Македонија
(Видео) Пресуди за „Трезор“: Мијалков осуден на 8 години затвор, а бегалецот Грујевски на 15 години

Првообвинетиот и ексдиректор на УБК, Сашо Мијалков, е осуден на осум години казна затвор во случајот „Трезор“.
Во отсуство поради бегство, пресуда е донесена и за поранешниот началник на Петтата управа во МВР, Горан Грујевски, кој доби 15 години затвор.
На второобвинетиот, како и поранешниот шеф на неговиот кабинет, Тони Јакимовски, изречена му е казна затвор од пет години. На поранешниот помошник-министер во МВР, Небојша Стајковиќ, судот му изрече затвор во траење од пет години.
„Судот се убеди дека обвинетите ги сториле кривичните дела што им се ставаат на товар. Умислено ги сториле кривичните дела, а договорите биле склучени во корист на ‘Финзи’ ДООЕЛ Скопје. Сведокот Јордан Камчев ги потврди околностите дека бил сопственик на ‘Финзи’ ДОО САД, кој рече дека Жарко Луковски сакал да ја преземе и да работи со компанијата, па ја затворил пред 10 години. Обвинетиот Сашо Мијалков ги потврди блиските релации што ги имал со Јордан Камчев. Судот ја ценеше и одбраната на другите обвинети“, рече судијката Џенета Бектовиќ.
Четворицата се прогласени за виновни бидејќи судот цени дека тројцата го сториле кривичното дело злоупотреба на службената положба и овластувањата, а Тони Јакимовски е осуден за помагање.
Според обвинението, во овој случај се злоупотребени над 860 илјади евра.
„Сите заедно ја искористиле службената положба и овластувањето. Тони Јакимовски им помогнал и прибавиле имотна корист и му нанеле имотна штета на буџетот на РМ. За да набават опрема за потребите на УБК/МВР, прво-, второ- и третообвинетиот оствариле состанок со претставниците на ГАМА во Обединето Кралство и набавиле опрема за потребите на УБК. Во текот на подготовките за набавка на опремата одлучиле опремата да ја набават преку фирмата ‘Финзи’ ДООЕЛ Скопје. Договорено било набавката да се изврши преку ова лице, кое Жарко Луковски и Сашо Мијалков го користеле за реализација на зделки. Обвинетите Сашо Мијалков и Горан Грујевски усно му наложиле на Ѓоко Поповски да почне со постапка за набавка на опрема од ‘Финзи’ ДООЕЛ Скопје. Тој изготвил покана, а од ‘Финзи’ ДООЕЛ Скопје испратиле понуда. Од страна на службите на УБК е изготвен договор од УБК/МВР за купување на опремата. Потоа, склучен е договор за купопродажба. Иако немало потреба за одржување на телекомуникациската опрема, било направен допис до МВР дека е потребно да се одржува набавената опрема и тоа да продолжи да го прави ‘Финзи’ ДООЕЛ Скопје. Доставена е покана до фирмата, а тие испратиле понуда со спецификација за временски период од две години. Помеѓу МВР и ‘Финзи’ е склучен договор за извршување услуги за да му се плаќа авансен паушал“, рече судијката Бектовиќ.
Во завршниот збор Обвинителството истакна дека наместо МВР да направи директна набавка на електронско-комуникациска опрема за потребите на Петтата управа при УБК од фирмата ГАМА од Велика Британија како најекономичен начин, тие договориле набавката да се изврши преку друга фирма посредник – „Финзи“ ДООЕЛ Скопје, со што успеале да злоупотребат средства од буџетот на државата.
Поранешниот директор на УБК, Сашо Мијалков, обвинет во случајот „Трезор“, според неговата одбрана, во јули 2010 година во Лондон не договарал набавка на опрема за потребите на УБК. Адвокат Љупчо Шврговски во своите завршни зборови му предложи на судот да донесе ослободителна пресуда за неговиот клиент тврдејќи дека јавните обвинители не го докажале обвинението.
Случајот „Трезор“ го води судијката Џенета Бектовиќ, а застапник на обвинението е ОЈО за организиран криминал, кое го презеде предметот од поранешното СЈО.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Кино сала, театар: Aеродромци за првпат ќе добијат културен центар

