Македонија
ДИК: До 9 часот гласале 94.167 граѓани

Во првите два часа од гласањето на десеттите по рад парламентарни избори на гласање излегле 5,19 отсто од запишаните гласачи во Избирачкиот список односно 94.167 гласачи. Право на глас имаат 1.814.263 граѓани запишани во Избирачкиот список.
Државната изборна комисија соопшти дека одѕивот до девет часот е од 2326 избирачки места.
Најголем одѕив имало во Кривогаштани каде на гласање излегле 13,1 % од гласачите, а најмал одѕив е забележан во Липково, 0.93%.
„Во првата изборна единица одѕивот до 9 часот е 6,58 отсто. Најголем одѕив има во Аеродром 10,13 отсто, а најмал во Студеничани – 1,81 отсто. Во изборната единица два одѕивот е 4,58 , со тоа што најголем бил одѕивот во Ѓорче Петров – 8,05 , а најмал во Липково 0,93 отсто. Во изборната единица три одѕивот е 6,1 отсто, најголем одѕив има во Крива Паланка 8,31 отсто и Пробиштип 10,25 отсто. Во изборната единица пет одѕивот е 5,22 отсто. Во оваа изборна единица најголем одѕив има во Кривогаштани – 13,01 отсто, а најмал во Центар Жупа 1.01 отсто. Во изборната единица шест одѕивот е 2,50 отсто, најголем бил во Јегуновце 4,17 отсто, а најмал одѕив во оваа изборна единица има во Врапчиште 1,39 отсто“, соопшти Адмир Шабани, портпарол на Државната изборна комисија.
Тој не ги соопшти резултатите од изборната единица четири. Сите 3480 избирачки места се отворени навреме и гласањето се одвива без проблеми.
Шабани информираше дека во понеделникот гласале 723 граѓани позитивни на Ковид -19 и во изолација.
Од вкупно пријавени 8.852 болни, немоќни и хронично болни гласале 8.325 односно 94, 04 отсто.
Во 13 затвори од 1.657 запишани во избирачкиот список гласале 1.272 односно 76,76 отсто.
Во 17-те старски домови од 357, гласале 234 избирачи односно 80,62 отсто.
Шесте внатрешно-раселени лица не гласале.
Порпаролот Шабани потсети дека гласањето се врши со заокружување на редниот број со пенкало во сина боја. Тој ги повика граѓаните кои сметаат дека им е прекршено избирачкото право во било која фаза од изборниот процес да понесат приговори до општинските изборни комисии кои треба да им помогнат во пополнувањето на апликацијата и да им одговорат.
За сите прашања поврзани со гласањето активен е бесплатниот број 0800 555 44 на кој граѓаните можат да постават прашања или да остават коментар за ДИК.
„На овој број граѓаните што ќе се јават ќе мора да остават податоци за да може ДИК да им одговори“, рече портпаролот Шабани.
За лицата со оштетен говор и слух отворена е линијата 076 488 360 каде што имаат можност на знаковен јазик преку видео повик да постават прашање и да добијат одговор во врска со изборниот процес.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Непречен сообраќај по влажни коловози низ државата

Сообраќајот на државните патишта се одвивa непречено, по влажни коловози, извести АМСМ.
Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Без струја дел од Гази Баба

Од ЕВН Македонија АД известуваат дека денеска без електрична енергија ќе останат:
– во периодот од 09.00 до 12.00 часот, корисниците од улица Трубарево – крак 2, општина Гази Баба.
Македонија
Променливо облачно со повремени врнежи од дожд

Времето денеска променливо облачно со повремени врнежи од дожд, пообилни во источните делови (над 15 l/m2). Ќе дува слаб до умерен ветер од северен правец.
Минималната температура ќе биде во интервал од 4 до 10, а максималната ќе достигне од 12 до 17 степени.
Во Скопје, променливо облачно со повремени врнежи од дожд. Ќе дува слаб до умерен ветер од северен правец. Минималната температура ќе се спушти до 9, а максималната ќе достигне до 16 степени.
Во сабота времето ќе биде променливо облачно со сончеви периоди и со услови за локална појава на нестабилност со пороен дожд, грмежи и засилен ветер.
Во недела ќе има брз продор на студена воздушна маса од север и врнежи од дожд, на планините и на повисоките места од снег.
Ќе дува засилен северен ветер, температурите значително ќе опаднат и врнежи од снег се очекуваат и во некои од пониските места.
Во понеделник наместа ќе провејува слаб снег, а утринските температури на повеќе места ќе бидат негативни.