Македонија
(Видео) Богдaновиќ: Не се откажуваме од мораториумот и по одлуката на Уставен суд

Во Општина центар се изненадени и разочарани од одлуката на Уставниот суд за времено укинување на мораториумот за градење. Градоначалникот Саша Богдановиќ вели дека нема да се откажат од мораториумот и нема да дозволат градбата да продолжи пред да се направат измени на спорните планови.
„Не можеме да изречеме повторно мерка мораториум оти во тој случај ќе треба да се распушти советот поради непочитување на Уставен суд, но разгледуваме други правни можности кои ни стојат на располагање за да се спречи градењето во Центар“ рече Богадоновиќ.
Според него не треба да се коментираат одлуките на уставен суд, но вели дека во дискусијата судиите укажуваат дека детален урбанистички план може да се замени само со нов детален урбанистички план, а тоа е токму она што го прави општина Центар во моментов.
Богдановиќ нагласи дека при крај е подготовката на поголем дел од деталните урбанистички планови. Тој тврди дека нема да дозволи да се издаваат одобренија за градење по одлуката на Уставниот суд.
„Со правниот тим од општината работиме на ново решение во моментов не можам да го соопштам, но јавноста навреме ќе биде информирана. Во оној момент кога официјално ќе ја добиеме одлуката од Уставен суд, ќе ги соопштиме нашите следни чекори“ рече градоначалникот Богадонивиќ, кој за одлуката на Уставниот суд засега се информирал само од медиумите.
Укинувањето на мораториумот ќе ја обврзе општина Центар, доколку не се преземат нови правни мерки, да издава одобренија за градење по плановите за кои има низа забелешки. Богдановиќ рече дека година ипол ги ревидираат криминалните планови од претходната власт. Тој рече дека сите планови ќе бидат подготвени во принцип на веќе изработените планови „Ново Маало“ и „Мирче Мацан“, каде се избришани згради и хотел, а нацртани се паркови.
Градоначалникот Богдановиќ апелираше Уставниот суд да ја преиспита одлуката за времената мерка, а коморите да го повлечат барањето.
Уставниот суд ја донесе одлуката по иницијатива на Стопанската комора на Македонија и на Стопанската комора на Северозападна Македонија. Градежните комори подолго време на јавни настани истакнуваа дека мораториумот во Центар му носи голема штета на градежниот бизнис.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Директорот на БЈБ: Безбедноста на ИКТ системите не е само техничко, туку стратешко и општествено прашање

Директор на Бирото за јавна безбедност при МВР, Александар Јанев учествуваше со свое излагање на 7. Западнобалкански дигитален самит кој се одржува во Скопје од кој Македонија испраќа силна порака за регионална соработка и заедничка дигитална иднина.
„Сајбер-нападите сè почесто ги таргетираат институциите, нарушуваат услуги и ја поткопуваат довербата во системот, па оттаму неопходно е постојано вложување во едукација, како на полициските службеници, така и на јавната администрација, со цел навремено препознавање и реагирање на сајбер-инциденти. Безбедноста на ИКТ системите не е само техничко, туку стратешко и општествено прашање, па во таа насока за надминувањето на предизвиците неопходна е регионална и меѓународна соработка, како и активно вклучување на приватниот сектор во развојот на иновативни решенија“, истакна директорот Јанев во своето излагање.
Јанев ги нагласи можностите и плановите за користење на вештачка интелигенција во полициското работење, со цел побрза и поефикасна обработка на податоци и навремено донесување одлуки.
„SOCTA 2025 потврдува дека сајбер-криминалот е во пораст и мора да остане висок безбедносен приоритет. Само преку координирана акција и споделена одговорност можеме да изградиме отпорен и безбеден јавен сектор“, потенцираше на крај директорот Јанев.
Македонија
Судскиот совет го разреши судијата Енвер Беџети, кој е на црната листа на САД

Судскиот совет го разреши судијата од Апелацискиот суд Скопје, Енвер Беџети, од функцијата. Инаку, тој во декември минатата година, заедно со поранешниот прв вицепремиер и министер за политички систем и односи меѓу заедниците, Артан Груби, беше ставен на црната листа на САД за примање мито и одолговлекување судски предмети поврзани со кривичното осудување на Сашо Мијалков, поранешниот директор на УБК.
Судскиот совет по спроведена постапка за утврдување на одговорност на судијата Енвер Беџети, на 26.05.2025 година донесе одлука за негово разрешување.
Беџети ја обжали одлуката, а Советот за одлучување по жалба при Врховниот суд на денешната седница донесе одлука со која го потврди решението на Судскиот совет од мај годинава.
Груби и Беџети лани беа ставени на црната листа на САД.
„Денешното назначување на Артан Груби и Енвер Беџети е доказ дека политичкото мешање во судството не може – и нема – да се толерира. Соединетите Американски Држави ќе продолжат да ги именуваат оние кои се вклучени во значителна корупција што ги поткопува демократските институции и ја нагризува јавната доверба. Никој не е над законот, а одговорноста е од суштинско значење за напредок“, рече тогаш американската амбасадорка, Ангела Агелер.
Македонија
Вработени во Општина Гази Баба организирале создавање и палење депонии, објави Арсовска

Општината Гази Баба и нејзиното јавно претпријатие се затекнати во незаконски активности кои директно ја загрозуваат животната средина и здравјето на граѓаните. Возила со општински ознаки, кои само пред една недела добија нови црвени таблици заради разграничување од комерцијалните, се затекнати во создавање диви депонии на подрачјето на Јурумлери, објави градоначалничката на Градот Скопје, Данела Арсовска.
Наместо да ја извршат својата законска обврска и да го исчистат просторот на Вардариште, додава таа, одговорните во општината самите организирале создавање на депонии.
Дополнително, вели Арсовска, дел од нив биле и запалени, со што е предизвикано сериозно загадување.
„Оваа практика претставува сериозен доказ дека дел од општинските структури активно учествуваат во создавањето и ширењето на диви депонии, а потоа свесно ги палат, со што предизвикуваат голема штета по животната средина и по квалитетот на воздухот. Потсетуваме дека ваквите активности се во директна спротивност со законските обврски на општините и претставуваат кривични дела за кои мора да следи соодветна одговорност“, вели Арсовска.
Таа ги повика сите надлежни органи веднаш да постапат согласно законските надлежности.