Македонија
Русковска најави борба по предлогот за да ја разрешат: Не сум поразена, не се каам
Вилма Русковска смета дека не е поразена со одлуката на дисциплинската комисија со која се бара нејзино разрешување од обвинителската функција. Веќе најави: „Ќе се борам до крај со сите средства“. Русковска за „Макфакс“ посочи дека одлуката била донесена уште кога била на сослушување во Обвинителство, што го искоментира: „Со самото неприфаќање на мои сведоци и докази, знаев која е одлуката. Знаев дека е донесена одлуката“.
„Јас ја немам добиено одлуката, ова го знам од тоа што е објавено на ЈОРМ. Образложението го немам прочитано и не можам да коментирам ништо“, рече Русковска, а на потпрашање што ќе прави ако ѝ ја одбијат и жалбата, посочува: „Отом потом“.
Русковска, прашана дали се покаја што не отиде во пензија, со што ќе немаше простор за утврдување на дисциплинска одговорност, за „Макфакс“ вели: „Не, не, апсолутно не сум се покајала. Апсолутно не“.
Прашана дали овој предлог за разрешување го смета за порака до неа, посочи: „Не знам тоа. Не знам, не сакам утре да се најдам по судови“, а на потпрашање дали се плаши од тужби за клевети, додава: „Не се плашам. Секое судење чини многу. Не сум во ситуација за судење да давам пари. Ги немам тие пари, како што рече Боки 13 дека сум имала 4 милиони (алудирајќи на рочиштето каде Боки 13 ја обвини за корупција од 4 милиони). Морам да си водам сметка за секој денар. Не би сакала да се најдам по судови“. Русковска одговарајќи дали ќе се најде пред судови ако спомене било чие име, рече: „Да, да“.
На прашањето дали смета дека оваа одлука е политичка нарачка за неа, таа вели: „Не, јас не сум политичар и не сметам дека е политичка нарачка. Ова е борба помеѓу правото, правдата и неправдата. Во Македонија не постои политички прогон и позади тоа цврсто стојам. Политички прогон било ’48 за време на Информбиро (*тоа била организација доминирана од СССР со цел да се обединат идеолошките и политичките ставови на комунистичките партии во Европа), политичко прогон било во Шпанија за време на Франко (лидер на Шпанија за време на граѓанската војна), политички прогон било за време на Пиноче (диктатор) во Чиле. Кај нас не постои политички прогон“.
„Макфакс“ праша и кој ја претставува неправдата, ако правдата е Русковска, на што обвинителката одговори: „Не знам кој ја претставува. Вие како новинари треба да истражите“.
Претходно, Комисијата за дисциплинска одговорност донесе одлука да предложи разрешување на Русковска до Советот на јавни обвинители. Тие сметаат дека сторила тешка дисциплинска повреда со претресот во Финансиската полиција кај ексдиректорот Арафат Муареми.
Став за „Макфакс“ даде и обвинителката Ивана Трајчева.
Судирот меѓу Вилма Русковска и ексдиректорот на Финансиската полиција, Арафат Муамери, резултира со дисциплинска постапка за обвинителките. Тој обвинуваше дека претресот во неговите канцеларии не бил во согласност со законот. Дисциплинска беше отворена по предлог на републичкиот јавен обвинител Љубомир Јовески, кој сметаше дека има низа пропусти во случајот, откако Муареми испрати претставка за претресите во Управата и обвини дека е нарушен и неговиот углед и на институцијата со која раководи. Русковска беше и суспендирана од работа, а за тоа рече дека оваа атака ја доживува како удар и врз правото и правдата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски на средба со коалицијата: доби поддршка за отпочнување на преговори за состав на идната влада
Претседателот на ВМРО-ДПМНЕ, Христијан Мицкоски денеска оствари средба со претседателите на партиите во состав на Коалицијата „Твоја Македонија“.
Беше констатирано дека Коалицијата оствари успешен и историски резултат кој создава и одговорност за реализирање на очекувањата.
Мицкоски доби поддршка од претседателите на коалициските партии за отпочнување на преговори за состав на идната влада.
Според заклучокот на состанокот разговорите треба да се водат на основа на постулати за забрзан економски развој на Македонија, силна борба против криминалот и корупцијата и европските интеграции врз база на принципи и вредности, соопштија од партијата.
Македонија
Лукаревска: СДСМ секогаш бил достоинствен заради зрелоста на неговите раководства да се соочат со поразот и одговорноста, јас не сакам да бидам исклучок
Изборните резултати ја искушуваат нашата искреност како политичари и искреноста на нашите зборови дека сме ја разбрале вашата порака, напиша на социјалните мрежи, потпретседателката на СДСМ, Сања Лукаревска, откако неколку членови и партиски функционери во СДСМ претходно си поднесоа оставки.
СДСМ, додава таа, секогаш бил достоинствен и заради зрелоста на неговите раководства да се соочат со поразот и со одговорноста.
„Јас не сакам да бидам исклучок. Благодарам за укажаната доверба да бидам заменик претседател на СДСМ. И таа должност ја извршував со почит, совесно, одговорно и чесно. Секако, со поддршка од сопартијците и незаменливата потпора од моите родители. Благодарам е најмалку што можам да им речам.
Горда сум што 8 мај беше празничен ден за демократијата. Тоа беше и суштината на борбата на СДСМ за ослободување од „заробената“ држава. Воедно, им благодарам на сите граѓани за секој глас за СДСМ, особено во третата изборна единица. Вредна за внимание е и пораката од оние кои не излегоа на гласање, како и на оние кои гласаа против.
На ред е нашата внатрепартиска средба со вистината. На отчетниот Конгрес на СДСМ неминовна e отворена, искрена и самокритична анализа на нашите погрешни чекори, на лошите кадровски решенија како и за нашата немост за успешните политики кои ги спроведовме во исклучително тешки услови предизвикани од светските кризи.
Го презедовме товарот и на тешките политички одлуки. Но, тоа е СДСМ на кого државата, нејзината стабилност и иднина секогаш му биле пред сė и над сė. Така било. Така мора и да остане“, порача во напишаното Лукаревска.
Оценува дека на Македонија и е потребен СДСМ.
„Што побргу заедно ја консолидираме партијата толку побргу ќе можеме да кажеме – тука сме. Јас верувам во СДСМ, а уште повеќе во неговата сила да се реформира, да се обедини и да се подготви.
Честитки на победникот и на сите 120 пратеници.
Во искреното соочување со причините за изборниот пораз е нашата прва победа. Тоа е најмалку што им го должиме на сопартијците, на симпатизерите и поддржувачите на СДСМ, но и на демократска Македонија“, додава Лукаревска.
Македонија
Трет состанок на политички директори во рамките на претседавањето со ПСЈИЕ
Денеска, во Министерството за надворешни работи на Република Северна Македонија се одржа третиот состанок на политички директори на учесниците на Процесот за соработка на Југоисточна Европа (ПСЈИЕ), на кој присуствуваа и претставници на Советот за регионална соработка (СРС) и на Европската Унија.
На состанокот беа разгледани кандидатурите за избор на генерален секретар на Регионалниот совет за соработка (РСС) и предлог-текстот на Заедничката декларација во пресрет на министерскиот состанок, што ќе се одржи во рамките на нашето претседавање со ПСЈИЕ.
Северна Македонија со ПСЈИЕ претседава во периодот јули 2023 – јуни 2024 година со мотото „Премостување поделби, градење доверба“.