Во последните 24 часа во Македонија се потврдени 234 нови случаи на коронавирус, починаа 25 лица, а оздравеа 768 пациенти, соопшти Министерството за здравство.

Во последните 24 часа се направени 2.907 тестирања, а регистрирани се 234 нови случаи на КОВИД-19 во:
Скопје – 83, Куманово – 27, Битола – 16, Тетово – 14, Струмица – 13, Штип и Виница – по 9, Кичево – 7, Прилеп и Велес – по 6, Гостивар, Струга и Кочани – по 5, Охрид – 4, Радовиш, Крушево и Демир Хисар – по 3, Пробиштип, Богданци и Демир Капија – по 2, Кавадарци, Гевгелија, Неготино, Свети Николе, Крива Паланка, Берово, Делчево, Валандово, Кратово и Пехчево – по 1.

Пријавени се вкупно 25 починати лица: 10 од Скопје (46г,60г,64г,65г,67г, 67г, 70г,71г, 74г и 75г), по 2 лица од Тетово (70г и 72г), Штип (69г и 70г) и Гостивар (67г и 79г) и по 1 починато лице од Куманово (64г), Прилеп (63г), Охрид (80г), Виница (27г), Струмица (78г), Кочани (56г), Кичево (62г), Струга (78г) и Свети Николе (57г). Од пријавените, 4 лица се починати во домашни услови, а останатите 21 во болнички услови.

Досега во земјата се направени вкупно 734.904 тестирања на Ковид-19.

Вкупната бројка на Ковид-дијагностицирани лица во нашата земја од почетокот на епидемијата изнесува 153.694, бројката на оздравени пациенти е 137.331, на починати е 5.067, а бројот на активни случаи изнесува 11.296.

Министерството за здравство ќе ги објави цените на кинеските вакцини и деловите од договорите за набавката за кои ќе добие дозвола за објавување. Во тек е постапка за декласификација на податоците од документите.

„Во соодветна процедура ќе се декласифицираат податоците за да се објави сето тоа“, рече денес министерот за здравство Венко Филипче.

Тој смета дека обвинувањата од опозицијата во последниве неколку недели за набавката на кинеските вакцини има цел да го поткопа легитимитетот на нашата држава не само пред Кина туку и пред меѓународната заедница.

„Мој впечаток од обвинувањата од последниве недели се две работи. Прво, опозицијата сама се фати во лага и второ, патолошки е зависна од лажни вести. Прво обвини за 12 милиони уплата, јавно кажав на прес-конференција дека имаше уплата, па средствата се вратија, документите се јавни. Ниту е нешто скришно, ниту сомнително. Ваквите клевети не носат ништо конструктивно, сакаат да го поткопаат нашиот легитимитет и пред Кина и пред меѓународните фактори“, рече министерот Филипче.

Опозицијата обвини дека министерот Филипче префрлил 7,8 милиони долари на фантом-фирма за кои се сомнева дека биле планирани за провизии за набавка на кинеските вакцини и да плати двојно поскапа цена за вакцините од реалната.

Ефикасноста на кинеската вакцина „Синовак“ е многу поголема од педесет отсто, уверува министерот за здравство Венко Филипче. Во текот на овој месец од оваа вакцина кај нас треба да стигнат 500.000 дози наеднаш. Министерот Филипче, одговарајќи на новинарско прашање, рече дека токму големата количина која може да стигне наеднаш била пресудна за да се одлучат за набавка на оваа вакцина за која светските медиуми известија дека има ефикасност од 50 отсто.

„За ефикасноста на ’Синовак’ разговаравме повеќе пати. Разговаравме и утрово, експертите и публикациите покажуваат дека ефикасноста на вакцината е многу поголема, над седумдесет отсто. Ние се одлучивме за набавка на оваа вакцина затоа што не постои друга која може наеднаш да стигне во толкава количина. Сакаме пред летните месеци да имаме што повеќе вакцинирани, да се заврши со возрасната група и оние ризични категории граѓани и секако пред летото да биде завршена вакцинацијата на лицата кои планираат патувања“, рече министерот Филипче.

Минатата недела кај нас стигна првата голема пратка вакцини од Кина во која имаше 200.000 од вакцината на „Синофарм“. Со нив, оваа недела почна масовната вакцинација, а министерот Филипче најави дека секој понеделник во мај ќе стигнуваат по 7- 10.000 дози од вакцината на „Фајзер“.