Македонија
(Видео) Бачев бара оставки на членовите на ДИК и рачно пребројување на гласовите
Претседателот на партијата Единствена Македонија, Јанко Бачев и предводник на коалцијата „Никогаш Северна-Само Македонија“ поднесе барање до ДИК за поништување на изборите одржани на 15 јули при што обвини за изборен фалсификат.Тој рече дека преку овој документ бара рачно пребројување на ливчињата и оставка на членовите на Државаната изборна комисија.
„Со Заклучокот на ДИК број 08 – 1966/1 од 16 јули 2020 е утврдено дека постојат 1.814.236 гласачи а гласале 942.334 гласачи. Ако од 1.814.236 гласачи се одземат 942.334 гласачи се добива бројката од 871.902 лица кои не гласале, што значи дека толку треба да биде бројката и на неупотребуваните гласачки ливчиња. Но, според напред наведениот заклучок на ДИК, бројот на неупотребуваните гласачки ливчиња изнесува 869.889 што значи дека недостигаат 2.013 ливчиња. Каде се!? Тука се, ама со нив е правен фалсификатот преку т.н. бугарски воз“, изјави Бачев.
Тој ја повика ДИК на одговорност и за бршењето на името од гласачките ливчиња на нивата коалиција „Никогаш Северна- само Македонија“. Според него недозволиво е бришењето името во последен момент пред печатењето на гласачкиот материјал, бидејќи при поднесувањето на листата во ДИК се заведени под ова име.
„Практично ние на изборите настапивме како безимен субјект без да се наведе покрај редниот број во гласачкото ливче и називот на нашите листи: „Никогаш северна – само Македонија“, како што било кај останатите учесници на изборите. Дотолку повеќе, дваесетдневната предизборна кампања ја водевме со називот „Никогаш северна – само Македонија“, така не препознаа бирачите, така не претставуваа и медиумите пред избирачите, а до самиот изборен ден и во изјавите од ДИК до јавноста бевме така најавувани. Но, во последен момент при печатењето на гласачките ливчиња се прави недозволиво бришење на називот на нашите листи: „Никогаш сверена – само Македонија“, изјави Бачев.
Според него недоволниот капацитет на оваа институција се темели и на фактот како што рече дека не ги распределила гласовите како што треба, а сомнеж во целиот процес на пребројување фрла и моментот со паѓањето на серверот на нивната веб-страна.
„После завршувањето на изборите и евидентирањето на гласовите од страна на ДИК, целата јавност виде дека од ДИК погрешно се распоредени дури 80.000 гласови. Патем, индикативно е што „падна“ менито/категоријата на веб-страната на ДИК – изборни резултати, која остана невидлива за јавноста при прикажувањето на резултатите како пристигнуваат од избирачките одбори, а веб-страната на ДИК во останатиот дел беше функционална, иако не може да падне само поддомејн/едно мени/категорија, а во останатиот дел веб-страната да остане функционална“, вели тој.
Што се однесува до приговорите кои ги поднесе оваа коалација, за бришењето на името и за увид во неважечките ливчиња, ДИК ги информирала дека сите приговори од политичките субјекти, вклучително и нивните ќе ги разгледува на првата седница која се очекува да ја закаже в понеделник. Доколку не се уважат нивните приговори, Бачев најави дека правдата ќе ја бараат пред надлежните судови.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Касами: Тетово ја заслужува оваа трансформација – продолжуваме уште посилно со Второто поглавје за развој
Градоначалникот на Тетово и кандидат за нов мандат, Билал Касами, порача дека големата поддршка што ја добил на 19 октомври покажала дека Тетово е на вистинскиот пат, дека градот се менува, трансформира и се развива.
„Тетово докажа дека ја цени работата и сака овој развој да продолжи уште посилно. Ние возвраќаме на ова признание со уште повеќе работа,“ изјави Касами.
Тој денес беше на улицата Поточка, заедно со улиците 134 и Прохор Пчински, кои, како што истакна, биле целосно асфалтирани според современи стандарди.
„Изградивме нова современа улица со должина од речиси еден километар и асфалтирана површина од околу 5.000 квадратни метри. Со инвестиција од приближно 200 илјади евра, односно околу 12 милиони денари, ја трансформиравме оваа населба во близина на градинката кај Поточка, давајќи ѝ европски изглед,“ нагласи Касами.
Тој додаде дека Тетово ја заслужува оваа трансформација и модерни патишта, училишта, градинки, базени и услови за функционален и чист град.
„Добрите дела за Тетово мора да продолжат уште повеќе, уште подобро, уште посилно — со Второто поглавје за развој,“ порача градоначалникот Касами.
