Македонија
Шилегов дозволил 12 рати за плаќање на комуналиите за деветкатницата кај „Мајчин дом“

Скопскиот градоначалник Петре Шилегов му дозволил на инвеститорот на деветкатницата кај „Мајчин дом“ комуналиите да ги плати на 12 рати. За уплатените средства и за можноста трајно да се сопре изградбата на објектот, попладнево треба да расправа Советот на Општина Аеродром на вонредна седница.
Инвеститорот, Друштвото за градежништво, проектирање, инженеринг, трговија и услуги „ЗСФ-ком“, на Градот треба да му плати 64.527.333 денари или приближно 1,049 милион евра како надомест за уредување градежно земјиште. Градските власти пресметале дека инвеститорот на Општина Аеродром, на чија територија е деветкатницата што аеродромци не дозволуваат да се гради, треба да ѝ плати 23.464.327 денари. Без да го плати надоместокот, инвеститорот не може да добие одобрение за градење. Одобрението му е веќе издадено, а инвеститорот договорил со Град Скопје отплатата на комуналиите да биде на рати.
„Ние како институција, само ја изготвуваме пресметката за надомест за уредување градежно земјиште, популарно наречено комуналии. Во однос на конкретниот проект, на Град Скопје му припаѓаат 60 проценти од вкупниот надомест за уредување градежно земјиште, а на Општина Аеродром ѝ следуваат 40 проценти. На Град Скопје во конкретниот пример му следуваат 64.527.333 денари. Плаќањето е на рати, и тоа првата рата 29.358.200 денари, и втората околу 4.106.285 денари, а остатокот ќе се доплати на 10 рати“, велат од одделението за односи со јавност на скопскиот градоначалник.

Градилиштето за деветкатницата беше оградено во понеделникот
Од Општина Аеродром, од каде што е издадено одобрението за градење на деветкатницата, велат дека инвеститорот го уплатил целиот износ за комуналиите.
„Комуналиите уплатени од посочениот инвеститор за објектот пред ‘Мајчин
дом’ се во износ од 23.464.327 денари“, кусо одговараат од Аеродром на прашањата за комуналиите за деветкатницата.
„ЗСФ-ком“ има одобрение да изгради објект висок 30 метри, со приземје, осум ката и потпокрив и со бруто-површина од 20.000 квадратни метри на парцела со површина од 3.538 квадратни метри. Архитектите велат дека на одобрената површина може да се сместат околу 250 стана. Инвеститорот не го покажа проектот, слика од новиот објект нема на информативната табла на градилиштето.
Денес попладне, на вонредна седница, Советот на Општина Аеродром ќе бара начин за трајно да ја сопре градбата. Градоначалникот Златко Марин веќе извести дека евентуално обесштетување со пари на инвеститорот би значело од општинската каса да се издвојат 8-10 милиони евра, но најави дека е подготвен заедно со граѓаните и со советниците да се обиде да најде начин градбата да не се реализира.
Изградбата на деветкатницата беше стопирана во средата кога инспектори од Општината утврдиле недостатоци на градилиштето. Забраната е на 15 дена, рок во кој градоначалникот Марин се надева дека ќе најдат начин за трајно стопирање на објектот. Против изградба на зградата жителите на Аеродром органзираа протести и бараа градоначалникот итно да ја сопре изградбата која почна во понеделникот.
Истиот инвеститор има уште две парцели во близина на „Мајчин дом“. Едната е поврзана со парцелата за деветкатницата покрај „Мајчин дом“ со површина од 1.495 квадратни метри, а другата е полјаната меѓу училиштето „Ѓорѓија Пулевски“ и црвените кули со површина поголема од онаа за деветкатницата, односно 3.674 квадратни метри.
Од Аеродром велат дека на парцелата покрај „Мајчин дом“ поврзана со парцелата со деветкатницата во планот е предвиден паркинг, а на полјаната кај „Ѓорѓија Пулевски“ не може да се гради оти и покрај тоа што е приватно земјиште, во планот е предвидено блоковско зеленило.
Жителите на Аеродром стравуваат дека и на полјаната ќе се појави зграда и не веруваат на објаснувањата од Општината дека не може да се гради наведувајќи го како аргумент фактот што и деветкатницата до лани во април беше приватна парцела на која беше предвидено зеленило.
Планот И 10, усвоен лани во април, кој предвидува низа градби за кои жителите на Аеродром неколкупати досега се изјаснија дека не дозволуваат да се изградат, денес ќе биде на дневен ред на вонредната седница на Советот. Предвидените градби жителите ги нарекоа еколошка катастрофа, но сите нивни обиди да се тргнат од планот завршија без успех.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
АМСМ: Зголемена е фреквенцијата на возила поради летните одмори

