Македонија
Заев: Различностите на нашето општество ги сметаме за наша предност

Како земја ги поставуваме темелите на интеркултурното разбирање и докажуваме дека можеме да бидеме модел за успешно и функционално општество еднакво за сите, порача премиерот Зоран Заев, на меѓународната конференција „Кон концептот за едно општество и интеркултурализам“, во организација на канцеларијата на претседателот на Владата на Република Северна Македонија и Мисијата на ОБСЕ во Скопје, која денеска се одржа во Скопје.
„Интеркултурализмот е тесно поврзан со вредности, како владеењето на правото, човековите права, демократијата, културата на мир и дијалог, заемното почитување, родовата еднаквост, како и европскиот идентитет. Различностите на нашето општество ги сметаме за наша предност и ќе продолжиме позитивно да ги користиме, да ги учиме нашите поколенија дека солидарноста, толерантноста и недискриминацијата по сите основи се придобивките што може само да нè поврзуваат, а не да нè делат“, нагласи премиерот Заев во своето обраќање.
Министерот за надворешни работи, Никола Димитров, како домаќин на конференцијата потенцира дека кога нема правда, кога владее корупција и кога економијата назадува, сите се оштетени.
„Колку повеќе ќе се обединиме за вредностите што ги унапредуваат еднаквоста и интеграцијата на општеството преку интеркултурна толеранција и дијалог – толку посилна ќе ни биде нацијата. Во изминатиот период покажавме дека имаме капацитет да споделуваме и да извезуваме стабилност и добри вести и во регионот, но и надвор од него преку силна политичка посветеност и лидерство за надминување на отворените прашања со соседите, но и за смело носење со домашната реформска агенда, а секако во насока на обезбедување подобро утре на сите нашите граѓани“, истакна министерот Димитров.
Шефот на Мисијата на ОБСЕ, амбасадорот Клеменс Која, во Скопје истакна дека ОБСЕ ѝ помага на земјата да ги отповика трендовите на разделби и да ги зајакне своите капацитети за градење едно општество за сите.
„Јас навистина ги потврдувам и поддржувам напорите на канцеларијата на премиерот да ја развие и имплементира оваа стратегија“, додаде амбасадорот Која.
Ламберто Заниер, висок комесар на ОБСЕ за национални малцинства, во своето обраќање истакна дека му честита на премиерот Заев и на Владата за изработката на оваа стратегија, која во свет во кој има толку многу поделби врши промоција на политики што имаат цел спојување и кохезија и промовираат стабилност.
„И овој основен принцип е во суштината на мојот мандат“. Интеграцијата е двонасочна улица и ги зголемува правата во општеството на етничките заедници. Спроведување на оваа стратегија и на Охридскиот рамковен договор ги елиминира сите разделни линии по етничка основа. Успехот на едно општество се гледа во успехот на интеграцијата. Северна Македонија не смее да има сегрегациски училишта и една од целите на мојата канцеларија е да се воведе и интеграција во образованието“, рече во своето обраќање високиот комесар на ОБСЕ за национални малцинства, Ламберто Заниер.
Шефот на Делегацијата на Европската Унија во Република Северна Македонија, Самуел Жбогар, се осврна на смелоста на Владата за донесување на оваа стратегија во која не може да има едно општество доколку индивидуалните етнички и културни права не се почитуваат.
„Оваа стратегија е обид да се трансформира едно општество за да се обезбедат еднаквост, правда и можности за сите. Европската Унија дава екстензивна политичка и финансиска поддршка во имплементацијата на Охридскиот рамковен договор. Потребна е силна заложба од сите, визија и ангажман заедно со невладиниот сектор да се формираат политики што ќе функционираат на терен. Природата на процесот е константна работа“, додаде Жбогар на меѓународната конференција „Кон концептот за едно општество и интеркултурализам“, во организација на канцеларијата на претседателот на Владата на Република Северна Македонија и Мисијата на ОБСЕ во Скопје, која денеска се одржа во Скопје.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЦУК: 35 пожари низ државата во изминатото деноноќие – четири сè уште активни

Центарот за управување со кризи информира дека во изминатото деноноќие се евидентирани вкупно 35 пожари на отворен простор низ државата. Од нив 4 се активни, 4 се под контрола, а 27 изгаснати.
Како што известија од ЦУК, активни се пожарите во:
Василево – с. Нивичино (нискостеблеста шума)
Македонски Брод – с. Грешница (мешана шума и ниска вегетација)
Прилеп – помеѓу с. Царевиќ и с. Смолани (мешана шума и ниска вегетација)
Липково – с. Виштица (деградирана шума)
Под контрола се пожарите во:
Велес – с. Џидимирци – с. Крушје – с. Иванковци (мешана нискостеблеста деградирана шума)
Дојран – с. Николич (нискостеблеста шума)
Демир Хисар – градска депонија (депонија)
Македонски Брод – с. Црешнево, с. Локвица, с. Крапа (дабова шума, грмушки и ниска вегетација)
Изгаснати пожари се евидентирани низ Ранковце, Куманово, Липково, Кратово, Тетово, Свети Николе, Битола, Штип, Делчево, Скопје (Аеродром, Шуто Оризари, Ѓорче Петров, Гази Баба, Илинден), Росоман и други општини.
Македонија
Сончево и топло со мала до умерена локална облачност, од утре многу топло време

Сончево и топло со мала до умерена локална облачност. Ќе дува слаб до умерен ветер од северoзападен правец.
Минималната температура ќе биде во интервал од 10 до 19, а максималната ќе достигне од 29 до 37 степени.
Во Скопје, сончево со мала до умерена облачност. Ќе дува слаб до умерен ветер од северен правец. Минималната температура ќе се спушти до 17, а максималната ќе достигне до 37 степени.
Под влијание на топла воздушна маса од југ, од утре следува период на сончево и многу топло време со мала до умерена облачност. Особено топло време се очекува во текот на следната работна седмица, кога дневната температура насекаде ќе биде над 30°C, на повеќе места ќе надминува 35°C, а наместа ќе биде и над 40°C.
Македонија
Филипче: ВМРО-ДПМНЕ да каже дали имаат сериозен план за одблокирање на европските интеграции

Претседателот на Социјалдемократскиот сојуз на Македонија, Венко Филипче, во одговор на новинарско прашање, во врска со изјавата на премиерот Мицкоски за поднесување заедничка резолуција со Бугарија во Европскиот парламент за македонскиот јазик, посочи дека вакви сериозни прашања се дискутираат како предлог во Собранието, каде што учествуваат сите политички партии.
„Сметам дека е крајно несериозно такви сериозни предлози да се даваат од обични прес – конференции. Премногу е сериозно и важно прашањето да биде само предмет и обид за некаков дневно политички партиски интерес од страна на ВМРО ДПМНЕ. Сметам дека треба да се направи како предлог во Собранието бидејќи е нешто во што треба да учествуваат сите политички партии. Доколку има таков сериозен предлог ние апсолутно ќе го ќе го поддржиме“, рече Филипче.
Посочи дека ВМРО ДПМНЕ должат пред јавноста да образложат каков план имаат за одблокирање на евроинтеграциите.
„ВМРО-ДПМНЕ треба да каже дали имаат сериозен план, дали имаат сериозен план за дипломатска активност, дали имаат сериозен план за одблокирање на европските интеграции“, рече претседателот на СДСМ, Венко Филипче.