 50-тина земји, генералниот секретар на НАТО Марк Руте како и високиот претставник за надворешна и безбедносна политика на ЕУ, Каја Калас, фокус беше поддршката на Украина.
Од започнувањето на агресијата врз Украина, македонската Влада досега има донесено 15 (петнаесет) одлуки за хуманитарна и воено-техничка помош и поддршка на Украина и украинскиот народ како земја која ја брани својата независност и територијален суверенитет и во континуитет се залага за почитување на меѓународното право и правен поредок.
Престојот во Брисел продолжува и утре со состанокот на Северноатлантскиот совет на НАТО на ниво министри за одбрана и состанокот на Советот НАТО- Украина.