Македонија
Сите „борби“ на Арсовска – од министер до метач
„Време е да се одбере – празни ветувања или способни и исполнителни личности кои нема да потпаднат под политички притисоци и нема да се откажат од својата визија“ – рече Данела Арсовска кога ја поднесе својата кандидатура за градоначалник на град Скопје. Таа го победи својот против-кандидат, Петре Шилегов на локалните избори во 2021 со речиси 30 илјади гласови плус.
Набрзо по стапувањето на функцијата, одржа брифинг со новинарите на кој рече дека постојано е мета на закани. Се пожали дека одредени луѓе ѝ се закануваат за да им бидат простени криминали и злоупотреби, но не кажа кои се тие. На прашањето дали пријавила во полиција, таа одговори: „Каде да пријавам? Таму каде што треба да пријавам јас сум си пријавила. Ако треба да пријавувам закани, секој ден, по цел ден ќе треба да бидам во полиција“.
11 месеци соработуваше со градоначалниците од општините, како и директорите од ВМРО-ДПМНЕ. Заедно одеа на започнување на нови проекти, реконструкција на стари или увид во веќе започнати. Лидерот на ВМРО-ДПМНЕ, Мицкоски, дури ветуваше проекти во нејзино име. Па така, најавуваше дека биле во преговори со светски компании за набавка на 100 електрични автобуси за Скопје, а една од компаниите сакала да отвори и фабрика за производство на автобуси во главниот град.
Големиот пресврт се случи на 12 септември лани, кога Арсовска го разреши директорот на Водовод, Златко Перински, поради, како што рече, самоволие и несоодветно постапување за милионски тендер за пречистителната станица во Скопје. По 3 дена на седницата за советнички прашања скопската градоначалничка и советниците кои се поддржуваа и фалеа, сега се караа и навредуваа. Се обвинуваа меѓусебно за провизии од тендерот од 136 милиони евра. „Кога ви го фатив рачето во медот не ви чинам. На вашиот шпицен градоначалник сакам да му кажам да се бореше против власта и штетните договори ќе ја спасеше Македонија. Нека не ми се заканува, нека дојде”, рече Арсовска.
По разрешувањето на Перински, сите директори од ВМРО-ДПМНЕ самите си поднесоа оставки од функциите, а Данела стави кадри од ГРОМ, припадници на „огнените“ и други политички партии. Фотелјата ја напушти и заменик-градоначалничката на Град Скопје, Бујаре Абази, од Алијанса за Албанците, а на нејзино место дојде Александар Трајановски кој на секое излегување на говорница ги навредува советниците доколку упатат критика кон Арсовска.
„Драма“ имаше и со претседателот на советот, Трајко Славески. Откако му го укина копчето за вклучување и исклучување на тонот од говорница, тој на сите им нареди да зборуваат од место. Потоа Арсовска со поставен подвижен микрофон отиде на говорницата и му рече на Славески дека е Хитлер и крадец. „Господине Хитлер не ви доликува ова што го правите. Вие го кршите деловникот и сте крадец. Немате никаков интегритет”, рече Арсовска. Тој и рече да седи во „магарешка клупа“ и ја прекина седницата.
Оттогаш Арсовска ретко се појавува на седниците на Град Скопје, а кога доаѓа, од говорница редовно употребува метафори и се кара со присутните. На последната седница на која беше дојдена, на советничката од СДСМ, Љубица Јанчева и рече „вие ако се уличарка, ние не мора овде да ве трпиме“, а за Мицкоски рече дека е „рекет број 1“.
Градоначалничката се искара и со претставниците на Асоцијацијата на архитекти на Македонија, проектантите на Универзална сала и со министерката за култура Бисера Костадиновска-Стојчевска. На прес-конференцијата на која требаше да се бара чаре за Универзална, при доаѓањето, на поздравот од министерката Костадиновска-Стојчевска за добредојде, Арсовска ѝ рече „За разлика од вас на нас не ни е страв да дојдеме на покана“. Објектот на Универзална се распаѓа седум години. Реконструкцијата ја започна Шилегов и требаше да оди во две фази, а за првата Владата му даде на Градот 2 милиони евра. Градежните работи ги стопираше Данела бидејќи проектот бил небезбеден, а советниците не дадоа согласност објектот да се предаде на Владата за да го санира.
