Македонија
Бачев: Русија не ни заби нож во грб, туку Иванов

Признавањето на новото уставно име од страна на Русија не е ништо невообичаено. Русија не ни заби нож во грб, Русија ги почитува одлуките и политиките на самите држави, а политиката на оваа власт е сојужништво со НАТО и ЕУ, вели за „Макфакс“ лидерот на Единствена Македонија, Јанко Бачев, по вчерашното признавање на новото уставно име, Северна Република Македонија, од страна на Русија.
Според Бачев, главна причина поради која Русија ја призна Македонија под новото уставно име е тоа што претседателот Иванов не го актуелизирал проблемот со името во Обединетите нации, како и недоволната ангажираност на самите граѓани против промена на уставното име.
„Ѓорге Иванов се плаши да го актуелизира прашањето во ОН. Русија не ѝ го сврте грбот на Македонија. Русија си ја цени својата политика, своите интереси, ние како Македонци не сме спремни сами да ги браниме нашите интереси, не видовме позначајни протести кои ќе ја спречат промената на името. Никој не треба да биде позагрижен за националните интереси колку сопствените граѓани, разочарување е и Иванов, кој беше молен од Русија да го актуелизира прашањето во ОН, но не го стори тоа“, вели Бачев.
Лидерот на Единствена Македонија истакна и дека во изминатиот период „прозападните“ медиумите намерно спинувале дека Русија со пушки и тенкови е подготвена да го брани името на РМ е со цел потоа да дојде до разочараност кај граѓаните дека Русија ѝ забила нож во грб на Македонија.
„За разлика од Америка, Русија не игра насилно туку го почитува меѓународното право. Признавањето на новото име е изненадувачки за обичниот народ бидејќи се створија преголеми очекувања, поради лажната надеж. Таа пропаганда успеа да ја оцрни и нашата идеја. Ние не сме руска, туку македонска партија која се бори за македонските интереси. Сакавме да покажеме дека во светот има други модели и дека не се завршува сè во Брисел и Вашингтон. Има други организации кои не нèнегираат. Како партија остануваме на нашите ставови, а тоа е стратешко партнерство со Русија“, рече Бачев.
Тој ги повика граѓаните на следните парламентарни избори да ја дадат поддршката за неговата партија ветувајќи дека доколку дојде на власт, веднаш ќе упати писмо до Москва за подобрување на односите бидејќи, како што вели, Русија тоа го очекува.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Филипче: Економијата е во пад, ништо од балканскиот економски тигар на Мицкоски

Претседателот на Социјалдемократскиот сојуз на Македонија, Венко Филипче, на граѓанската трибина „Се бориме за нашиот дом“, што се одржа во Струга, упати критика за економската политика на ВМРО-ДПМНЕ, која, како што рече, доведе до секојдневни негативни економски показатели.
Филипче посочи дека Владата на ВМРО ДПМНЕ не исполни ниту едно ветување за подобрување на економијата и на животниот стандард на граѓаните.
„Христијан Мицкоски ветуваше дека македонската економија ќе била „балкански тигар“, ветуваше повисоки плати, повисоки пензии, нови вработувања. Што гледаме денес? Платите се топат, сметките за струја, за парно растат. Животот на граѓаните е претворен во секојдневни калкулации што да купат, дали да купат или да платат сметките, односно како да го преживеат месецот“, рече Филипче.
Тој додаде дека инфлацијата и натаму ја јаде куповната моќ, а ветената минимална плата од 500 евра сè уште не е реалност.
„Барањата за минимална плата од 500 евра остануваат неисполнети. Само за Мицкоски платите биле доволно високи. За неговиот пулен Трајко Славески оваа сегашна плата и таа била многу. Регионот веќе оди напред, државите преземаат мерки за да си ги заштитат граѓаните. Албанија најави минимална плата од 520 евра, ние останавме на 400 евра“, рече Филипче.
Посочи дека секојдневно економските параметри поради лошите политики на власта се негативни. „Странските инвестиции се преполовени, статистиката регистрира пад на индустриското производство, за 2,6% е намален бројот на вработени во индустријата. Сето ова, како што кажа Филипче е доказ дека ВМРО ДПМНЕ ја доведе економијата до колапс, што е далеку од нивните ветувања. Со ВМРО-ДПМНЕ и на локално и на централно ниво, државата нема иднина, порача претседателот на СДСМ, Венко Филипче.
Македонија
Николоски: Автопатот Прилеп-Битола многу ќе значи за општина Могила, затоа што ќе се зголеми протокот на возила и ќе се подобрат условите за бизнис

