Лидерот на ВМРО-ДПМНЕ, Христијан Мицкоски, не даде јасен одговор на новинарско прашање дали го поддржува договорот со Бугарија, по објавеното видео од страна на бугарскиот премиер Бојко Борисов, на кое тој му вели дека нема дилема оти го поддржува договорот за добрососедство со Бугарија.

„Нашиот став е познат, тој е непроменет, многу пати повторен во минатото и како политичка партија, како ВМРО-ДПМНЕ. Мојата изјава што ја рефлектирав вчера беше дека ВМРО-ДПМНЕ и јас лично поддржуваме сè што е добро и за Македонија и за Бугарија. Имавме контруктивна средба со господинот Борисов, разговаравме за изградба на автопатишта, железничка пруга, железничко поврзување помеѓу двете земји. Разговаравме за енергетско поврзување, продлабочување на научната соработка помеѓу универзитетите од двете држави, разговараме за побрзо интензивирање и отворање на граничниот прекин Клепало. И сето она што значи добро и за граѓаните на Македонија и за граѓаните на Бугарија.

Истовремено на средбата стана збор и за резолуцијата што се однесува на негирање на посебноста на македонскиот јазик, ликот и делото на Гоце Делчев и тоа не е добро, тоа не можам да го поддржам и никогаш нема да го поддржам, македонскиот јазик е кодифициран и меѓународно признат во 1977 година, тука немаме дилеми, ниту, пак, јас, ниту, пак, ВМРО-ДПМНЕ. Така што она што е добро а ги поврзува македонските граѓани и граѓаните на Бугарија го поддржуваме, она што е спротивно на интересите на македонските граѓани и Македонија ние не можеме да го поддржиме, како што е прашањето поврзано со македонскиот јазик, ликот и делото на Гоце Делчев итн.

Но, забележлива е нервозата кај владата во заминување, кај премиерот во заминување, господинот Заев, па потрчаа оние скапо платени пи-ар пера да ја искриват вистината и  да рефлектираат лажни вести во македонската јавност. Она  што е важно е дека и оваа лажна вест им се распрсна како меур од сапуница. Тие нека продолжат да измислуваат лажни вести, а ние ќе продолжиме да работиме“, вели Мицкоски.