Македонија
АСОМ до пратениците: Реагирајте навреме и отфрлете го деструктивниот предлог-закон за игри на среќа

Асоцијацијата на спортски обложувалчици (АСОМ), заедно со Асоцијацијата на приредувачите на игри на среќа (АПИС), во придружба на дел од вработените во индустријата на игри на среќа, денес пред Собранието на РСМ, каде што на дневен ред на собраниска седница беше ставен предлог-законот за игри на среќа, испрати јасна порака до пратениците: да кажат НЕ на предлог-законот, кој ќе значи ликвидација на легалната индустрија на игри на среќа.
„Тука сме собрани за да испратиме сериозна и јасна порака, дека нема мирно да стоиме и да гледаме како државата го носи најдеструктивниот закон во историјата, кој ќе предизвика затворање на една легална индустрија и ќе им отвори широка врата на сивата економија и криминалот“, истакна Васко Илијевски, претседател на АСОМ.
АСОМ пред Собранието потенцираа дека во повеќе наврати апелирале до јавноста дека предлог-законот целосно го отфрлаат и го сметаат за неевропски, неуставен и монополски. Tие објаснија дека, за нив, апсолутно неприфатливи се предлог-измените, кои предвидуваат дислокација на објектите, забрана за приредување игри на среќа на интернет, зголемување на давачките и надоместоците, како и измените на законот, кои задираат во веќе постојните лиценци бидејќи тие значат колапс за нивната индустрија.
„Заедно сме тука со некои од нашите вработени, кои се загрижени за својата егзистенција и иднина, да испратиме апел до пратениците да кажат НЕ на овој катастрофален предлог-закон, кој ќе значи оставање на улица 10.000 луѓе, кои чесно заработуваат и придонесуваат за општеството. Новите предлог-измени и ќе предизвикаат непоправливи економски штети за целата држава, со тоа што на конец ќе им виси и работата на 54.000 граѓани, кои соработуваат со нашата индустрија“, потенцира Илијевски.
Според АСОМ, алармантно е тоа што државата во време на економска криза прави максимално деструктивен чекор и носи закон што ќе згасне легална индустрија, која во буџетот годишно носи прилив од 280 милиони евра.
„Сметаме дека овој предлог-закон е направен без соодветна анализа, истражување и користење факти и аргументи, со тенденциозно избегнување дебата преку злоупотреба на европското знаменце. Тука сме да кажеме дека од наш интерес е самата индустрија да напредува, а легислативата да се европеизира и дека ова што Владата го прави е спротивно на тоа“, порачаа од АСОМ.
Од Асоцијацијата истакнаа дека доколку целта на носење нов закон за игри на среќа навистина е заштита на младите, треба да се работи на едукација, додавајќи дека се целосно подготвени да помогнат преку финансирање и реализација на проекти и програми за едукација на млади.
„Дополнително, доколку сакаме да ги заштитиме младите од обложување, предлагаме да се зголемат казните за затекнато малолетно лице на уплатно-исплатните места на приредувачите и да се предвидат казни за родители или старатели на малолетниците, кои се затекнати на уплатните места“, рекоа од АСОМ.
Претставниците на АСОМ истакнаа дека тие се луѓе што сакаат да останат на своите работни места, каде што чесно заработуваат за своите семејства, додавајќи дека некои од вработените плаќаат кредити, а други се мајки што ја планираат иднината на своите деца, односно дека сите се луѓе што ќе бидат оставени без приходи во време на инфлација и економска криза.
„Вие пратениците во Собранието сте претставници избрани од народот и треба да работите во интерес на народот, немојте да подлегнете на притисоци, реагирајте навреме и отфрлете го овој предлог-закон, кој ќе предизвика непоправливи штети за целата држава“, порачаа од АСОМ.
Од Асоцијацијата истакнаа дека денешниот собир е симболичен приказ за нивниот став во однос на предлог-законот за игри на среќа и најавија дека доколку нивните апели не се слушнат, подготвени се на масовни протести и сериозна борба со цел да го спречат донесувањето на актуелниот предлог-закон.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
32-годишен скопјанец осомничен за разбојништво во Бучимци: маскиран и со ловечки нож ограбил соселанец

Јавен обвинител од Основното јавно обвинителство Скопје поведе постапка против едно лице осомничено за кривично дело – Разбојништво од член 237 став 4 во врска со став 1 од Кривичниот законик.
Осомничениот 32-годишен скопјанец, на 18 август, маскиран со маица со која си го покрил лицето и капа, преку незаклучена влезна врата влегол во домот на негов соселанец во селото Бучимци. Во рацете држел ловечки нож и кога во една од собите го затекнал сопственикот, му се заканил дека ќе го убие ако не му даде пари.
Оштетениот, исплашен за својот живот, извадил 4.000 денари од комодата, но го замолил разбојникот да му дозволи да задржи барем 1.000 денари, бидејќи му се неопходни.
Осомничениот се согласил и го напуштил местото со 3.000 денари кои противправно ги одзел од сопственикот.
Јавниот обвинител до судијата на претходна постапка достави предлог за определување мерка притвор за осомничениот, бидејќи постојат околности кои укажуваат на опасност од бегство, можност за влијание врз сведокот/оштетен со заплашување и уценување, како и можност да го повтори делото.
Македонија
Зголемена фреквенција на возила на граничните премини Табановце и Богородица

Поради пожар во националниот Парк Јасен, регионалниот пат Р1106 Македонски Брод – Скопје затворен е за секаков вид на возила, извести АМСМ.
Сообраќајот на државните патишта се одвива непречено, по суви коловози.
Интензитетот на сообраќајот на патиштата надвор од градските средини е зголемен. Поради летните одмори, се бележи зголемена фреквенција на возила, на ГП „Табановце“ времето на чекање за влез е околу 20 минути, за излез е околу 40 минути.
На ГП „Богородица“ времето на чекање за излез знесува околу 20 минути, додека на останатите гранични премини од македонска страна нема подолги задржувања при влез или излез од државата.
Македонија
Вицепремиерот Николоски во Будимпешта на прослава на Националниот ден на Унгарија

Вицепремиерот Александар Николоски на покана на премиерот на Унгарија, Виктор Орбан, присуствува на Националниот ден кој се слави во чест на Свети Стефан основачот на унгарската држава и христијанството во Унгарија.
Покрај учеството на прославата на националниот ден, предвидени се повеќе средби со високи претставници на владата на Унгарија, неколку министри и потенцијални инвестиции. На средбите е предвидено да се разговара за динамиката на проектите во Македонија како и за идната засилена економска соработка помеѓу двете држави.
Посетата на вицепремиерот е уште една потврда за одличното пријателство и соработката помеѓу Македонија и Унгарија, се додава во соопштението на Министерството за транспорт.