Македонија
Грковска: Сите надлежни институции треба да го исполнат својот дел од задачата за да имаме ефикасен систем отпорен на корупција

Детална анализа на наодите од последниот извештај на Европската комисија во делот на оценување на состојбата со корупцијата во Северна Македонија беше главна точка на денешната седница на Меѓуресорското тело за координација на активностите против корупцијата, со која претседаваше заменичката на претседателот на Владата задолжена за политики за добро владеење, Славица Грковска.
Претставниците на институциите кои се дел од ова координативно тело се осврнаа на наодите и препораките во извештајот на ЕК и информираа за тековните и идните чекори кои ги преземаат во рамки на своите надлежности.
Посочувајќи дека извештаите на Европската Комисија секогаш даваат реална слика, Грковска истакна дека сите институции треба сериозно да ја сфатат својата задача и да дадат директен придонес за во најкраток можен рок да се унапредат состојбите во однос на справувањето со корупцијата.
„Целта треба да ни е иста на сите. Да имаме ефикасен систем отпорен на корупција и влијание, систем кој функционира непристрасно, затоа што тоа го очекуваат граѓаните. Нема преку ноќ радикални промени, но мора, што е можно побрзо, секој во делот на своите ингеренции да го направи тоа што е потребно“, истакна Грковска.
Во таа насока, на состанокот беа донесени заклучоци до 15 декември да се направи пресек на законските решенија кои се изготвени, но се заглавени во собраниска процедура, пресек на потребните дополнителни измени на законски и подзаконски акти од оваа област, да се дефинираат конкретни активности на краток, среден и долг рок за секоја институција, кои практично ќе претставуваат акциски план за работата на Меѓуресорското тело, како и да се изготват критериуми за транспарентност во користењето на донаторските средства и на кредитираните проекти.
На седницата учествуваа и претставници на граѓанскиот сектор, кои во својство на набљудувачи ја следат работата на Меѓуресорското тело.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Шукова и Мојсова на пазарот во Тафталиџе: Ги слушнавме од прва рака проблемите на пазарџиите

Кандидатката за градоначалничка на Скопје од СДСМ, Каја Шукова, денес го посети пазарот во Тафталиџе заедно со Маја Мојосова, кандидатка за градоначалничка на општина Карпош.
„Денес бевме на пазарот во Тафталиџе заедно со Маја Мојосова, нашата кандидатка за Карпош. Ги слушнавме од прва рака проблемите на пазарџиите,“ изјави Шукова.
Таа посочи дека условите за работа се лоши, особено при екстремно високи температури.
„На вакви пеколни температури тешко се седи цел ден на тезга, немаат услови, но мораат да бидат таму. Работат напорно, чесно, и заслужуваат подобри услови за работа.“
Клучното барање кое било истакнато од страна на продавачите е јасно:
„Најчестото барање што го слушнавме беше едноставно – затворен пазар со нормални услови за работа.“
Во таа насока, Шукова истакна дека решението е веќе дел од нејзината програма.
„Во мојата програма имам конкретни проекти за затворање и модернизација на градските пазари. Пазарите ќе бидат живи, безбедни и функционални простори и за продавачите и за купувачите.“ – изјави Шукова.
Македонија
Муцунски во Истанбул се сретна со турскиот министер за надворешни работи

На маргините на состанокот на Балканската платформа за мир, министерот за надворешни работи и надворешна трговија, Тимчо Муцунски, денеска во Истанбул оствари средба со својот турски колега, министерот за надворешни работи, Хакан Фидан.
На средбата се разговараше за унапредување на билатералните политички односи, зајакнување на економската соработка и искористување на инвестициските можности. Соговорниците се осврнаа и на продлабочување на соработката во други области од заемен интерес.
Двајцата министри го потврдија силното пријателство меѓу двете држави, тесната соработка во рамките на НАТО, како и заемната поддршка во мултилатералните организации. Разговорите опфатија и актуелни регионални и геополитички прашања, со акцент на важноста од стабилен и просперитетен Балкан.
Средбата се одржа во рамки на првиот состанок на Балканската платформа за мир, иницирана од министерот за надворешни работи на Република Турција, Хакан Фидан.
Македонија
Големиот пожар кој избувна попладнево во близина на Струмица е под контрола

Големиот пожар кој избувна попладнево во близина на Струмица меѓу Градските гробишта и селото Баница и зафати огромна површина и со голема брзина се ширеше кон месноста Софилар и куќите во тој дел на градот е ставен под контрола, објави директорот на Дирекцијата за заштита и спасување (ДСЗ), Стојанче Ангелов.
Според него, големиот и црн чад излегува од склад во чиј двор од пожарот се зафатени гуми, а пожарникарите не дозволуваат пожарот да се шири кон селото Баница, градот и викендички во овој простор.
-Пожарот се движи во неколку насоки и има големи шанси да биде ставен под целосна контрола. На едно место навлезе делумно во Гробиштата во Струмица, зафати неколку квадратни метри и тука е запрен. Нема потреба од вознимереност и паника. Струмичките пожарникари побараа помош од соседните противпожарни единици, а доаѓаат и два „пинцгауери“ на ДЗС, а во случај на лош развој на настаните ќе упатиме и „ер трактори“. Во овој момент нема таква потреба, иако едниот „ер трактор“ превентивно е упатен кон Струмица, рече Ангелов во изјавата за медиумите објавена од местото на пожарот.
Соред командирот на ТППЕ Струмица, Александар Гудев, се работи за пожар од големи размери, кој засега го гаснат 30 пожарникари и 10 возила, а побарана е помош од пожарникарите од Валандово и вклучување на хеликоптер.
Од СВР Струмица попладнево упатија апел до граѓаните да не се движат во делот зафатен со пожар, а лицата кои се затекнати таму веднаш да го напуштат подрачјето.