Пештанци в недела повторно ќе протестираат и ќе го блокираат влезот на автокампот „Градиште“, со барање за враќање на имотите кои им се одземени, преку процесот за денационализација. Тие повеќе часа, почнувајќи од рано изутрина па до пладне, ќе бидат пред кампот. Во овој период, за време на викенд, „Градиште“ е преполно со туристи, а и лица кои имаат кампови доаѓаат на одмор. Жителите на Пештани кои ќе протестираат побарале и припадници на МВР да го обезбедуваат протестот, за да не дојде до нарушување на јавниот ред и мир.

„ Протестот ќе се одржи на ден 11.7.2021 (недела) од 9:30 часот до 14 часот на влезот од таканаречениот ‘автокамп’ Градиште. Со овој мирен протест се бара да се вратат имотите на барателите кои имаат неколку пресуди во нивна корист. Пресудите на Управен суд мора да се спроведат бидејќи се задолжителни и извршни! Да не дојде до нарушување на јавниот ред и мир побарано е присуство на припадници на МВР“, информираа од Здружението на граѓани на одземени имоти во процес на денационализација „Оревче” – Пештани.

Претходно, Здружението одржа два протеста во изминатиот месец. На влезот од Пештани е поставен и плакат на кој пишува „Правда за Градиште”. Изминатите години жителите протестираа и со глад. Тие сметаат дека законите се на нивна страна, но не и правдата. Станува збор за 100 наследници од 35 семејства кои во Градиште имаат земјиште во вредност од 30 милиони евра.

Процесот на денационализација трае со години. Земјиштето се наоѓа на атрактивна локација. Жителите тврдеа дека државата им нудела од 240 до 270 денари за метар квадратен. Затоа бараат реална оштета или враќање на имотите.