Ја промовираа во март 2018 година, а работеше до мај 2018 година. Алатката за отчетност на трошоците на министрите и другите јавни функционери беше најавена како начин за докажување на транспарентноста на Владата и сите трошења на министрите, а не е ажурирана осум месеци.

Преку алатката можеше да се види колку пари потрошиле министрите за авионски билети, хотелски сместувања, ресторани, дневници, такси-превоз, подароци, сметки за мобилен телефон. Таа даваше можност за споредба, односно можеше да се види колку пари за овие намени потрошиле претходниците од ВМРО-ДПМНЕ во 2014, 2015 и во 2016 година.

Министерот без ресор задолжен за комуникации, отчетност и транспарентност, Роберт Поповски, алатката ја претстави пред јавноста на 21 март минатата година и рече дека целта е трошењето да се сведе на минимум и само за продуктивни трошоци.

„Софтверот е изработен и да алармира за евентуални недоследности и отстапки во трошењето“, рече тој.

Последните промени се направени во мај 2018 година

Власта тогаш се пофали дека потрошила помалку од претходниците од ВМРО-ДПМНЕ, но два месеца подоцна, во мај минатата година, алатката престана да функционира. Јавноста може да ги види старите податоци, но не и трошоците што ги направиле министрите во последните осум месеци.

Во август минатата година медиумите апелираа дека алатката за отчетност не е ажурирана, а портпаролот Миле Бошњаковски објасни дека не излегле со нови информации бидејќи „изминатиот период бил полн со политички активности, ама и дека алатката делумно во софтверскиот дел ќе претрпи промени“.

„Можете да очекувате многу набргу да биде објавен наредниот циклус. Се работи, собрани се податоците. Станува збор за технички нагодувања на самата алатка со цел да биде поедноставна и појасна за користење“, рече владиниот портпарол за „Независен“.

Бошњаковски не одговори на нашите прашања од типот зошто алатката за транспарентност сè уште не е ажурирана.