Општина Аеродром го добива првиот мултифунционален центар каде аеродромци ќе можат да уживаат во концерти, кино-проекции, мултимедијални проекции, театарски претстави, ликовни изложби, конференции и голем број други настани, соопштија од општината.
Мултифунционалнит центар се наоѓа во непосредна близина на СЦ „Марко Божиновски“ во Ново Лисиче и ќе претставува место со кое ќе се збогати културниот и социјалниот живот на жителите.
Станува збор, како што појаснуваат надлежните, за целосна реконструкција и комплетно уредување на простор од околу 1500м2.
„Општина Аеродром со овој проект аплицираше на повикот на Владата и доби 99 милиони денари за првата фаза од реконструкцијата.
Со реконструкцијата овој простор ќе биде целосно оплеменет. Покрај главна сала – гледалиште, ќе опфаќа и фоаје, бифе и едукативни простори-работилници. Исто така, ќе биде изграден и лифт со што ќе се реши пристапноста до содржините на мултимедијалниот центар за сите категории граѓани.
Гледалиштето во главната сала ќе има над 240 места за седење и дополнителен ред прилагоден за лица со посебни потреби во колички.
Општина Аеродром го добива својот прв мултифункционален центар со поддршка од Владата и од Министерството за култура и тиризам. Овој проект е од круцијално значење, затоа што аеродромци за првпат ќе добијат културен центар, што ќе внесе посебен и нов импулс во нивниот културен-забавен живот“, се истакнува во информацијата.
Македонија
Од септември ќе се наплаќа паркирањето во Реонски и во Ново Лисиче, ЈП „Градски паркинг“ подготвен за бележење на зоните

Најдоцна од крајот на септември паркирањето ќе се наплаќа и во Реонски центар и во Ново Лисиче, каде сега паркирањето е бесплатно. Градоначалникот на Општина Аеродром, Дејан Митески, вели дека за да почне наплата се чека одобрување на проектот.
„Зонското паркирање го управува и менаџира ЈП Градски паркинг – Скопје меѓутоа во координација сме со нив. Зонското паркирање во Реонски центар ќе почне паралелно со зонското паркирање во Ново Лисиче. Општината изготви проект, се чека одобрување на проектот од Град Скопје и Министерството за внатрешни работи по што веднаш ќе се спремни за бележење и поставување на информативни табли. Очекувам дека во наредниот месец до два, најдоцна до крајот на септември дека ќе почне да функционира во Ново Лисиче и во Реонски центар“, рече денес градоначалникот Митески.
Жителите на Ново Лисиче и Реонски центар бараа едновремено да почне наплата на паркирањето за да се избегне трупање во возила на местото во кое подоцна ќе биде воведено зонското паркирање. Тие постојано се жалат дека паркирањето во овој дел од градот станува невозможно за резидентите оти на паркинзите пред зградите паркираат и автобуси и комбиња и автомобили на луѓе кои работат во други општини во Скопје, каде што паркингот се наплаќа.
Македонија
Изминатиов викенд 1.148 сообраќајни прекршоци на територија на цела држава

Во деновите од изминатиот викенд (26./27.07.2025) како резултат на редовните сообраќајни контроли што ги реализираат полициските службеници од сите сектори за внатрешни работи на патиштата низ земјава, од вкупно 1148 издадени платни налози 128 прекршоци се однесуваат на возачи кои што учествувале во сообраќајот без возачка дозвола, а пак кај 115 возачи при извршен алкотест било утврдено недозволено количество алкохол и тие се исклучени од сообраќај, додека 46 возачи на моторцикли се санкционирани заради неносење на заштитен шлем.
Инаку согласно одредбите од Законот за безбедност на сообраќајот на патиштата дури 458 прекршоци во текот на викендот се однесуваат на непочитување на пропишаната брзина на движење, 175 за недозволено паркирање, додека пак прекршочно се казнети уште 28 лица кои некористеле сигурносен појас, 17 заради користење мобилен телефон при возење, тројца возачи минале на црвено светло, а прекршочни санкции добиле и двајца пешаци и тројца возачи на електричен тротинет.
Исто така, согласно Законот за возила, 31 возило било отстрането заради тоа што биле нерегистрирани, а три возила се исклучени заради техничка неисправност.
„Сообраќајните контроли продолжуваат и во наредните денови. Апелираме до сите учесници во сообраќајот да ги почитуваме сообраќајните правила и прописи и заеднички да придонесеме за побезбедни патишта“, велат од МВР..