Македонија
(Видео) Арсовска се жали дека плаќа туѓи долгови: 2,3 милиона евра Градот ќе плати отштета на Комерцијална, 2 милиона на „Скопски саем“, милион за галиите

Од Град Скопје се побаруваат над 10 милиони евра за отштети по судски спорови и камати за нив за проекти што се реализирале во мандатите на градоначалниците пред Данела Арсовска. Таа денес уверуваше дека Град Скопје во последните 18 месеци е во добра финансиска состојба и покрај блокирањето на сметката и на советниците им кажа кој сè го тужи Градот и чека отштета.
„Дали знаете кои сè спорови ги има Град Скопје до овој момент и зошто? Еве јас ќе ѝ презентирам дел на јавноста за да знаат што е она што се случувало во изминатите години. Комерцијална банка АД Скопје, тужен Град Скопје – 1.171.900 евра, без камата и судски трошоци. Наплатена бесправна банкарска гаранција. Поведен спор. Основниот долг зголемен со затезна камата ќе изнесува 2.335.000 евра, што значи дека на овие 1.171.900 евра имате уште толку судски трошоци и камати од Комерцијална банка за спор што е поведен од 8.11.2017 година, кој се водел до 2023 година и кој е во своето финале. Значи, Градот ќе биде оштетен по основ на камати и судски трошоци за над 1 милион евра само по основ на овој спор“, рече Арсовска.
Спор против Градот повело и Друштвото за градежништво „Интернационал“ на 7.2.2019 година. Арсовска рече дека тие побаруваат 176 милиони денари, односно речиси 3 милиони евра, на кои треба да се додадат судските трошоци и каматите.
Арсовска објасни и за долгот кон „Скопски саем“.
„’Скопски саем’, вредност 110 милиони денари, тоа е неполни речиси 2 милиона евра. Исплатени се средствата во Градот на 19.12.2007 година. Издадено им е одобрение за градење на 31.1.2008 година, поништено им е во меѓувреме и станува сопственост на 19 септември на Друштвото за недвижен имот ‘Ист гејт’. Поведена е тужба, таа сега беше доставена во Град Скопје за наплата. Покрај овие основни средства од речиси 2 милиона евра, кои беа побарувани, Градот беше задолжен да плати по основ на камати и 480.000 евра“, рече градоначалничката Арсовска.
Арсовска од советниците на ВМРО-ДПМНЕ побара објаснување зошто досега не поднеле кривични пријави за каматите.
„Сакам да ве прашам, затоа што имаме советници од ВМРО-ДПМНЕ што одржаа драматична прес-конференција дека за камати ќе пуштале кривични пријави, дали поднесовте кривична пријава за овие камати? Дали поднесовте кривична пријава бидејќи на прес-конференција рековте дека ќе поднесете доколку во одреден спор Градот плати 1 евро камата по основ на она што се случуваше со приватните превозници. Еве тука имате правосилно решение за 480.000 евра камати. Ако не е, ме интересира кога ќе ја поднесете?“, праша градоначалничката Арсовска.
На листата со долгови што треба да ги исплати Градот е и Друштвото за транспорт „Гренадар“ со 253 милиони денари и судска постапка со тужба од 16.1.2020 година. Арсовска очекува дека и во овој спор сумите за камати ќе бидат милионски, а кои Градот ќе треба да ги плаќа.
Побарување од нешто повеќе од еден милион евра од Градот има и за галиите за тужба од 2020 година, во која се бара надомест на штета од 68 милиони денари.
„Да не ги набројувам понатаму затоа што има доста и мора да кажам дека сумите што се побаруваат се милионски, но исто така милионски се и каматите што Градот треба да ги плати. Така што, Градот во овие изминати 18 месеци е во добра финансиска состојба, финансиски е консолидиран, кредитниот рејтинг ни е задржан со позитивен изглед и имаме драстично зголемување на можноста за кредитно задолжување од 1,2 милион евра во ноември 2021 година за сега да имаме меѓу 25 и 30 можности за кредитно задолжување“, рече градоначалничката Арсовска.
Извештајот за финансиската состојба на Градот и јавните претпријатија е прва точка на дневниот ред на денешната седница на Советот на Град Скопје.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Три реформски закони за администрацијата ја поминаа првата фаза

