Македонија
(Видео) ДКСК ќе проверува корупција кај пет судии, меѓу кои Вангеловски, Лаличиќ и Панчевски

Претседателот на Врховниот суд, Јово Вангеловски, поранешната членка на Судскиот совет, Александра Зафировска, судијката Сафија Лаличиќ, Светлана Костова од Вишиот управен суд и поранешниот претседател на Кривичниот суд, Владимир Панчевски, се под лупа на антикорупциската комисија. Комисијата ќе утврдува дали постои злоупотреба и коруптивни дејства кои евентуално ги сториле судиите преку проверка на нивните анкетни листови за имотната состојба и доставените изјави за интереси.
Ова доаѓа кога беше објавен извештајот на Стејт департментот на САД за човековите права за 2018 година, каде што, меѓу другото, беше посочен специјалниот извештај на СЈО за судиите што дозволиле политиката директно да се вмеша во судството.
Членот на Државната комисија за спречување на корупцијата, Софка Пејовска, на денешната седница изјави дека тие не може директно да се преземат чекори за подобрување на судскиот систем, но може да придонесат во рамките на нивните надлежности.
„Тоа е можноста да ја испитаме имотната состојба на луѓето од правосудниот систем, кои долго време се спомнуваат како дел од нешто што е критикувано. Верувам дека доколку нешто откриеме, ќе бидеме дел од мозаикот за подобро судство“, рече таа.
Инаку, во извештајот на Стејт департментот се цитираа делови од извештајот на СЈО за посочените судии.
„На 14 септември канцеларијата на специјалниот обвинител поднесе посебен извештај за судиите од незаконските прислушувања во 2008-2015 година, а се посочува и извештајот за електронската распределба на предмети според АКМИС-системот додека со Кривичниот суд раководеше судијата Владимир Панчевски. Во извештајот е наведено дека помеѓу 2011 и 2015 година четворица судии биле инволвирани во флагрантно кршење на интегритетот, независноста, стручноста и злоупотребите“.
Претседателот на Врховниот суд, Јово Вангеловски, според извештајот, споделувал клучни информации за активни случаи со политичарите и функционерите за судењето.
„Поранешната претседателка на Судскиот совет, Александра Зафировска, се консултирала со високи владини претставници за избор на политички лојални или подобни судии дека кривичната судијка Софија Лаличиќ ги следела наредбите на УБК и сериозно го прекршила етичкиот кодекс на судиите, а управната судијка Светлана Костова истовремено работела и како судија и била вработена во УБК“, пишува во извештајот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Полицијата казнуваше и денес, откри 96 сообраќајни прекршоци

Одделението за безбедност на патниот сообраќај при СВР Скопје денеска во периодот од 08:30 до 16:00 часот спроведе зајакната акциска контрола во делот на сообраќајот на територијата на град Скопје.
При контролата санкционирани се вкупно 96 учесници во сообраќајот, од кои изречена е 41 мерка за возење со брзина поголема од дозволената, 15 санкции за возачи на мотоцикл кои управувале без заштитна кацига, четири мерки за возење без возачка дозвола, две санкции за возење мотоцикл без поседување на дозвола со соодветна категорија, две мерки за малолетни лица за управување мотоцикл кои при тоа немале положено возачки испит за познавање на сообраќајните знаци и правила на сообраќајот, а едно лице било приведено во полициска станица за утврдување на идентитет за сторен сообраќаен прекршок по член 211 поради непочитување на знаци и наредби од полициски службеници и 31 мерка по други сообраќајни прекршоци, соопшти МВР.
Сообраќајните контроли продолжуваат и во наредните денови. Полицијата апелира до сите учесници во сообраќајот да ги почитуваат сообраќајните правила и прописи и сите заеднички да придонесат за подобри, посигурни и побезбедни патишта.
Македонија
ДУИ: Власта целосно го отстрани Европското досие на земјата

Демократската Унија за Интеграција изразува сериозна загриженост за погрешниот правец во кои Власта ја води државата, за што граѓаните сѐ погласно бараат ново политичко преиспитување.
„По клучните прашања од стратешки интерес, Власта се соочува со целосен пораз на приоритетите кои самата ги престави како државен интерес, што несомнено треба да резултира со предвремени парламентарни избори
Водени од популистичките мотиви во пресрет на претстојните локални избори, Власта целосно го отстрани Европското досие на земјата и можноста за продолжување на преговорите со ЕУ.
Во популистичките емотивни настапи, Премиерот не само што ја отфрла можноста за дополнување на Уставот со внесување на неколку малцинства, туку јавно се фали и го посочува како највисок политички успех на земјата изигрувањето серија од Ерга омнес обврскитете кои произлегуваат од Стратешките договор со Грција или Преспанскиот договор. Тоа само укажува дека јавниот притисок што го создаваат изборите целосно ја оттргнаа оваа Влада од Европското досие, или како што самите го нарекоа Приоритето број еден“, велат од ДУИ.
Власта со своите постапки ги прави сите напори за дерогирање на механизмите кои прозлегуваат од Охридскиот рамковен договор, што, пак, претставува сериозно наручување на мултиетничкиот карактер на државата – најсилниот и најважен темел на долгорочната стабилност и просперитет.
„Недостатокот од преговори, во исто време ѝ овозможи на Власта целосно да го зароби правосудниот систем, да го стави во лична и партиска фунција, и на јавна сцена да ја демонстрира дисциплина и надвластување и врз Јавното обвинителство, и врз Судската власт.
Оваа неприродна состојба создава јасна и недвосмислена потреба кај граѓаните за политичко преиспитување на Власта.
На државата ѝ е потребна долгорочна политичка стабилност што единствено може да се обезбеди преку одржување на предвремени парламентарни избори заедно со локалните.
Тоа ќе создаде и простори без изборно соочување од неколку години, што ќе им овозможи на политичките елити да влезат во суштински политички процес за спас не европското досие на земјата и фаќање на последната можност за приклучок назад на европскиот пат заедно со Албанија и Црна Гора“, додаваат од ДУИ.
Македонија
Таравари отиде во Турција каде ги посети пациентите од трагедијата во Кочани

Министерот за здравство Арбен Таравари денеска ја посетил болницата „Чам ве Сакура“ во Истанбул, каде што се лекуваат двајца од младите повредени во пожарот во Кочани.
-Во оваа болница првично биле примени шест пациенти, од кои четворица сега се пуштени на домашно лекување откако им се подобрила здравствената состојба. Двајцата преостанати пациенти, Мартин и Борис, се во стабилна состојба и продолжуваат со закрепнувањето, се наведува во соопштението.
За време на посетата Таравари, придружуван од претставници на Конзулатот на Македонија во Истанбул, се сретнал и со родителите на пациентите и изразил „поддршка и солидарност во овие тешки моменти“.
-Тој изрази посебна благодарност до д-р Мустафа Туран и конзулот на Северна Македонија во Истанбул, Идриз Фазлиоски, за покажаната грижа и посветеност. „Свежата болка на Кочани е донекаде ублажена од Мартин и Борис, кои се подобри и наскоро ќе ги пречекаме дома. Ви благодариме, драга Турција, за целата грижа и гостопримство, нагласил Таравари.
Министерот за здравство вчера во Едрене, Турција, учествувал и се обратил на Балканскиот здравствен бизнис-форум при што соопштил дека 165 пациенти од Македонија во 2024 година биле лекувани во здравствени установи во Турција.