Македонија
Ковачевски им вети на борците: Македонија има херои на новото време, ќе го исполниме аманетот на партизаните и нема да дозволиме чекор назад

Премиерот Димитар Ковачевски на Сојузот на борците од НОВ и на сите македонски граѓани им вети дека ќе го исполни аманетот на партизаните и ќе го оствари и осигура посакуваниот напредок на земјата. Ветувањето го даде денес на промоцијата на монографијата „Сојуз на борците од НОАВМ и граѓаните (1948-2023)“.
„Како што за вас во Втората светска војна немало пречка и сте истрајале во предизвикот да имаме самостојна и независна Република Македонија, така и мојата генерација ќе истрае и ќе имаме европска Македонија. Авторите и сите вклучени во монографијата во воведното обраѓање, прочитав, порачуваат ‘верувајте во своите предци и запомнете дека ниту една борба не е засекогаш завршена. Историјата се повторува, а секое време бара свои херои’. Јас ви ветувам на сите вас и на сите македонски граѓани дека овој аманет ќе го продолжиме. Република Северна Македонија има херои на новото време и нема да направиме ни чекор назад. На напредокот на нашата родна земја работиме и по партизанскиот аманет, посакуваниот напредок ќе го оствариме и ќе го осигураме“, рече премиерот Ковачевски.
Во буџетот за 2024 година првпат ќе има ставка за Сојузот на борците и уште сега, како што рече премиерот Ковачевски, се одвоени 1,2 милион денари за нивните активности.
Автори на монографијата се Љубица Јанчева и Александар Литовски. Изработката на монографијата е поддржана од Министерството за култура како музејска дејност и претставува прва соработка со Сојузот на борците.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Делови од Ѓорче Петров и Чучер Сандево денеска без струја

Регионалниот центар за управување со кризи на Град Скопје, по добиеното известување од ЕВН, информира дека поради планирани зафати во електро дистрибутивната мрежа, денеска без напојување со електрична енергија ќе останат:
· од 09:00 до 13:00 часот, објектите на Полициската Станица и базата на БППЗ во Ѓорче Петров, општина Ѓорче Петров;
· од 09:00 до 15:00 часот, корисниците од дел од нас. Кисела Јабука, општина Ѓорче Петров;
· од 09:00 до 16:00 часот, корисниците од селата: Побожје, Бродец, Танушевци, Брест и Малино, општина Чучер Сандево;
· од 11:00 до 13:00 часот, корисниците од дел од ул. Кадињача, општина Ѓорче Петров.
Македонија
Утрото ведро и посвежо, преку денот сончево со температура до 27 степени

Утрото ќе биде ведро и посвежо, преку денот сончево со мала до умерена локална облачност. Ќе дува слаб до умерен ветер од северен правец. Минималната температура ќе биде во интервал од 0 до 7, а максималната ќе достигне од 19 до 27 степени.
Во Скопје, сончево со слаб до умерен ветер од северен правец. Минималната температура ќе се спушти до 5, а максималната ќе достигне до 27 степени.
Времето во наредниот период
Во четврток попладне и во петок ќе има услови за локален краткотраен дожд и ретки грмежи. Ќе дува умерен северен ветер. Во деновите од викендот ќе биде стабилно, сончево и топло со мала до умерена облачност, а од почетокот на следната седмица се очекуваат повремени врнежи од дожд и појава на грмежи.
Македонија
Партиите од ВЛЕН отсега ќе делуваат како еден политички субјект

Коалицијата ВЛЕН известува дека „денес е направен првиот чекор кон целосно политичко обединување, со заедничка визија и обединета структура, како единствена сила што ја претставува надежта, достоинството и иднината на Албанците во оваа земја“.
„На денешниот состанок беше формирано Заедничкото Претседателство на ВЛЕН, како прв орган што ќе ги координира сите политички и организациски активности на коалициско ниво.
Од денес стапува во сила мораториум на јавните активности на политичките партии учеснички во ВЛЕН, при што сите активности и настапи ќе се реализираат исклучиво под името, логото и единственото претставување на ВЛЕН.
Во наредниот период ќе се формираат и другите заеднички органи, вклучително и Раководството на ВЛЕН и Шефот на Изборниот штаб, кој ќе ја води подготовката за претстојните избори.
Пратеничката група на ВЛЕН ќе продолжи да функционира со актуелните пратеници кои го поддржуваат процесот на обединување и се посветени на јакнење на заедничкиот глас на Албанците“, велат од ВЛЕН.