Сообраќајот на државните патишта се одвива непречено, по наместа влажни коловози.
Интензитетот на сообраќај на патните правци надвор од градските средини е зголемен. Поради летните одмори се бележи зголемена фреквенција на возила, но на граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Од 1 јули до 31 август на државните патишта во Македонија се воведува летен времен режим на сообраќај со кој се забранува движење на тешки товарни возила со вкупна маса над 15 тони, за време на деновите од викендот и за денови при екстремно високи температури. Термините се следни:
петок од 17:00 – 22:00 часот,
сабота од 09:00 до 18:00 часот и
недела од 09:00 до 22:00 часот.
Во деновите со екстремно високи температури, определени од Министерство зa здравство, забранaта ќе важи и од понеделник до четврток во период од 11:00 до 17:00 часот.
Ограничувањето не се однесува на возила кои превезуваат животни, цвеќе, хуманитарна помош, жито и житни култури и леснорасиплива стока, нафта и нафтени деривати, превоз на опасни материјали и возила кои вршат превоз за компании кои имаат склучено договори за изведување на проекти на државните патишта со ЈП за Државни патишта.
Македонија
Милошоски за Коцевски: Најдобро е да си поднесе оставка, бидејќи спонзорството од ДУИ и СДСМ само ќе му го руши угледот

Со денешното гласање во Собранието паднаа маските околу тоа кој е политичкиот покровител на Државниот јавен обвинител Коцевски и неговото раководно друштво во обвинителството, напиша во објавата на социјалните мрежи Антонио Милошоски од ВМРО-ДПМНЕ.
Според него, одговорот е јасен.
„Истите политичари од ДУИ и СДСМ кои во февруари 2024 година го предложија и гласаа „За“ изборот на Коцевски за јавен обвинител, денес не се осмелија да гласаат за негова недоверба. И покрај тоа што државниот обвинител има неколку крупни професионални грешки за кои заслужува разрешување, сепак фактот што токму Коцевски најдобро ги знае индициите за висока корупција направена од високи функционери од СДСМ е оној политички кредит што пратениците на Филипче и Оливер Спасовски мораат сеуште да го отплаќаат со заштита на функцијата на обвинителот“.
Како што оценува Милошоски, дури и пораката од СДСМ до Државниот обвинител дека од него зависело дали ќе бил “со штитот или на него”, повеќе звучи како кодиран сигнал од еден кон друг бизнис клан, отколку како парламентарен принцип поврзан со владеењето на правото.
Сепак, вели тој, добро е што ВМРО-ДПМНЕ остана доследна на своите позиции и тука не треба да се застане.
„Иако денес ги видовме политичките покровители на Државниот обвинител во Собранието, сепак корозијата на репутацијата на ЈО во најголем ја прават десетина актери внатре во самото обвинителство. Заради ваквите околности, како и заради силната порака која денес ја доби од Собранието, најдобро е ЈО Коцевски да си поднесе оставка, бидејќи спонзорството од ДУИ и СДСМ само дополнително ќе му го руши и угледот, и интегритетот на обвинителството во целина“, пишува Милошоски.
Македонија
(Видео) Драчево бара лежечки полицајци на „Јустинијан Први“: Не утре, туку сега, пред да има мртви

„Колку животи треба да се изгубат на улица „Јустинијан Први“ за конечно да се преземе нешто?
Денеска повторно автомобил излета од коловозот и заврши во двор на жител. Само по среќа немаше жртви. Но до кога ќе се потпираме на среќата? Утре тоа може да биде нечиј син, ќерка или родител згмечен на тротоар“, реагираат граѓаните преку социјалните мрежи на ѕидот на општината Кисела Вода по тешка сообраќајка на улицата.
„Години наназад алармираме на оваа улица се вози како на автопат! Нема лежечки полицајци, нема контрола. Се што некогаш беше поставено, одамна е уништено од нашите сонародници, во 3 часот ноќе со копач ги корнат и со камиони кочат на нив да ги одкорнат, а институциите молчат. Нивната незаинтересираност е директна закана за животите на жителите“, стои во објавата.
Доста е, како што вели во напишаното револтиран жител, со празни ветувања и молк.
„Бараме итни мерки, поставување на лежечки полицајци. Не утре, не, кога ќе има средства, туку сега пред да има мртви!
Ако општината и надлежните органи продолжат да си ги затвораат очите, секоја идна несреќа и секоја изгубена жртва ќе биде нивна одговорност нивно злосторство со премолчена дозвола!
Градоначалниче Орце Ѓорѓиевски, те повикуваме да реагираш!
Жителите на оваа улица очекуваат од тебе итно да се постават лежечки полицајци.
Време е безбедноста на граѓаните да биде на прво место пред да дојде до трагедија“, стои во напишаното на социјалните мрежи.