Македонија
Синот на Мијалков куртули од обвинение за крвавиот четврток
Со обвинението за настаните од крвавиот четврток не е опфатен синот на ексдиректорот на УБК, Сашо Мијалков, Јордан Мијалков, кој беше фотографиран критичната вечер на 27 април во Собранието, дознава „Макфакс“. Според прес-конференцијата на Дамјан Манчевски од СДСМ, на која во април 2017 година беа споделени и фотографии од лицата кои влегоа во Собранието, Јордан Мијалков бил еден од првите кои се нашле во собраниската зграда. Тој во октомври 2017 година беше на распит во полициската станица во Кисела Вода да даде исказ за настаните од 27 април на барање на Обвинителството за организиран криминал и корупција, кое го води предметот. Кривично за крвавите настани од 27 април нема да одговара ниту синот на Амди Бајрам, Аднан Мемед, кој беше фотографиран како стои пред полицајците.
Дамјан Манчевски на прес-конференцијата рече: „Овој насилник лево на оваа фотографија е Аднан Мемед, шеф на кабинетот на Елвис Бајрам, градоначалникот на Шуто Оризари и син на Амди Бајрам. Го има по балови со Сашо Мијалков“. За фотографијата која беше споделена на прес-конференцијата, Аднан Мемед изјави дека во Собранието влегол на повик на пратеникот Амди Бајрам, кој наводно побарал помош бидејќи имал здравствени проблеми и му била неопходна придружба. „Во моментите кога се случија немилите настани, јас и мојата придружба не знаевме каде се наоѓа пратеникот, односно во која просторија. До моментот додека го лоциравме, бидејќи распоредот на просториите во Собранието не ми е познат, очигледно сум фотографиран. Но, видно од фотографите јас немам активно учество во настаните, но само како се движам по скалите“, изјави тогаш Мемед. Oд обвинение за 27 април куртулија и Предраг Петрушевски-Бинго, Митко Михајловски- Џачката, Андреј Илиев, кои исто така беа фотографирани во Собранието.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Пронајдено лице што вчера се изгубило на Водно
Регионалниот Центар за управување со кризи – Скопје информира дека на бројот 112, вчера во 15:23 часот била добиена пријава за изгубено лице во Парк – шумата Водно.
Веднаш биле известени надлежните за нивна понатамошна постапка, по што лицето било пронајдено за околу еден час.
– Од полициската станица – Карпош во 16:34 часот во ЦУК, добиена е информација дека лице од Водно е на пат за градот, пишува во денешното соопштение на Центарот за управување со кризи.
Македонија
Почина таткото на Тоше Проески
Почина Никола Проески – татко на музичарот Тоше.
Веста за неговата смрт на социјалните мрежи ја објави Дора, неговата ќерка.
„Светол патот, татко мој“, напиша таа.
Музичарот Тоше Проески загина пред 16 години во сообраќајна несреќа во Хрватска. Неговите родители, по смртта на синот, не се појавуваа во јавноста.
Македонија
ВМРО-ДПМНЕ ветува изградба на магистрален гасовод од Свети Николе до Велес
За Свети Николе предвидуваме изградба на магистрален гасовод до Велес, реконструкција и проширување на патот до Пробиштип, реконструкција и проширување на градинката „Рахилка Гонева“ и нови 8 милиони евра за општината Свети Николе, изјави Драган Ковачки, носител на третата изборна единица од ВМРО-ДПМНЕ.
„Почитувани граѓани, за земјоделците од овој крај, вклучително и за сите земјоделци, предвидуваме 800 милиони евра коишто ќе бидат директна поддршка за земјоделците, за навремени субвенции, за чистење на водоснабдителните системи. Нашите земјоделци заслужуваат подобар живот. Нашите граѓани заслужуваат подобар живот“, рече Ковачки.
Повика на излезност на изборите на 8 мај.