Македонија
Грковска: Образованието да развива одговорни граѓани, со свест за најважните теми во општеството

„Уште на самото основање на овој Форум, решивме дека младите треба да бидат наши партнери, затоа што се клучните агенти на промена, затоа што ова се теми кои задолжително треба да бидат приоритет во нивниот активизам и затоа што сите наши напори всушност целат кон подобра иднина на генерациите што доаѓаат’’, изјави заменичката на претседателот на Владата задолжена за политики за добро владеење, Славица Грковска, на втората панел дискусија на тема „Негување на интегритетот: Искоренување на корупцијата во и преку образованието“, во рамки на конференцијата организирана од Форумот на жени лидери од ЈИЕ за добро владеење и антикорупција, во соработка со UN Women.
Свои ставови и размислувања на панелот споделија и Далиборка Улјаревиќ, извршна директорка на Центарот за граѓанско образование од Црна Гора, Наим Рашити, извршен директор на Балканската група за истражување на политики од Косово, Владимир Георгиевски, претставник на канцеларијата за регионална младинска соработка-RYCO, Анита Николовска, извршна директорка на младинската организација „Младите можат“ и Ардита Секнај, генерална секретарка на Меѓународната стопанска комора на Албанија.
На панелот се дискутираше за клучните проблеми со кои се соочуваат младите во регионот, со осврт на корупцијата, како една од главните причини за големата миграција. Во фокус се стави потребата од модернизирано образование, кое ги вградува вредностите како етика, интегритет, еднаквост и одговорност и сите останати принципи на доброто владеење. Во однос на образованието, беше истакнато дека се неопходни драстично поголеми инвестиции во овој сектор, затоа што на сите земји од регионот им е неопходно јакнење на човечките капацитети на сите нивоа, за да може да се спроведат процесите на трансформација и интеграција. Панелистите се осврнаа и на коруптивните практики во образовниот систем, вклучително и на сексуалната изнуда и злоупотреба како родово заснована форма на корупција.
Надоврзувајќи се на ставовите дека младите се презаситени од конфликти и корупција и поради тоа не се заинтересирани за вклучување во општествените работи и текови во своите земји, вицепремиерката Грковска заклучи: „Градењето демократско општество со одговорни граѓани бара континуиран влог, континуиран напор и едукација, особено во еден ваков геополитички контекст, кога непријателите на демократијата ги користат сите расположливи оружја за да ја нарушат довербата во демократскиот концепт на уредување“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Скопје
Скопје ќе оживее со 100 мурали, Шукова најавува урбана револуција во градот

Кандидатката на СДСМ за градоначалничка на Скопје, Каја Шукова, денеска го претстави амбициозниот проект „Скопје – град на мурали“, кој предвидува создавање на 100 нови мурали низ градот во првата година од нејзиниот мандат. Проектот има за цел да ја трансформира урбаната средина и да го врати животот во запуштените јавни простори, соопштија од Центарот за комуникации на СДСМ.
„Скопје е дом за сите нас и сакаме да го гледаме чист, убав и инспиративен“, истакна Шукова.
Таа додаде дека многу јавни површини денес изгледаат занемарено, со хаотични графити кои ја нарушуваат естетската слика на градот.
Проектот ќе овозможи современа уметност да ја разубави урбаната средина, но и да пренесе пораки за култура, надеж, заедништво и љубов кон градот.
„Овие мурали нема да бидат само боја на ѕидовите, туку симбол на нашите вредности и заеднички дух“, изјави Шукова.
Во изработката ќе бидат вклучени локални уметници и млади креативци, со што се поддржува домашната уметничка сцена и се стимулира активно граѓанско учество. Кандидатката нагласи дека уметноста може да биде моќен инструмент за обединување и создавање на пријателска, одржлива и инспиративна урбана средина.
„Со заеднички напори, ќе го направиме Скопје поубаво и место на кое секој ќе се гордее“, заклучи Шукова.
Скопје
Таксистите добиваат 200 електрични возила, Меџити го претстави проектот кој ќе го чисти воздухот

Првиот заменик на претседателот на Владата и министер за животна средина и просторно планирање, Изет Меџити, денес на работен состанок со Унијата за здруженија на таксисти го претстави проектот за субвенционирање на првите 200 електрични возила за таксисти, како дел од напорите на министерството за почист, потивок и поефикасен урбан транспорт за граѓаните на Скопје и целата држава.
„Овој проект претставува конкретен и значаен чекор кон трансформација на урбаниот транспорт и е дел од стратегијата за борба против загадувањето на воздухот и подобрување на квалитетот на урбаниот живот“, истакна Меџити.
„Возилото што денес го претставуваме е електрично, со високи еколошки стандарди, без штетни емисии, без бучава и со висока енергетска ефикасност“, додаде тој, нагласувајќи дека овие возила во неколку фази ќе ги заменат постојните кои користат дизел, бензин или гас – носејќи значителни придобивки за граѓаните, таксистите и животната средина.
Меџити информираше дека просечната цена на едно електрично возило е 28.000 евра, а Министерството ќе субвенционира 15% од сумата, односно околу 840.000 евра за првите 200 возила.
„Според еколошките експерти, замената на овие возила ќе резултира со намалување од над 2.700 тони CO₂ годишно, што е еквивалентно на садење на повеќе од 120.000 садници. Дополнително, ќе има значително намалување на урбаната бучава, особено во густо населени зони“, нагласи Меџити.
Тој додаде дека Министерството веќе ја иницирало програмата „Car Sharing“ со првите 100 електрични возила за јавна употреба, како и воведување на електрични тротинети и велосипеди во неколку градови.
„Во соработка со Европската Унија преку програмата ‘EU for Clean Air’, реализирана е донација од 6 електрични автобуси за Град Скопје, се зголемени капацитетите за мониторинг на квалитетот на воздухот и се засадени десетици илјади садници низ целата земја“, заклучи Меџити.
Македонија
Левица застана зад независниот Зоран Николовски во Битола

Партијата Левица денеска објави дека на престојните локални избори ќе застане зад независниот кандидат за градоначалник на Битола, архитектот Зоран Николовски.
„Чест ни е да ја најавиме широката и победничка платформа за Битола со која Левица ќе настапи на престојните локални избори. И официјално ја информираме јавноста дека Левица ќе го поддржи најдобриот избор за кандидат за градоначалник на Битола – архитектот Зоран Николовски, како докажан професионалец и човек кој може да се пофали со проектите во својот роден град“, стои во соопштението од партијата.
Од Левица потенцираат дека Битола, како бастион на нивната партија, заслужува силен кандидат кој ќе донесе свежи идеи и промени.
„Веруваме дека поддршката за кандидатот Зоран Николовски претставува авангардна комбинација која ќе донесе нови решенија и развој за Битола“, нагласуваат од таму.
Платформата, според Левица, ќе биде составена од интелектуалци и професионалци кои целото свое знаење ќе го стават во служба на градот.
„На овие избори настапуваме со јасна визија за нашата Битола, во која ги обединуваме прогресивните и компетентни потенцијали. Создаваме платформа на интелектуалци и професионалци кои ќе работат за една идеја – Битола. За една света идеја – Битола“, порачаа од Левица.