Македонија
Ковачевски: Стопроцентно сум на страната на ССМ, да им се врати Работничкиот дом
Премиерот Димитар Ковачевски рече дека фрлил доволно лопати за време на двегодишниот мандат, во време на најголемата светска криза, во одговор за новинарско прашање.
„Во време на најкризната година, 2023, имаме двојно поголеми директни странски инвестиции од 2016 година. Двојно повеќе од некои што работеле кога немало никаква криза“, рече Ковачевски.
Во однос на прес-конференцијата на ССМ за Работничкиот дом, кој со одлука на Врховниот суд е одземен од работниците и ѝ е даден на државата, премиерот рече дека е стопроцентно на страната на работниците и на ССМ.
„Јас сум член на Синдикатот од 1999 година и сум стопроцентно на страната на ССМ, на страната на работниците. Да живее Синдикатот, да живеат работниците и работниот народ на Република Северна Македонија“, рече Ковачевски и додаде дека за таа одлука треба да се прашаат оние што ја донеле, а тоа е судот.
„Никогаш не коментирам судски одлуки, меѓутоа јас сум на страната на ССМ, да им се врати Работничкиот дом“, додаде премиерот.
Во однос на предлозите за министри за техничката влада, Ковачевски рече дека СДСМ веќе ги објавил своите предлози со одлука на Централниот одбор на партијата.
За средбите меѓу претставници на СДСМ и на партијата на косовскиот премиер, Ковачевски рече дека тие се сестрински партии и комуникацијата што ја имаат е на ниво на Партијата на европските социјалисти.
„Партијата на премиерот на Косово, Аљбин Курти, и СДСМ се сестрински партии во рамките на Партијата на европските социјалисти, комуникацијата што ја имаме е на ниво на Партијата на европските социјалисти. Во тој капацитет беше и средбата што се одржа во Приштина помеѓу генералните секретари на партиите и секретарите за меѓународна соработка“, одговори премиерот Ковачевски на новинарско прашање.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Денес свечено примопредавање на претседателската функција
Во Кабинетот на претседателот денес ќе се одржи официјална церемонија на примопредавање на функцијата Претседател со највисоки државни и воени почести.
По свечената церемонија новоизбраната претседателка Гордана Силјановска Давкова и досегашниот претседател Стево Пендаровски чијшто мандат истекува денес, предвидено е да остварат тет-а-тет средба.
Државната изборна комисија вчера и’ го издаде уверението за избран претседател на Гордана Силјановска-Давкова. Во текот на денешниот ден таа пред пратениците во Собранието ќе даде свечена изјава.
Скопје
Посебен режим на сообраќај во Скопје
СВР Скопје ги известува граѓаните на Скопје дека од 08.30 часот до 10.30 часот, поради одржување на улична трка, од страна на Единицата за безбедност на патниот сообраќај при СВР Скопје ќе бидат преземени мерки за посебен режим на сообраќај и тоа по сообраќајниците по кои ќе се движат натпреварувачите, кои имаат стартна позиција на бул.„Илинден“–локација Фонтана, ќе се движат по бул.„Илинден“ до крстосница со ул.„Никола Парапунов“, потоа до крстосница со бул.„Партизански одреди“, десно (кон населба Ѓорче Петров) до мостот Влајко, каде што вртат полукружно и назад по истиот коловоз до крстосницата со ул.„Љубљанска“, каде вртат полукружно и по истиот коловоз се враќаат назад на ул.„Никола Парапунов“ и по бул.„Илинден“ до целта на локација Фонтана на бул.„Илинден“.
СВР Скопје апелира до граѓаните да ги почитуваат наредбите што ги издаваат полициските службеници по сообраќајниците каде што ќе се одвива настанот.
Македонија
Сончево време, попладне со зголемена облачност и температура до 26 степени
Времето претпладне ќе биде сончево со умерена облачност. Попладне наместа ќе има зголемена облачност со краткотраен пороен дожд и услови за ретки грмежи. Ќе дува слаб до умерен ветер од северозападен правец. Минималната температура ќе биде во интервал од 5 до 11, а максималната ќе достигне од 19 до 26 степени.
Во Скопје сончево со умерена, а попладне зголемена облачност. Ќе дува слаб до умерен ветер од северен правец. Минималната температура ќе се спушти до 9, а максималната ќе достигне до 24 степени, јавува УХМР.
Во следните денови времето ќе биде променливо облачно со сончеви периоди. Во попладневните часови ќе има локална појава на нестабилна облачност со пороен дожд и грмежи, особено во вторник, кога дневните температури ќе опаднат за неколку степени.