Македонија
Бектеши се договори со маркетите: Од среда 50 прехранбени производи ќе бидат најмалку 10 отсто поевтини

Речиси 50 прехранбени производи од среда следната недела треба да поевтинат најмалку 10 %, најави министерот за економија, Крешник Бектеши, по денешната срдба со претставници на осум најголеми ланци супермаркети во земјата. Намалените цени ќе ги контролира Државниот пазарен инспекторат (ДПИ) со зголемен капацитет.
„Владата ќе ја усвои одлуката на редовна седница, која ќе се одржи во вторник. Од среда ДПИ со зголемен капацитет ќе биде на терен и очекуваме намалување од минимум 10 % на одредени производи, кои ќе ги објавиме во текот на наредната недела. Се зборува за над 50 основни прехранбени производи. Референтна цена ќе биде една од цените од претходните месеци“, рече министерот Бектеши.
Претставниците на супермаркетите биле согласни за намалување на цените на основните прехранбени продукти, а министерот Бектеши очекува овој пример на соработка да го следат и другите сектори.
Министерството за економија подготвува и дополнителни мерки.
„Мерките ќе бидат и за дистрибутерите и за производителите, кои, најверојатно, утре ќе бидат викнати на состанок во Министерството за економија. Најважно од сè е дека потрошувачите во нашата држава нема да се чувствуваат измамени“, рече министерот Бектеши.
За дополнително намалување на цените, Бектеши вели дека до крајот на следната недела ќе биде изготвено и новото законско решение за нефер трговски практики, со кое ќе се укинат над 20 % од одредени давачки во синџирот на трговија, почнувајќи од производството, па сè до малопродажбата.
Следната недела Министерството за економија, освен одлуките за намалување на основните прехранбени производи, ќе направи измени и дополнувања на Законот за Државниот пазарен инспекторат и ќе ги зголеми ингеренциите на ДПИ за да може да постапат веднаш, без да мора да поминат одредени постапки имајќи предвид дека треба да бидат експедитивни.
Одлуката за намалување на цените на прехранбените производи доаѓа по неколкукратните изјави на владините претставници дека супермаркетите, однесувајќи се нефер и неетички, ги креваат цените на прехранбените производи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Филипче: Македонија годинава ќе биде со најнизок економски раст во регионот

Претседателот на СДСМ, Венко Филипче, денеска беше во посета на Радовиш, каде што се сретна со граѓаните и разговараше за предизвиците со кои се соочуваат во секојдневниот живот.
„По десет месеци од новата власт, разочарувањето е големо. Цените продолжуваат да растат, платите стагнираат, а граѓаните сè потешко врзуваат крај со крај“, истакна претседателот на СДСМ, Венко Филипче.
Филипче нагласи дека СДСМ со месеци дава конкретни предлози и закони за раздвижување на економијата и зголемување на платите, но дека власта останува глува.
„СДСМ со месеци дава конкретни предлози и закони со кои ќе се раздвижи економијата и ќе се зголемат платите, но власта е глува. Со месеци предупредувавме дека економијата тоне, а денес таа потврда стигна и од проекциите на Светската банка. Македонија, за жал, оваа година ќе биде со најмал економски раст во регионот. Владата ветуваше дека ќе бидеме лидери во регионот, но очигледно ќе бидеме последни. Ова е резултат на погрешни економски политики, но и целосна негрижа за граѓаните“, изјави Филипче.
Во своето обраќање, тој подвлече дека СДСМ останува на страната на граѓаните и ќе продолжи да работи за подобар живот за сите
„СДСМ ќе продолжи да работи и нуди решенија, силно верувам дека граѓаните ќе ја препознаат искрената намера и чесните политики кои се наменети за подобар живот“, додаде претседателот на СДСМ.
Македонија
СДСМ: Тошковски мораше да го признае скандалот со братот на Стефковски – треба да си даде оставка

Откако СДСМ денеска го објави скандалот со братот на градоначалникот Стефковски со видео докази, Тошковски беше принуден јавно да го признае. Ниту ќе го признаел, ниту ќе бил било кој санкциониран за ова, иако јавна тајна е дека функционерите на ДПМНЕ се однесуваат како шерифи, а Тошковски тоа добро го знае, велат од СДСМ.
„Денешното признание на Тошковски потврдува две работи: прво, дека СДСМ изнесува вистини и, второ, дека функционерите на ДПМНЕ, нивните браќа, сестри и роднини не ги почитуваат законите, а Тошковски тоа го овозможува. Граѓаните не се наивни — да не објавеше СДСМ, Тошковски ќе го криеше и натаму скандалот“, велат од СДСМ.
Според нив, веќе не се ни бројат скандалите кои го тресат МВР.
„Владее хаос, своеволие кои допрва ќе излегуваат на виделина. Уште што треба да се случи за Тошковски да поднесе оставка? СДСМ ќе продолжи гласно да ја брани правдата, законитоста и интересите на граѓаните“, велат од СДСМ.
Македонија
Гаши засега ќе се воздржи од коментари за претседателката на Антикорупциска

Во врска со актуелните настани поврзани со претседателката на Државната комисија за спречување на корупцијата, Татјана Димитровска, од кабинетот на Претседателот на Собранието, Африм Гаши, велат дека тој засега ќе се воздржи од коментари, а ако наводите се потврдат во судска постапка, тој ќе иницира постапка за разрешување.
„Почитувајќи го начелото на презумпција на невиност и независноста на судските органи, Претседателот на Собранието се воздржува од какви било прерани коментари. Основен приоритет е да им се овозможи на надлежните институции да ја завршат својата работа без било какви притисоци или влијанија. Сепак, доколку наводите бидат потврдени низ судска постапка, Претседателот на Собранието ќе постапи без двоумење и ќе иницира соодветна собраниска процедура за разрешување“, се наведува во соопштението од Кабинетот на Африм Гаши.
Одговорноста за зачувување на кредибилитетот и интегритетот на институциите, велат од таму, е врвен приоритет и обврска која не трпи компромис.
Претседателката на антикорупциската комисија, Татјана Димитровска, е осомничена во дополнетата истрага за предметот „Адитив“. Таа се сомничи дека преку апликациите за пораки „Вибер“ и „Воцап“ му одавала службени тајни на друг обвинет за поведени постапки за отворање предмети и одлуки против сега обвинетите фирми и лица во предметот „Адитив“, како и податоци за проверка на имотот и на неговото семејство.
Покрај тоа што ѝ e одземен пасошот, Кривичниот суд определи и забрана за преземање одредени работни активности поврзани со кривичното дело, што подразбира дека осомничената не смее да има контакт со предмети, пошта и друга документација поврзана со работењето на ДКСК, а воедно не може да гласа и да распределува предмети.