Македонија
(Видео) Силјановска: Ако ме изберат ќе ги укинам претседателските привилегии

Професорката на Правниот факултет во Скопје, Гордана Силјановска – Давкова на денешната презентација на кандидатурата пред делегатите на ВМРО-ДПМНЕ на конвенцијата во Струга, рече дека со партијата во неколку наврати им се споиле мислењата и патиштата – на пример за Законот за јазици, Договорот од Преспа и слично, поради што одлучила како независен кандидат да бара поддршка од партијата.
,,За мене доказ за реформски и демократски капацитет на една партија е што ја отвори портата за независен кандидат. А не како Заев што зборува за некакви наводни реформи”, рече таа.
Таа рече дека татко и бил партизан, го поминал Февруарскиот поход, делегат во Егејска Македонија и се борел за Македонија – а не за Северна Македонија. Таа се повика на писмото кое што по распаѓањето на Отоманската империја го испратил британски политичар и државен деец Вилијам Гледстон до нашите соседи во кое кажал дека ,,Македонија е на Македонците”.
,Ако тој го направил тоа уште тогаш, која е логиката ние сега да го немаме правото на самоопределување”, запраша Силјановска. ,,Сите нации настанале во 19 век, а нашата судбина била постојано да се бориме за самопределување, и конечно во 1945 година со АСНОМ стануваме држава. И тоа не е млада држава, туку има веќе 74 години”, рече Силјановска.
Таа се осврна и на прашањето околу можниот бојкот на изборите и повика сите да излезат на избори. ,,Мислам дека мојот глас ќе допре до секој, вистинско време е за избори. Има нешто посилно од партијата и привилегиите – тоа е Македонија, затоа да излеземе на избори. Затоа што СДСМ создаде хибриден режим, Македонија стана скандалозна држава. Тргна по патот на Макијавелизмот и Чезаре Борџија. Но, јас верувам во максимата на Кант дека можеме да се избориме за највисоката цел. Ако ги бојкотираме изборите, сегашниот претседател на Собрание ќе ја преземе функцијата на прв човек на државата, а во меѓувреме можат да донесат и закон со кој ќе се избере претседател во Собрание. Погубно ќе биде за една држава, една власт се да има во рацете”, рече Силјановска.
Таа рече дека кога ќе ја изберат за претседател, преку пратеници на ВМРО-ДПМНЕ ќе иницира закон за укинување на претседателските привилегии. Исто така ќе бара да се намали бројот на министерствата.
,,Не може една сиромашна држава да има 28 министерства, а Швајцарија да има само седум”, рече таа и додаде : ,,Ќе се заложам политичарите да го живеат животот на граѓаните”.
Силјановска најави дека доколку биде избрана, ќе формира експертски тим по меѓународно-јавно право, за да се отвори повторно прашањето за името, кое што според неа, се уште не е затворено.
,,Чуму ни се меѓународното право и институциите како судот во Хаг, Судот за човекови права во Стразбур и слично, ако не побараме да се испочитува нашето право. Ние не го одбравме името, името не одбра нас. И не можеме да се држиме до заевизмот којшто стана ментална матрица – ,,кажувам, заборавам, негирам” – рече Силјановска.
Таа рече дека нема да го користи селективно правото на вето, ќе работи согласно Уставот и дека за сите работи што ќе ги прави, ќе ги образложува пред пратениците и пред граѓаните.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Муцунски-Спајиќ: во фокусот посветеноста на европската интеграција на Западен Балкан

Во пресрет на утрешниот Самит ЕУ – Западен Балкан, денеска министерот за надворешни работи и надворешна трговија, Тимчо Муцунски, оствари средба со премиерот на Црна Гора, Милојко Спајиќ.
Двајцата се дел од овогодинешната група добитници на признанието „Млад глобален лидер“ (YGL) на Светскиот економски форум – мрежа која веќе две децении обединува исклучителни личности под 40 години кои предводат позитивни промени ширум светот.
Програмата за млади глобални лидери е симбол на колективна акција и визија, поттикнувајќи нови форми на лидерство во ера на глобални трансформации. Тоа што двајца политичари од Западен Балкан се дел од оваа заедница е потврда за промените што оваа генерација ги носи во регионот, информираат од МНР.
На средбата се разговараше за зајакнување на билатералната и регионалната соработка, како и за потврдување на заедничката посветеност на европската интеграција на Западен Балкан – како дел од визијата за обединета, просперитетна и силна Европа.
Македонија
МВР: Од 1 јули летен режим на сообраќај за тешки товарни возила

Од 1 јули до 31 август на државните патишта во Македонија се воведува летен времен режим на сообраќај со кој се забранува движење на тешки товарни возила со вкупна маса над 15 тони, за време на деновите од викендот и за денови при екстремно високи температури, соопшти МВР.
Забраната се однесува за следните термини:
петок од 17:00 – 22:00 часот
сабота од 09:00 до 19:00 часот
недела од 09:00 до 22:00 часот
Во деновите со екстремно високи температури, определени од Министерство зa здравство, забраната ќе важи и од понеделник до четврток во период од 11:00 до 17:00 часот.
Специјален сообраќаен летен режим за тешки товарни возила се воведува и на патниот правец А2 Скопје – Охрид – Скопје во периодот од 01.07.2025 до 01.09.2025, и тоа:
Од понеделник до четврток од 11:00 до 17:00 часот, само во денови со екстремно високи температури определени од Министерството за здравство:
петок од 17:00 – 22:00 часот
сабота од 07:00 до 12:00 часот и од 18:00 часот до 24:00 часот и
недела од 07:00 до 22:00 часот
– Ограничувањето не се однесува на возила кои превезуваат животни, цвеќе, хуманитарна помош, жито и житни култури и леснорасиплива стока, нафта и нафтени деривати, превоз на опасни материјали и возила кои вршат превоз за компании кои имаат склучено договори за изведување на проекти на државните патишта со ЈП за Државни патишта.
Македонија
Пренасочување на возилата поради сообраќајка на патот Демир Хисар – Кичево

Од 19:10 часoт има пренасочување на сообраќајот на патниот правец Р1305 Демир Хисар – Кичево поради случена сообраќајна незгода, возилата ќе бидат пренасочени преку с.Единаковци, соопшти АМСМ.
Сообраќајот на државните патишта се одвива непречено, по суви коловози.
Според последното известување од АМСМ, интензитетот на сообраќај на патните правци надвор од градските средини е зголемен.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.