Арсовска не сакаше да го преземе парното во Скопје. Откако регулаторната комисија ја одзеде лиценцата на БЕГ, на распишаниот оглас за преземање на топловодната мрежа не се пријави „Градски енергетски системи“ (ГЕС) – акционерско друштво кое го формираше претходниот градоначалник токму за оваа намена. Парното го преземе државната ЕСМ, а министерот за економија, Крешник Бектеши, рече дека Арсовска нема капацитет да го реши проблемот. Таа, пак, му возврати: „Ако треба да бидам и министер за економија, Бектеши нека си даде оставка. Да потсетам, министерот кој се сликаше со дониран зејтин кој не можеше сам да го обезбеди, нема право да зборува за туѓа способност“. АД ГЕС лани во август остана без вработени бидејќи сите три месеци не земале плата. Се очекува на следниот состанок акционерите да донесат одлука за престанок со работа.
Арсовска се скара и со приватните превозници кои 7 месеци не возеа поради долг од 1,5 милиони евра. На почетокот, Арсовска не го признаваше долгот, а бидејќи приватниците не возеа им ги раскина договорите. Директорите на „Слобода превоз“ и „Макескпрес“ не ги примаше на преговори, па тие со денови ги блокираа трите главни крстосници во Скопје. Тогаш Ленин Јовановски, кој и даваше поддршка за време на целата камапања рече: Бев измамен од човек кој што многу перфидно умее да излаже, да заведе и да ти даде лажна надеж. Признавам дека сум изманипулиран и тоа на начин кој им поминува на психопатите. Арсовска бегаше од медиумите со недели, а откако се појави во јавноста рече „Градот Скопје може и без приватни превозници.“ Потоа формирани беа три нови фирми. Со новите директори таа се договори и откако долгот им го исплати тие се пријавија на огласите и повторно со своите стари и нееколошки автобуси сообраќаат низ скопските булевари.
На еден ден прекинаа да возат и автобусите на ЈСП затоа што им доцнеше една плата. Тогаш беше свикана итна седница на која се пренаменија средства и платите на возачите им беа префрлени.
Веќе следниот ден, синдикатот на Водовод најави штрајк затоа што директорот им се заканувал на вработените и им вршел мобинг и притисоци. Најавија штрајк доколку не биде сменет, односно се заканија дека нема да ги поправаат дефектите. Додека течеше помирувачкиот процес, Арсовска го разреши директорот.
Таа го разреши и директорот на МКЦ, Богоев, и го обвини дека ангажирал противзаконски 250 лица како хоноррарци, од кои повеќето биле блиски до ВМРО-ДПМНЕ. „Има и над 90 договори за времено ангажирање на шанкери на кои им биле исплаќани од 300 до 750 евра на месец“, изјави Арсовска. На негово место постави детектив, а Управниот суд пресуди дека назначувањето било незаконско. „Лицето Никола Алексов никогаш не било вработено во Јавната установа Младински културен центар- Скопје што значи дека не бил од редот на вработените за да може да биде избран за вршител на должност директор.“, рекоа од Управен.
Данела се скара и со деканот на градежен, Горан Марковски, кој рече дека мостот Беласица е сериозно оштетен и ќе треба многу време за да се поправи и да биде безбден за користење. „Тој го видел мостот од 50 метри мостот, болен од ковид“, рече Арсовска минатиот месец и најави дека следната недела мостот ќе биде пуштен. Сепак, најоптимистичките најави се дека по Беласица ќе се вози од есен.
Последни во низата се вработените во Комуналец, кои Арсовска ги нарече мафијаши. Од претрпијатието се избракани 70-ина лица за една недела бидејќи земале плата, а не доаѓале на работа. „Откривме луѓе што се во Германија пет години, а примале плата. Некој си ужива и чека џепарлак да му дојде секој први, во месецот, од тоа што е пријавен во некое јавно претпријатие, рече таа. На прес-конференцијата не кажа имиња, оти тоа било личен податок, но документи поднела до МВР и јавното обвинителство. Вчера и од двете институции демантираа дека е поднесена таква пријава.
На последната анкета на ИРИ, само 1% од граѓаните рекле дека се задоволни во целост од работата на скопската градоначалничка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ДИК: Излезноста до 15 часот е 34.87 отсто
До 15 чaсот, од вкупно запишани 4.514 гласачи на седумте избирачките места, гласале 1574 односно 34.87 отсто, објави Државната изборна комисија.
Во ИМ 2101 во Желино гласале 428 гласачи односно 43.10%.
Во ИМ 1194 во Крушево, гласале 197 гласачи односно 42 %.
Во ИМ 1202 во Крушево, гласале 67 гласачи односно 22.48 %.
Во ИМ 1272 во Охрид, гласале 226 гласачи односно 31.79 %.
Во ИМ 1470 во Долнени, гласале 173 гласачи односно 26.29 %.
Во ИМ 1470/1 во Долнени, гласале 184 гласачи односно 29.11%.
Во ИМ 1844 во Струга, гласале 299 гласачи односно 39.71 %.
Во споредба со гласањето на 8 мај 2024, до 15 часот, на ова прегласување се забележува зголемена излезеност за 1.21% на овие избирачки места.
