Македонија
(Видео) Случајот „Еразмус“ се враќа на почеток, поротник оди на работа во Германија

Промена на судечкиот совет, односно заминување на поротник на работа во Германија го врати случајот „Еразмус“ на почеток. Заминувањето на поротникот ќе влијае врз процесот, посочи судијата Владимир Туфегџиќ и побара согласност од обвинетите на следното рочиште да бидат исчитани сите докази, а да не се изведуваат. „Еразмус“ требаше да има пресуда на почетокот од февруари, а сега на тој датум ќе почне од почеток.
„Еден од членовите на судиите поротници го извеси претседателот дека најдоцна за седум дена нема да биде во Македонија до јули 2020 година бидејќи има работна виза за Германија, каде што треба да почне да работи. Ваквата состојба советот смета дека влијае врз постапката од процесен карактер. Од тие причини советот ќе се обрати до претседателот на Кривичниот суд за определување нов судија поротник за да продолжи постапката бидејќи советот цени оти во рок од 7 дена, за кои е најавено заменувањето, нема услови за давање завршни зборови, а потоа на судечкиот совет му е потребно и доволно време за анализа на доказите. Рокот од 7 дена е прекраток за постапување имајќи го предвид предметот“, посочи судијата Владимир Туфегџиќ.
Тој побара од странките по скратена постапка да се исчитаат сите докази предложени од Обвинителството и обвинетите за да не се одолжува процесот.
„Поради овие причини, бараме странките и бранителите да кажат дали со промената на судечкиот совет постои согласност со читање да се изведат сите докази и во таа смисла тие треба да кажат одделно, посочи судијата Туфегџиќ.
Адвокатите на обвинетите се согласија со судијата Туфегџиќ на следното рочиште да се исчитаат сите докази за потоа веднаш да се дадат завршни зборови. Во меѓувреме, претседателот на Кривичниот суд, Иван Џолев ќе назначи нов поротник, кој ќе биде запознаен со предметот и доказите.
Обвинителството за организиран криминал за предметот „Еразмус“ гони петмина осомничени, меѓу кои поранешниот декан и професор на менаџмент, Бобек Шуклев. Предметот е отворен во јуни 2016 година. Професорите се сомничат дека барале и примале поткуп од 500 до 1.000 евра за да им пишат преодна оценка за положен испит на студенти без знаење, а имало случаи кога студенти добиле шестка иако немале право да го полагаат испитот или не им бил пријавен во таа испитна сесија. Обвинети се професорите Бобек Шуклев, Славе Ристески, Драган Јанев и Стојан Дебарлиев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Вреди“: Поранешниот државен секретар за култура Азири го продаде албанскиот идентитет за работно место

Валмир Азири, поранешниот државен секретар за култура, направи срамен и неприфатлив чин, кој не само што го посрамува лично, туку и секој Албанец. На конкурсот во 2021 и почетокот на 2022 година, тој без двоумење го промени својот идентитет од Албанец во Македонец, само за да си овозможи лична корист и да обезбеди работно место кое беше наменето за македонската заедница, реагираат од коалицијата „Вреди“.
Ова, според нив, е чин на незамисливо предавство кон Албанците и сериозно кршење на вредностите кои нè дефинираат како нација.
„Демократската унија за интеграција, која постојано зборува за заштита на интересите на Албанците, не се двоумеше да ја продаде секоја вредност и идентитет на Албанците кога станува збор за лични интереси. Овој скандал е јасен одраз на хипокризијата и неспособноста на оваа политичка партија, која продолжува да профитира од позициите и да манипулира на грбот на Албанците. Се поставуваат важни прашања по овој скандал: Која е договорената шема што го натера Валмир Азири да направи ваков чекор? Дали неговото молчење додека беше државен секретар беше дел од агенда за деградирање и маргинализирање на Албанците во културата? Дали може поинаку да се нарече индивидуа која е подготвена да го продаде својот идентитет за лични интереси?“.
Ова, како што оценуваат во „Вреди“ е чин кој не смее да остане без последици.
Коалицијата, нагласуваат од таму, е решена да се бори против секој обид за манипулација и газење на албанскиот идентитет за тесни и лични интереси.
Бараат итна одговорност за овој, како што велат, тежок скандал и се обврзуваат да обезбедат дека лица како Валмир Азири нема да имаат место во институциите што треба да ги штитат интересите и вредностите на Албанците.
Ова, нагласуваат од коалицијата, е јасна порака за сите оние кои мислат дека можат да ја предадат албанската култура и идентитет за лична корист.
„Коалицијата „Вреди“ нема да запре и ќе продолжи да ги брани интересите на Албанците и нашиот национален интегритет“.
Македонија
(Видео) Митева за разрешувањето на Коцевски: Јавниот обвинител покрај правна, подлежи и на општествена одговорност

