Македонија
Левицата како политички исцедок на СДС беше основното орудие со кое Јакимовски го спроведе насилството за да биде донесен буџетот на Општина Карпош, вели Вељановски

Втор ден откако се погазени и престанаа да се почитуваат законите, Деловникот и Статутот на Општина Карпош, вели Роберт Вељановски, советник од ВМРО-ДПМНЕ во Советот на Општина Карпош.
„Левицата како политички исцедок на СДС беше основното орудие со кое Стевчо Јакимовски го спроведе насилството за да биде донесен буџетот на Општина Карпош за 2024 година. Од претседателот на Советот, кој доаѓа од редовите на Левицата, сѐ уште има само молк, но затоа објавите на Јакимовски го потврдуваат фактот дека вчерашните немили и срамни настани на седницата на Советот беа спроведени по однапред договорено сценарио помеѓу Левицата, СДС и Јакимовски“, вели тој.
Со објавите на градоначалникот, како што додава Вељановски, се потврдило дека дел од изведеното сценарио е и непојавувањето на претседателот на Советот на Општина Карпош на седницата.
„Неговата замена како претседавач со Советот со советник под целосна и недвосмислена контрола на Јакимовски, инаку советник од редовите на ГРОМ, бруталната злоупотреба и манипулација на вработените во општинската администрацијата за вршење политички притисок врз советниците во Советот, е ставање на целата структура на Општината во корист и служба на градежната мафија. Вчерашната седница ни ги навести и не ги најави и средствата и начинот со кои Левицата има намера да им помогне на Јакимовски и на СДС за усвојување на спорните ДУП-ови, ‘Алумина’, ‘Млечен’, Нерези и многу други. Граѓаните ги препознаа евтините трикови на Левицата, граѓаните ги препознаа и скриените договори на Левицата, СДС, Јакимовски и градежната мафија. Граѓаните ја препознаа и опасноста и ризикот дека истото ова ќе се обидат да го повторат, но исто така граѓаните веќе знаат дека ВМРО-ДПМНЕ е единствениот политички субјект во Советот на Општина Карпош кој може да ги заштити Карпош и интересот и карпошани. Не знаеме каков договор и каква награда очекуваат Левицата, СДС и Стевчо Јакимовски, но затоа знаеме дека ќе направиме сѐ што е во наша моќ за да ги спречиме“, додава Вељановски и истакнува:
„Наместо градоначалникот да ги навредува и да ги упатува советниците на ВМРО-ДПМНЕ и коалицијата од Советот на Карпош на психијатриски прегледи, му препорачуваме да го искористи времето и добро да размисли пред да ја потпише одлуката за донесување буџет на Општина Карпош за 2024 година. Треба да знае дека за кршење на сите законски процедури се одговара. Уште еднаш оттука повторуваме дека ќе ги искористиме сите легални правни средства, ќе ги поднесеме сите потребни претставки и ќе се обратиме до сите надлежни институции за да ги спречиме во нивните намери“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВЛЕН: Целосна поддршка за пратеничката Мимоза Муса, покажа висок политички и институционален интегритет во чувствителен период

„ВЛЕН ја изразува целосната поддршка и благодарност за принципиелниот и непоколеблив став на пратеничката Мимоза Муса, која покажа висок политички и институционален интегритет во чувствителен период за албанската политичка сцена во земјата“, велат од ВЛЕН.
„Пратеничката Муса, избрана претставничка од редовите на Алијансата за Албанците, остана лојална на волјата на 107 илјади албански граѓани кои му дадоа доверба на овој коалиционен блок со цел да донесе промени и да отвори ново поглавје на чесно политичко претставување.
Нејзиниот став е јасен доказ дека претставувањето во Собранието не е само политички мандат, туку мисија во служба на граѓаните, на вистината и на стремежот за длабока реформа на албанската политика.
ВЛЕН потврдува дека единството, принципите и лојалноста кон граѓаните се темелот врз кој ќе ја изградиме нашата политичка иднина. Нашите пратеници, без исклучок, се обврзани да ги застапуваат граѓанските интереси и да се држат далеку од каков било компромис што е во спротивност со волјата на слободниот глас.
Јавно ѝ се заблагодаруваме на г-ѓа Муса и ѝ посакуваме понатамошен успех во достоинственото претставување на интересите на албанските граѓани“, се наведува во соопштението на ВЛЕН.
Македонија
Градоначалникот Ѓорѓиевски на одбележувањето на Националниот ден на Власите

Градоначалникот на Општина Кисела Вода, Орце Ѓорѓиевски, вечерва присуствуваше на Свечената академија што се одржа во Македонскиот Народен театар по повод 120 години од официјалното признавање на Власите како посебен народ.
На настанот беше присутен државниот врв, претставници на институции, организации и бројни членови на влашката заедница во Македонија.
„Влашкиот народ има длабоки историски корени и значајна трага во македонското културно и општествено ткиво. Со својот труд, со својата култура и посветеност, тие оставиле и сѐ уште оставаат длабоки траги во економскиот, културниот и општествениот развој на нашата држава.
Ова е ден кога се потсетуваме дека секоја етничка заедница е непроценлив дел од мозаикот на македонската државност. И токму затоа, наша обврска како институции е да продолжиме да создаваме општество во кое секој ќе се чувствува виден, вреднуван и подеднакво вклучен.
Горди сме што Општина Кисела Вода е дом и на бројни припадници на влашката заедница и ќе продолжиме да ги поддржуваме сите иницијативи што водат кон градење на почит, соработка и траен соживот“, изјави градоначалникот Ѓорѓиевски.
Македонија
Сиљановска-Давкова во базиликата „Сан Клементе“ во Рим присуствуваше на молебенот во чест на Свети Кирил

Претседателката Гордана Сиљановска-Давкова во базиликата „Сан Клементе“ во Рим присуствуваше на молебенот во чест на Свети Кирил и се поклони на гробот на сесловенскиот просветител.
Молебенот, на којшто присуствуваа членовите на државно – црковната делегација, претставници од дипломатскиот кор и други гости, го отслужија владиката Јосиф и владиката Јаков со претставници на Македонската православна црква — Охридска архиепископија.
Поклонението на гробот на Свети Кирил во базиликата „Сан Клементе” во Рим, првпат е организирано во 1969 година по повод 1100 години од неговата смрт. Оттогаш секоја година, на 24 мај, со највисоки почести се одбележува во присуство на македонска државно – црковна делегација.