Собранието даде поддршка на предлог законот за вработените во јавниот сектор, предлог на законот за административни службеници и на предлог на законот за стручно усовршување и обука на административните службеници, сите во прво читање и ги проследи во натамошна собраниска процедура.
Министерот за јавна администрација, Горан Минчев посочи дека пакетот реформски закони за администрацијата се во согласност со Стратегијата за реформи на јавната администрација, Акцискиот план на Министерството за јавна администрација и со Роковникот за европската агенда.
„Овие закони во минатиот период долго беа во европските извештаи и се надевам дека конечно дојдовме до крајот и дека пратениците ќе ги изгласаат“ – рече Минчев.
Според него, со предлог законот за вработените во јавниот сектор се поставуават темелите за професионализација на јавниот сектор. Ќе се овозможи секој конкурс да биде јавен, а институциите ќе бидат обврзани на целосна транспарентност.
Селекцијата ќе се врши низ три јасни доверливи фази: администратина проверка, тестирање и интервју со кандидатот, врз основа на криетриуми.
„Ќе се вработува врз основа на заслуги, а не на познанства“– истакна Минчев.
Тој најави централизација и дигитализација на огласите и посочи дека секој оглас за вработување ќе биде објавен на веб страницата на Агенцијата за администрација.
„Борбата против партизацијата е еден од главните фундаменти. Со јасни ограничувања на дискрециските овластувања и со строги правила, го прекинуваме просторот за партиски и за неформални вработувања во јавниот сектор. Се воведува нова специјализирана категорија за ИТ кадарот со повисоки плати и современи услови за работа, се поедноставуваат плановите за вработување и за систематизација, за мобилност за јавните службеници и за унапредување засновано на услуги. Ќе има и увид во привремените вработувања” – наведе министерот Минчев.
Во предлог законот за административни службеници, пак, е предвидено да се воведе систем на вработувања со електронски тестови и со практични проверки,. Агенцијата за аминистрацијата како интегрален дел од Министерството за јавна администрација ќе гарантира фер и транспарентен, дигитализиран избор, односно процес кој ќе се снима.
Предвидено е и задржување на младите таленти со хибриден и далечински модел на работа, подржан со менторство.
Со законот за стручно усовршување и обука на административните службеници, меѓу останатото, треба да се овозможи усовршување, што ќе направи учењето да биде задолжително и континуирано. Обучувачи ќе бидат искусни административци со финансиска награда.
Пратениците го изгласаа и Законот за инспекциски надзор, со кој се укинува Инспекцискиот совет, а се формира колегиум на директори на државни инспекторати како меѓуресорско координативно работно тело.
Министерството за јавна администрација останува целосно посветено на реализацијата на реформската агенда во согласност со европските стандарди и приоритети.
Македонија
Арсовска: Внукот на градоначалникот на Студеничани градел објект кога имал 5 години, а го легализирал на 6

Градоначалничката на Град Скопје, Данела Арсовска, иронично објави дека внукот на Азем Садики, градоначалникот на ДУИ од Студеничани, на 5 години изградил објект, а на 6 години го легализирал.
„Предупредување ВОЗНЕМИРУВАЧКА СОДРЖИНА!
Оваа нема да го видите на Сител, Алфа или на медиум каде што се штити организираната криминална банда на Висар Ганиу!
На 20.05.2025 година ВИСАР ГАНИУ и ЕЈУП АДЕМИ му овозможиле легализација на ЈАСИН САДИКИ, врз основа на барање кое го доставил до општина Чаир кога имал 6 години, за зграда која ја градел кога имал 5 години.
Јасин САДИКИ е внук на Азем САДИКИ, градоначалникот на ДУИ од Студеничани. Сигурно Азем е исклучително горд на достигнувањата на својот внук.Веројатно и вие би биле да имате внуци што градат на 5 години“, објави Арсовска.
Македонија
Тошковски: Се дигитализира процесот на издавање судски наредби за ПИ мерки

Министерот за внатрешни работи Панче Тошковски денеска учествуваше на настанот „Поддршка и поттикнување на користењето на воспоставениот акредитиран систем за пренос на класифицирани информации“ на кој се означи старт на дигитализација и унапредување на процесот за издавање на судски наредби за посебни истражни мерки помеѓу Министерството за внатрешни работи, Основното јавно обвинителство и Оперативно техничката агенција.
„Преку оваа алатка, нашите аналитички тимови и оперативните единици во Одделот за сузбивање на организиран и сериозен криминал драматично ќе ги унапредат своите задачи преку апликацијата на системот. Кога е потребна посебна истражна мерка, МВР во дигитална форма ги подготвува сите релевантни податоци и преку платформата ги доставува до Јавното обвинителство. Обвинителите ги разгледуваат предлозите, ги проверуваат условите за посебна истражна мерка и кога се исполнети критериумите, ги одобруваат, а Судот, независно и професионално, ги оценува доставените барања и ги проследува до МВР и Јавното обвинителство.“, образложи министерот Тошковски.
Министерот Тошковски ги објасни придобивките од овој процес кои се зголемување на брзината и ефикасноста на самиот процес, безбедноста на комуникацијата, намалување на можноста од човечка грешка а зголемување на транспарентноста и отчетноста на секоја фаза.
Тошковски објасни дека овој систем првин ќе биде имплементиран за подрачјето на Скопје, а следна фаза во целата држава.
Директорот на Бирото за јавна безбедност при МВР Александар Јанев во своето обраќање нагласи дека воведувањето на овој систем ќе го редефинира начинот на кој се доставуваат и разменуваат строго доверливи судски наредби – со фокус на посебните истражни мерки, согласно член 252, став 1, точка 1 од Законот за кривична постапка.
„Тоа што досега беше бавен и ранлив процес, со премногу раце и премалку отчетност, денес го претвораме во затворен, автоматизиран и безбеден дигитален систем, каде секој потег е евидентиран, секој документ е заштитен, а секоја минута е добиена – за акција, за вистината, за правдата. Овој систем е повеќе од технолошко решение – тој е вредносна одлука.“, истакна директорот Јанев.
Јанев го прецизираше процесот како ќе изгледа во пракса.
„Министерството за внатрешни работи ќе изготвува предлози за посебни мерки и ќе ги испраќа по електронски пат до обвинителството. Обвинителството ги разгледува и ги проследува до судот, кој потоа електронски ја носи одлуката. Судските наредби се враќаат – една до МВР, друга до ОТА – Скопје, во анонимизиран формат. Сè се одвива во заштитена дигитална средина – без хартија, без чекалници, без ранливи човечки алки.“, заврши директорот Јанев.