Во решението на кривичниот суд за притворот на ексдиректорот на тајната полиција, Сашо Мијалков, пишува дека мерката му е определена поради опасност од бегство, дознава „Макфакс“. Специјалното јавно обвинителство навело дека за обвинетиот имаат оперативни информации дека ќе избега, односно дека презема дејствија и активности со кои планира да се даде во бегство. Во решението на советот, сепак, не е наведено на кои околности СЈО ја темели ваквата претпоставка.

Како што дознава „Макфакс“, вториот аргумент на СЈО поради кој се барал притвор за Мијалков е тоа што за него се воделе и други судења во кривичниот суд. Во решението за притвор се цитира и допис доставен од Управата за финансиско разузнавње во кој се наведува дека едно правно и физичко лице поседуваат значителни средства во милиони евра, а тие биле на име на обвинетиот Мијалков.

Советот во решението за притвор навел дека обвинетиот Мијалков поседува имот во Чешка, а тој и членовите на неговото семејство поседуваат имот и во Македонија. Имотот лесно можеле да го продадат и да избега, а Мијалков, како и неговиот син поседувале голем број акции и недвижности и се сопственици на удели.

Во решението потпишано од судијката Џенета Бектовиќ пишува дека иако за обезбедување присуство за обвинетиот ќе се примени поблагата мерка, сепак, во овој стадиум од постапката, претходните поблаги мерки не биле доволен ефикасен механизам за обезбедување присуство.

Утре во кривичниот суд Мијалков треба да биде донесен токму во предметот „Таргет-Тврдина“, за кој СЈО побара притвор. Адвокатите на Мијалков имаат рок од 24 часа да поднесат жалба на решението за притвор.

Недозволиво е судија на претходна постапка или кривичен совет да не ја извести странката, во случајов Сашо Мијалков, дека за него се бара мерка притвор, изјави за „Макфакс“ адвокатот на Мијалков, Антонио Апостолски.

„Можеби тој ќе понуди патна исправа или гаранција. Странката мора да се произнесе во секој случај. Мијалков не беше известен дека за него се бара притвор. Мислам дека судот ги пречекорува своите овластувања“, вели Апостолски.

Адвокатот додаде дека ќе приложи жалба на одлуката за притвор.

Претходно денеска на поранешниот шеф на УБК, Сашо Мијалков, Кривичниот совет му определи 30-дневен притвор. Вечерва тој беше спроведен во истражниот затвор во Шуто Оризари.

Поранешниот шеф на УБК, Сашо Мијалков, вечерва е спроведен во истражниот затвор во Шуто Оризари поради опасност од бегство, велат извори од СЈО за „Макафакс“.

Кривичниот совет попладнево на Мијалков му ја одредил мерката притвор од 30 дена.

Од СЈО велат дека Мијалков бил приведен по нивно барање, како мерка на претпазливост за случајот „Таргет-Тврдина“.

Мијалков е третиот приведен функционер од поранешната власт по бегството на експремиерот Никола Груевски. Претходно приведени беа поранешниот генерален секретар на Владата, Кирил Божиновски, и ексминистерот за транспорт и врски, Миле Јанакиески.