Македонија
(Видео) Трипуновски: Со земјоделците и откупувачите договориме откупната цена на младиот компир да не биде под 20 денари за килограм
Дополнителниот заменик министер за земјоделство, шумарство и водостопанство Цветан Трипуновски денеска е во општина Босилово каде што земјоделците од овој регион веќе неколку дена протестираат заради падот на откупната цена на младиот компир.
– Заедно со мене на протестот присуствуваа и неколку откупувачи и заедно со земјоделците разговаравме за можно решение и се договоривме во наредните 10 дена откупната цена на младиот компир да не биде под 20 денари за килограм, а потоа се договоривме да оствариме уште една средба се со цел да го средиме и останатиот дел од пазарот. – изјави Трипуновски.
Трипуновски рече дека успеале заеднички да се договорат за условите и можностите за понатамошниот тек на откупот на млад компир.
– Денес постигнавме договор кој не е идеален, но е преодно решение во овие тешки моменти кои ги наследивме од Владата на СДС. Во иднина ние како Влада предвреме заедно со земјоделците и откупувачите ќе креираме мерки и стратегии за да немаме повеќе вакви несакани ситуации. – заврши Трипуновски.
Македонија
Спорните договори за вработување се само со потписот на Иљази – ДСЗИ влезе на Токсикологија
Државниот санитарен и здравствен испекторат извршил контрола на Клиниката за токсикологија во однос на договорите за вработување на лицата за кои постојат тврдења дека некои од нив се без соодветно образование. Од контролата било увидено дека овие договори го содржат само потписот на организациската директорка Бесија Иљази.
Директорката на Инспекторатот, Рената Младеновска, рече дека во согласност со законските одредби во однос на потпишувањето акти, медицинскиот и организацискиот директор имаат заедничка надлежност и кај потпишувањето на договорите за вработување, отказни решенија, јавни набавки.
„Ако овие акти се потпишани само од еден директор, во согласност со Законот за здравствената заштита се сметаат за непотпишани, но законодавецот не предвидел глоба по ова прашање“, рече Младеновска додавајќи дека ќе го информираат Министерството за здравство, кое има ингеренции да постапува ако договорите не се валидни, правниот сектор треба да се изјасни.
ДСЗИ претходно забрани лицата што немаат важечки договори за вработување да работат откога тие доаѓале на Клиниката со истечени договори на инсистирање на Иљази. На 15 мај, како што информира Младеновска, договорите биле потпишани со еден потпис.
Клиниката за токсикологија цел месец ја тресеа скандали за овие лица, кои и покрај тоа што немаа договори, доаѓаа на работа, а многумина од лекарите јавно се пожалија дека немаат комуникација со организациската директорка и реално имаат потреба од двајца дипломирани биолози и еден болничар. Кога докторите јавно ја прозваа Иљази дека не соработува со нив, не го зборува македонскиот јазик, не се знае ништо за нејзиното образование, клиниката е во долгови, а во моментот не функционира токсиколошката лабораторија и се снаоѓаат со тестови и со еден лаборант, Иљази ги потпиша договорите за вработување на договорците и наместо да одговори на критиките, донесе писмена наредба за забрана докторите да комуницираат со медиумите. Таа во текот на вчерашниот ден повикала еден новинар во својата канцеларија и дала изјава во која истакнала дека доктор Нико Беќаровски, кој гласно ѝ се спротивстави, е доктор од времето на друже Тито. Нагласи и дека разрешениот медицински директор доктор Данил Петровски еден ден пред таа да стане организациска директорка си ја вработил снаата, а немал можност да го вработи биологот и 18 лица, кои со години се вработени таму.
„Ги прекрши сите законски норми, ги држеше да работат без договори и без плати, ги тераше на дежурства и така продолжи до моето доаѓање. Сега кога го решивме нивниот проблем, тоа стана ‘голем проблем’“, додаде Иљази.
Минатата недела, министерот за здравство Илир Демири не кажа дали осумнаесетте договорци од Токсикологија се стручни, туку рече дека бил загрижен за 18-те семејства што не добиле плата.
Прашан за тврдења во јавноста дека тие лица не исполнуваат критериуми за да работат таму, министерот рече дека тоа прашање требало да се постави во 2023 година.
Додаде дека го замолил веќе разрешениот медицински директор Данил Петровски пред изборите да ги продолжи договорите, но тој одбил. За разрешувањето на Петровски, Демири тврди дека тоа не било политичка кампања, туку биле констатирани неправилности во работата.
И покрај сите поплаки од вработените за организациската директорка на Клиниката, Иљази, министерот изјави дека таа ќе остане на својата позиција сè додека не го прекрши законот.