Македонија
Димитриевски: Проблеми имало и ќе има, со посветена работа ќе ги решаваме без да застанеме
Изборот во недела е јасен. Куманово мора да има континуитет и да продолжи по истиот пат. Проблеми имало и ќе има, но јас како градоначалник ви давам збор – заедно со мојот тим и со Советот на општината со посветена работа ќе ги решаваме без да застанеме и само во интерес на граѓаните, порача вчера од граѓанскиот собир во кумановската населба Гоце Делчев, кандидатот за градоначалник на Куманово и лидер на Движењето ЗНАМ –За наша Македонија, Максим Димитриевски.
„За разлика од другиот кандидат кој се залага за ред, а на кого му дадов мандат во јавното претпријатие да направи ред, тој го остави без ред и нема една шајка заковано. Јас Куманово од најзадолжена општина со над 15 милиони евра, воведов ред во работењето и ја направив финансиски најстабилна. Ред не се прави со трчање и џогирање. Ред се прави со работа и со излегување во пресрет на луѓето. Да им кажеш јасно и децидно – овој проблем може да се реши веднаш, а другиот не може веднаш и да им дадеш рок до кога ќе се разреши. А, не да даваме лажна слика дека ќе направиме се. Па не живееме во Кувајт, не лежиме на нафта, туку живееме во скромна, но горда Македонија“, рече Димитриевски.
Тој ги увери жителите на населбата дека е еден од нив, дека тоа досега со работа многу пати и го покажал и докажал, за разлика од другите, како што ги нарече, мамини и татини синови кои сметат дека функциите им припаѓаат по наследство. Повика на обединување на сите граѓани во недела масовно да гласаат сите за број 2 и да го направат Куманово најперспективно место за живеење и најголем логистички центар на Балканот, што ќе го направи заедно со Премиерот Христијан Мицкоски – со кого успешно соработуваат и носат решенија како парнтери во Владата.
На присутните, меѓу кои симпатизери и подржувачи на ВМРО-ДПМНЕ, симпатизери и подржувачи на Движењето ЗНАМ – За наша Македонија, како и многу други локални жители, им се обрати и пратеникот од редовите на ВМРО – ДПМНЕ, Бране Петрушевски, кој им посочи на присутните дека во Куманово во недела има два избора – од кои едниот значи враќање назад со политиките на Оливер Спасовски и неговите „пајташи“ кои претходно го уништија градот на секаков можен начин и кои сакаат на голема врата повторно да го вратат ДУИ на власт и во игра. „И, затоа се обединивме сите, да ги поразиме. И, ги поразивме тие
политики, а ќе ги поразиме уште посилно сега. Затоа што од оваа страна имате логичен избор – го имате Максим Димитриевски и оваа наша коалиција која на 2 ноември не треба само да победи – туку и да ги прегази таквите стари и ретроградни политики. Затоа е потребна убедлива победа против нив кои со византиски игри по секоја цена сакаат да се вратат на власт“, нагласи пратеникот Петрушевски.
На присутните се обратија и претседателот на Општинскиот комитет на ВМРО-ДПМНЕ, Бобан Николовски, како и Претседателката на Советот на Општина Куманово и носител на листа на Движењето ЗНАМ – За наша Македонија Ивана Ѓорѓиевска кои, исто так, повикаа на масовна излезеност на вториот круг во недела, за голема победа на актуелниот градоначалник, Максим Димитриевски, што ќе значи – раст, развој и просперитет на Куманово.
Македонија
(Видео) Илјадници пластични шишиња во Вардар, од Министерството за животна средина велат виновни се слабите комунални услуги
Министерството за животна средина и просторно планирање соопшти дека појавата на пластичен и друг амбалажен отпад во реката Вардар и другите водотеци се должи на незадоволителното ниво на комунални услуги, особено во руралните средини. На ова претходеа видео снимки на кои може да се забележат илјадници пластични шишиња во реката.
Од ресорното министерство нагласуваат дека во овие подрачја е евидентно присуство на диви депонии на јавни површини, за чија санација и контрола се надлежни општините и нивните инспекциски служби.
Министерството и Државниот инспекторат за животна средина, како што се наведува, континуирано укажуваат преку ЗЕЛС на потребата од редовно следење на состојбите со управувањето со отпадот и засилено присуство на општинските инспектори на терен.
Во моментов, Државниот инспекторат е во фаза на подготовка на измени на Законот за инспекциски надзор во животната средина, со цел воспоставување единствен систем на инспекциски надзор што ќе овозможи поефикасна контрола во оваа област.
Министерството апелира до општините, комуналните претпријатија и граѓаните за заедничка одговорност и делување во насока на зачувување на чистотата на реките и водните текови.

