Македонија
ВМРО-ДПМНЕ: Заев да одговори дали пред да се сретне со Тил Силберстин го провериле неговото досие
Владиниот кабинет наместо за средби со инвеститори, служи за средби на Зоран Заев со сомнителни ликови со дебели досиеја, инволвирани во меѓународни скандали, оценува ВМРО-ДПМНЕ осврнувајќи се на разговорите на премиерот со комичарите.
„Пораките од Заев до лажниот Порошенко кои беа објавени во медиумите покажуваат дека тој во владата одржувал средби со Тал Силберстин, човек инволвиран во скандалот поради кој падна владата на Себастијан Курц во Австрија, земја која е докажан пријател на Република Македонија. Покрај тоа, Силберстин со кого Заев се фали дека се среќавал е човек против кого се водат криминални процеси во Израел и Романија и тоа за перење пари, поткуп, попречување на правда како и за нелегално организирање финансирање на политички изборни кампањи. Воедно неговото име како обвинет се среќава и во Гвинеја каде се вели дека за случајот со Романија учествувал во поткуп на претседателот заедно со други лица се стекнале со рудник вреден милијарди долари“, велат од ВМРО-ДПМНЕ преку соопштение.
Опозицијата бара од Заев да одговори дали пред да се сретне со Тил Силберстин го провериле неговото досие и знаеле со каков човек имаат работа. Јавноста треба да знае што барал ваков човек на средба во владата на Република Македонија.
„Колку пати Заев се среќавал со него и дали постојат записници од тие средби? Зошто Заев се среќавал со човек против кој се водел процес дека добил 400.000 евра за пропаганда со лажни вести? Дали го користел за да му креира лажни вести за референдумот или за време на претседателските избори? Колку пари овој човек ги чинеше македонските граѓани за неговите услуги?“, прашува ВМРО-ДПМНЕ.
Партијата додава дека во оваа влада на Заев не постојат никакви безбедносни протоколи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Видео) Џафери: Груби ниту е Влада, ниту е партија
Ниту Европскиот фронт, ниту ДУИ не повикуваа, ниту мотивираа на бојкот, беше оставено на слободната волја на граѓаните да ја изразат на гласачкото место, кажа премиерот Талат Џафери на денешната прес-конференција.
Во однос на бојкотот на Артан Груби, на вториот круг на претседателските избори, Џафери кажа дека неговиот став е индивидуален и дека не став ниту на Владата, ниту на партијата.
„Индивидуалните ставови не можат да се претставуваат како генерални ставови на субјектот. Груби ниту е Влада, ниту е партија. Јас имав изјава како премиер на избирачкото место и потврдив дека ги земав двете ливчиња и гласав. Индивидуалниот став не е општ став по кој може да се извлече заклучок. Нека си е министер, индивидуа е во однос на Владата, не е став на Владата, ниту на партиски органи. Индивидуално може да каже што сака, тоа е слобода и на мисла и на изразување“, одговори Џафери и додаде дека не може да се повикува на одговорност.
Македонија
Главчев: Се надевам дека Северна Македонија ќе ја продолжи европската перспектива, повеќе нема да правиме отстапки
Се надевам дека Северна Македонија ќе ја продолжи својата европска перспектива. Од наша страна, немаме каде да правиме повеќе отстапки. Згора на тоа, позицијата што ја имаме е паневропска позиција.
Ова го изјави вршителот на должноста премиер на Бугарија, Димитар Главчев по победата на кандидатот на ВМРО-ДПМНЕ Гордана Силјановска-Давкова на претседателските избори во Северна Македонија, јави „БГНЕС“.
„Да почекаме да видиме каква влада ќе се формира во Северна Македонија“, рече привремениот премиер.
Главчев додаде дека Бугарија нема повеќе да прави отстапки во однос на пристапните преговори на РСМ во ЕУ и ставот што го имаат е паневропската позиција.
„На нашите пријатели од Северна Македонија мора да им биде јасно дека ако не ги почитуваат барањата за прифаќање членство во ЕУ, тоа нема да функционира“.
Македонија
Џафери не кажа дали е подготвен да оди во опозиција: Тоа е прашање кое зависи од исходот на преговорите за состав на нова влада
По отчетот за 100 – те дена техничка влада, техничкиот премиер Талат Џафери вели дека е фокусиран на обврските од сегашната влада чиј мандат се уште трае. На новинарско прашање дали е подготвен да оди во опозиција со оглед на неколкуте изјави на лидерот на ВМРО-ДПМНЕ, Христијан Мицкоски, дека нема да преговара за коалиција со Демократската унија за интеграција, Џафери не даде конкретен одговор.
„Јас сум премиер и размислувам за мандатот што треба да го завршам. Тоа се прашања на органите на партијата и во тој контекст да завршат преговорите, другото е прашање на исходот од преговорите за состав на нова влада“, рече техничкиот премиер Џафери.
Немаше конкретен одговор ниту на прашањето дали граѓаните треба да очекуваат тој да добие уште еден мандат како премиер оти неговата матична партија е дел од коалицијата која освои 19 пратенички мандати.
„Јас сум фокусиран на обврските на составот на Владата што ја водам, впрочем мандатот на оваа Влада е до избор на нова. Работата на конфигурацијата на новата влада е работа на преговори на политичките субјекти кои што добиле мандати во Собранието по изборите одржани на 8 мај. По тоа прашање треба да се очекува резултат од таму“, рече Џафери.
На парламентарните избори во средата коалицијата „Европски фронт“ на ДУИ освои 19 мандати, а нивниот опонент во албанскиот блок, коалицијата ВЛЕН доби 13 мандати.
Лидерот на ВМРО-ДПМНЕ кои освоија 58 мандати во Собранието, по изборите кажа дека преговара со ВЛЕН за состав на новата Влада