На денешната седница беше разгледано мислењето од Министерство за правда по кое владата отвори сериозна дискусија, информира на прес-конференција Марија Митева, портпаролка во Владата.
„Постапувајќи по заклучокот кој беше донесен на претходната владина седница со која го задолживме Министерството за правда да преземе активностите во однос на поведување на постапка за разрешување на Јавниот обвинител, Министерство за правда го достави мислењето во кое се нотирани следниве состојби: Како прво: нарушениот углед на институцијата со која раководи јавниот обвинител, затоа што чувањето на угледот на институцијата е должност која потекнува од Законот за јавно обвинителство, конкретно член 4 став 1“.
Целокупната јавност, потсетува Митева, во изминатиов период беше сведок на низа скандали, нарушена функционалност на ЈО, незаконски постапувања и корупција, неефикасност и повреда на принципите и самостојноста во вршењето на функциите на обвинителите.
Ваквите состојби, како што рече, се комплетно спротивни на обврските кои произлегуваат од законските надлежности.
Според неа, во случајот, не станува збор само за перцепција само на Владата, туку тоа е констатирано од стручна јавност, констатирано е во извештаи кои имаат конкретни, мерливи и објективни показатели.
„Во оваа смисла, Владата цени дека придонесот од јавниот обвинител за овие состојби е значителен и е резултат на низа пропусти и повреди во неговото постапување и извршување на функцијата. Овие дејствија со кои се предизвикани тешки последици по функционирањето на јавното обвинителство со што е направено намерна и неоправдана крупна професионална грешка се правните аргументи со кои што ќе побараме разрешување на Јавниот обвинител пред истекот на мандатот. Дополнително како Влада цениме дека јавниот обвинител покрај правна одговорност, подлежи или би требало да подлежи и на поширока општествена одговорност, особено пред органот кој што го избрал, а пред се пред граѓаните чии интереси треба да ги штити. Согласно вака утврденото мислење, Владата го задолжи министерството за правда да достави предлог за разрешување на јавниот обвинител, кое пак Владата ќе го достави до Советот на јавните обвинители од каде согласно законските одредби потребно е да се добие мислење“, нагласи Митева.
Македонија
Извршен увид во документацијата во Вишото јавно обвинителство Скопје

Надлежен јавен обвинител од Основното јавно обвинителство Штип денеска изврши увид во Вишото јавно обвинителство Скопје и обезбеди докази во постапката за кривични дела – Злоупотреба на службената положба и овластување и Малтретирање во вршење на службата поведена против јавен обвинител, се истакнува во соопштението.
„Јавниот обвинител и стручни соработници од ОЈО Штип ги документираа податоците внесени во уписниците и начинот на внесување на предметите. Притоа, се вршеше и споредба со исказите на оштетените лица – пријавители за начинот на кој наведуваат дека се интервенирало при распоредување на предметите.
Увидот во документацијата е извршен во целост во согласност со одредбите на Законот за кривична постапка и за истиот ќе биде изготвен записник со констатации за сите присутни лица“, се истакнува во дописот.