Македонија
(Видео) Манијакот пуштен на слобода доби условна осуда и ќе биде под надзор

Условна казна доби манијакот чија цел беа пет девојчиња жртви. Ваква одлука донесе судијката Љубинка Башевска. Таа посочи дека Сонер Арслан има потреба од лекарска помош. Го задолжи да добие поддршка и од стручни лица, но и го предупреди дека ако направи исто или слично дело, ќе заврши во затвор. Судијката Башевска ја изрече пресудата на првото рочиште, на кое обвинетиот призна вина.
„Многу размислував за сите настани и околности. Со оглед на тоа што во законот за секое дело поединечно е предвидена казна затвор или казна до една година, ги имав предвид возраста, семејната и материјалната состојба, извинувањето, каењето, сметам дека на човекот му треба помош, пред сè, лекарска. За секое од кривичните дела му одредуваме по пет месеци затвор. И вкупната е условна осуда со заштитен надзор. Тоа значи дека му утврдуваме казна затвор која нема да се исполни ако во рок од 5 години не стори ново кривично дело. Ова му се последна шанса и последен момент“, рече судијката Башевска.
Таа додаде дека врз него надзор ќе вршат служби од Кривичниот суд, како и тоа дали презема мерки за лекување.
„Ако го повторите делото или направите слично дело, ќе ја отповикаме условната осуда и ќе одите во затвор“, посочи судијката.
Судијката ја укина мерката куќен притвор. Обвинителката Лидија Раичевиќ претходно посочи дека Арслан петпати го сторил кривичното дело.
„Обвинението содржи опис на пет кривични дела за она што се случило на фактични план и предлог до овој суд кои докази да се изведат. Јавниот обвинител, освен што оваа содржина на поднесено обвинение, денес, без никакво сомнение, ќе ја докаже на начин како што е предложено во писмениот отправок, доколку за тоа се укаже потреба, ќе се впушти во докажување и градење впечаток на судот преку фазите на директно и вкрстено испрашување. Без никаков сомнеж, со највисок степен за осудителна пресуда, јавниот обвинител ќе го застапува обвинението“, рече обвинителката Раичевиќ пред признавањето вина.
Обвинетиот делата ги сторува во текот на повеќе години, а почнувајќи од 2021 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Филипче од Париз: Потребен е проактивен пристап и политички консензус за напредок кон ЕУ

Претседателот на Социјалдемократскиот сојуз на Македонија, Венко Филипче, во рамки на еднодневната работна посета оствари повеќе средби со високи француски политички претставници, на кои во фокусот на разговорите беа реформската агенда и предлог Резолуцијата на СДСМ, како гаранција за заштита на националните интереси и решение за деблокирање на преговите со ЕУ.
Филипче одржа работна средба со пратеничката и потпретседателка на групата за пријателство Франција – Северна Македонија во француското Собрание, Лилиана Танги, со шефот на Канцеларијата за соседство, проширување и одбрана при Генералниот секретаријат за европски прашања, Жозеф Жустиниани, како и со директорот за Континентална Европа при Министерството за Европа и надворешни работи, Брис Рокфеј и со специјалниот претставник за Балканот, Рене Троказ.
На состаноците беше истакната поддршката од Франција во процесот на евроинтеграција, но и потребата од брзи резултати во исполнување на обврските и работа на реформите.
Филипче ги презентираше позициите на СДСМ и истакна дека партијата има проактивен пристап и работи на решенија за деблокирање на евроинтеграцискиот процес. Тој нагласи дека во завршна фаза е подготовката на Резолуцијата, со која ќе се потврдат националните црвени линии – македонскиот јазик, култура и идентитет, како и механизми за справување со евентуални непринципиелни барања што излегуваат надвор од Преговарачката рамка.
Во разговорите беше потенцирано дека во Европската Унија постои јасен консензус за проширувањето, и дека тоа е можност која Македонија мора да ја искористи. Француските претставници пренесоа очекувања дека нашата земја треба да направи напредок во евроинтеграцискиот процес, како што тоа веќе го прават државите од регионот, особено Албанија и Црна Гора.
Македонија
Пожар на депонијата Дрисла, Ангелов смирува дека не е алармантно, но е сложено поради хемиските процеси

Пожар избувна на депонијата Дрисла.
Директорот на Дирекцијата за заштита и спасување, Стојанче Ангелов, рече дека пожарот не е алармантен, а скопската противпожарна бригада работи на негово гаснење.
Сепак, како што објаснува Ангелов, гаснењето на било која депонија е сложен процес поради хемиските и биолошките процеси кои се одвиваат во внатрешноста на депонијата како резултат на кои се создаваат запаливи гасови.
(Фото: илустрација, архива)
Македонија
Муцунски во Стразбур: Потврдена посветеноста за унапредување на демократијата

Министерот за надворешни работи и надворешна трговија, Тимчо Муцунски, во рамки на работната посета на Стразбур, денеска оствари одвоени средби со Генералниот секретар на Парламентарното собрание на Советот на Европа, Деспина Шацивасилиу, и со Вицегувернерот на Банката за развој на Советот на Европа (CEB), Томаш Бочек.
На средбата со Генералниот секретар Деспина Шацивасилиу беше потврдена посветеноста на Република Северна Македонија за унапредување на демократијата, владеењето на правото и човековите права, како и активното учество на нашата држава во рамки на Парламентарното собрание на Советот на Европа.
Со Вицегувернерот Томаш Бочек беше нагласена континуираната поддршка и конструктивната соработка со Банката за развој на Советот на Европа преку реализираните проекти на CEB во Северна Македонија. Воедно, беа разгледани конкретните можности за понатамошно продлабочување на оваа соработка во контекст на европската интеграција и регионалната стабилност.