Македонија
Криминалот и корупцијата стануваат официјална политика, велат од ЦК на ВМРО-ДПМНЕ
Вчеравечер Централниот комитет на ВМРО-ДПМНЕ одржал седница на која се разговарало за актуелната политичка ситуација, при што донеле заклучок дека Македонија тоне на економски план, а со тоа, сите се соочуваат со колапс.
„Неспособноста на СДСМ се рефлектира со катастрофални резултати кои одат на товар на граѓаните. Порастот на бруто домашниот производ на крајот на годината не е ниту во позитива, што уште еднаш докажува дека Владата е заталкана и води погубни економски политики. Владеењето на правото е загрозено и воопшто не се подобрува ситуацијата со правосудниот систем. Веќе четврти месец се во притвор уставобранителите, а осудените криминалци кои ги ослободија СДСМ шетаат на слобода“, велат од ЦК на ВМРО-ДПМНЕ.
Според нив, криминалот и корупцијата во државава стануваат официјална политика, а полицијата не презема никакви чекори за справување, а со тоа велат дека Македонија е рекордер во падот на листата на интернационалната Транспаренси и се наоѓа во друштво на земји од централна Африка.
„После девет месеци владеење, граѓаните се сведоци на десетици лаги и неисполнети ветувања од предизборниот период. Со секој изминат ден се потврдуваат сомненијата дека функционерите на СДСМ или свесно ги лажеле граѓаните или се целосно неспособни да реализираат било што од ветеното во текот на кампањата. Катастрофата е иста и на локално и на централно ниво“, додаваат од партијата.
Претседателот на ВМРО-ДПМНЕ, Христијан Мицкоски, најави дека народот се соочува со сериозни проблеми, а власта е глува и одбива да ги слушне и решава. Мицкоски во наредниот период ќе отпочне теренски средби со граѓаните низ целата држава, сè со цел да ги слушне маките и сугестиите на граѓаните, за потоа да се понудат програмски решенија на истите.
„ВМРО-ДПМНЕ и понатака стои на ставот дека во преговорите со Република Грција не треба да се задира во идентитетот, јазикот и Уставот, бидејќи тоа ќе биде погубно за нашата држава. Во однос на кадровските прашања, досегашниот член на Извршниот комитет Златко Перински е назначен за шеф на кабинетот на Претседателот Христијан Мицкоски, со што беше констатиран престанокот на неговиот мандат во Извршниот комитет“, информираат од ЦК на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мојсоска: Усеини од ДУИ доби 500 000 евра од ДПМНЕ во Охрид
Охридската гимназија, цела година е со раскопан двор. Учениците се заложници на неспособната локална власт, предводена од ДПМНЕ. Парите на изведувачот му се исплатени, а работата ни оддалеку не е завршена.
,,На изведувачот, само за реконструкција на дворот му се исплатени 230.000 евра од страна на Општина Охрид, за моментално оваа слика што ја гледате позади мене да биде ваква – грда, раскопана, каллива, нереконструирана…”, вели Носителот на ИЕ5 и Генерален секретар на Левица, Јована Мојсоска, од местото каде веќе цела година се одвиваат наводните градежни активности.
Според Мојсоска, баснословната сума и тендерот за овој цела година – раскопан двор по кој газат учениците од Охрид, повторно се во рацете на т.н. ,,локален шериф” од ДУИ.
,,Овој тендер заврши во рацете на познатиот Нефи Усеини, кој е рекордер по бројот на дивоградби тука во општина Охрид. Дополнително, истиот овој човек доби 80.000 евра тендер – повторно од Општина Охрид за реконструкција на оградата од дворот на истово училиште. И како тоа да не е доволно, токму Нефи Усеини за оваа иста гимназија доби 50.000 евра за електрична инсталација. Сè на сè, овој познат функционер, Нефи Усеини, доби, речиси, 500.000 евра од страна на власта на ВМРО – ДПМНЕ.
Мојсоска потсети дека во минатото, токму Нефи Усеини, беше симбол на неказнивоста на функционерите на ДУИ.
,,Нефи беше ослободен за нападот на советникот. Нефи Усеини беше ослободен од кривично гонење кога неговата фирма, директно, го загадуваше Охридското езеро. А како симбол на владеењето на овој градоначалник во сенка, остана познатата дивоградба, Пицерија во Чинарот. За жал, и тука се постави дека без разлика кој е на власт, повторно локалните функционери на ДУИ, никој не може да ги допре”, додава Носителот на ИЕ5, Јована Мојсоска.
Македонија
На полноќ настапува молк пред вториот круг од претседателските и парламентарните избори
На полноќ завршуваат кампањите за вториот круг од претседателските избори и за парламентарните.
Кампањата за претседателските избори започна веднаш по првиот круг од изборите, додека дваесетдневната кампања за парламентарните избори на 18 април.
На полноќ започнува молкот пред изборите, кој завршува со затворањето на гласачките места на 8 мај во 19 часот.
Македонија
Во мај уште еден продолжен викенд
Денеска се одбележува вториот ден на Велигден според православниот календар и е неработен за сите граѓани на земјава.
Овој месец ни престои уште еден неработен ден, а тоа е 24 мај (петок) кога се одбележува „Св. Кирил и Методиј“ – Ден на сесловенските просветители.
За граѓаните од православна вероисповед неработен ќе биде 21 јуни (петок), Духовден, петок пред Духовден.
На 23 мај (четврток) се одбележува Националниот ден на Власите и ќе биде неработен за припадниците на оваа националност, додека 16 јуни (недела) муслиманите во земјвата ќе го слават Курбан Бајрам, а неработен ќе биде првиот ден на Курбан Бајрам.