Можам да најавам дека веќе во текот на овој месец, доколку временските услови не послужат, започнуваме со целосна реконструкција на улица АСНОМ, инвестиција вредна 170 илјади евра, вели потпретседателот на ВМРО-ДПМНЕ, Александар Николоски од денешниот народен митинг во Могила.
Тој додаде дека веќе се работи на водоснабдување на неколку населени места како Беранци, Долно Српци, Ивањевци, Попадинци и други коишто се приклучуваат на регионалниот водовод во Битола, која е инвестиција вредна 18 милиони денари.
Во однос на патната инфраструктура, Николоски ги наброја проекти вредни неколку милиони денари за кои веќе се потпишани договори со изведувачи на улици кои треба да се градат и реконструираат, каде што е предвидено изградба и на атмосферска канализација.
„Потпишани се веќе договори со изведувачи на улици коишто треба да се градат, како ул. Пелагонија во вредност од 12,3 милиони евра, којашто оди заедно со атмосферска канализација. Договор со изведувач е потпишан за реконструкција на улица Гоце Делчев и изградба на атмосферска канализација, во вредност од 8,1 милион денари. И исто во тек е рехабилитација на дел од парот Долно Српци до село Беранци во вредност од 5,4 милиони денари“, рече Николоски.
Посочи дека и во следниот период Владата предводена од ВМРО-ДПМНЕ, ќе продолжи да дава поддршка и за бројни други проекти кои ќе се работат во општина Могила и во другите населени места.
„Тоа се доказ дека сакаме да инвестираме, дека сакаме да работиме. А, доказ дека знаеме да завршуваме проекти се и завршените улици во цело Трновци, завршената реконструкција на улица Шемница и бројни други проекти кои заедно со градоначалникот ги работевме и ќе ги работиме. А тука е најкрупниот проект, изградбата на автопатот од Прилеп до Битола, најголема поединечна инвестиција во моментов во државата, 40 километри автопат, којшто многу ќе значи за општина Могила, затоа што ќе се зголеми протокот на возила, ќе се подобрат условите за бизнис. Сите оние коишто имаат имот покрај автопатот ќе добијат поголема вредност на имотот, а ќе се зголеми и протокот на туристи коишто ќе поминуваат оттука“, истакна Николоски.
Ги повика граѓаните на 19 октомври масовно да гласаат за број 9 и за ВМРО-ДПМНЕ.
Македонија
(Видео) Филипче: Да се избориме за држава што не е ничија приватна сопственост, туку заеднички дом со правила што важат за сите

Претседателот на СДСМ Венко Филипче вечерва во Струга рече дека богатството на Македонија е во соживотот, а вистински пример за соживот е Струга. Тој под слоганот „Се бориме за нашиот дом“ испрати пораки дека верува дека стружани знаат да ја изберат вистинската страна и да покажат дека подеднакво треба да се негуваат различните култури и традиции и дека секој човек заслужува убав и достоинствен живот.
„Нашиот дом не е само куќата во која живееме. Нашиот дом е нашата улица, нашето маало, нашиот град, нашата Македонија. И кога велиме „се бориме за нашиот дом“, тоа значи дека се бориме за достоинствен живот за секој граѓанин, за секое семејство, за секое дете. Нашата сила е во единството и заедно можеме да направиме промени. Денес повеќе од било кога, иднината е во рацете на вас граѓаните“ рече Филипче.
Тој на трибината зборуваше за состојбата на државата во која, како што беше речено, владата не понуди решенија за скапиот живот на граѓаните туку ги остави сами да се снаоѓаат како знаат и умеат. Држава без проекти и влада без резултати, затоа тој порача дека промени се неопходни, а сега е вистинското време тие да се случат.
„Да се избориме за држава што не е ничија приватна сопственост, туку заеднички дом со правила што важат за сите“, им порача Филипче на стружани.