Претседателот на Владата, Зоран Заев, денеска прими поголема делегација претставници на бизнис-заедницата на Полска, како и делегација од градоначалници од оваа земја.

Претседателот на Владата, Заев, нагласи дека традиционалното пријателство меѓу двете земји се рефлектира и во економската соработка за што сведочи и вредноста на вкупната трговска размена, која оваа година се предвидува да достигне рекордни 300 милиони евра.

„Граѓаните на Република Северна Македонија особено му се благодарни на народот на Полска, кои Северна Македонија ја имаат поставено високо на листата за туристички посети, што е особено значајно оваа година поради ограничувањата на патувањата што ги наметна пандемијата на Ковид-19“, рече Заев.

Тој уште ги запозна полските деловни луѓе со предностите и поволностите за инвестирање во нашата земја со посебен акцент на даночните и други олеснувања, кои може да достигнат и до 50 % од вкупната вредност на инвестицијата.

Бизнисмените од Полска покажаа интерес за поволностите од Законот за стратешките инвестиции и за можностите за инвестирање во енергетски капацитети од обновливи извори, како што се фотоволтаичните и ветерните електроцентрали.

На средбата стана збор и за соработката помеѓу единиците на локалната самоуправа, особено во делот на збратимување меѓу општините на двете земји како добра основа за поврзување на малите и средните претпријатија од локалните заедници, каде што има голем потенцијал за поврзување и соработка.

Министерот за надворешни работи, Бујар Османи, денеска се сретна со вршителот на должноста директор за Западен Балкан во Генералниот директорат за соседство и преговори за проширување на Унијата, Микела Матуела.

Соговорниците направија преглед на постигнатиот напредок во поглед на имплементација на агендата поврзана со ЕУ, а се осврнаа и на актуелниот статус на нашето европско досие.

На состанокот стана збор и за текот на подготовките, клучните теми и очекуваните резултати во врска со октомврискиот самит ЕУ – Западен Балкан во рамките на словенечкото претседателство со ЕУ, при што беше оценето дека самитот мора да испрати јасни политички пораки за иднината на земјите од Западен Балкан во однос на ЕУ.

Подигнување на квалитетот на услугите во предучилишното образование и грижа што треба да доведе до поголеми образовни постигнувања, личен развој и социјална вклученост на децата – беше тема на денешната средба на министерката за труд и социјална политика, Јагода Шахпаска, со експертскиот тим што работи на проектот „Подигнување на квалитетот на предучилишното образование и грижа“, финансиран во рамките на акцијата 4 „Образование, вработување и социјална политика“ од акциската програма на ИПА 2017.

Министерката оцени дека врвен приоритет е да се обезбеди најдобриот модел, со кој ќе се унапреди квалитетот на предучилишното образование на децата преку унапредување на квалитетот на стручниот кадар во градинките.

На средбата министерката Шахпаска посочи дека проектот ќе придонесе за побрз професионален и кариерен развој на стручниот кадар во градинките според европските стандарди. Таа предложи воспоставување мерит-систем заснован врз објективни вредности.

„Мери-системот ќе придонесе за унапредување на улогата на стручниот кадар во градинките. Тој ќе биде заснован на вредности што ќе гарантираат објективност. Кариерниот развој ќе биде според постигнатите резултати. Сакаме да ги градиме вредностите. Само така ќе го унапредиме квалитетот на образованието во предучилишната возраст. Тоа значи и мотивација за вработените за надградба и унапредување“, рече министерката Шахпаска.

Воведување систем на обуки и креирање модели, лиценцирање на стручните лица и зајакнување на родителското учество во детските градинки, особено на родителите на деца во ризик и деца што се социјално исклучени се дел од моделите преку кои ќе се унапредува квалитетот во предучилишното образование.