Македонија
(Видео) Македонка се враќа од Кувајт, ќе работи како анестезиолог на детската кардиохирургија „Жан Митрев“
Докторка од Македонија, која заминала на работа во Кувајт, се враќа во државата и од следниот месец ќе работи како анестезиолог на детската кардиохирургија на Клиниката „Жан Митрев“. Со неа лично преговарал Жан Митрев откако детската кардиохирургија почна да функционира како јавно-приватно партнерство.
„Досега приватното и јавното здравство се делеа како конкуренција и, да не кажам, како непријатели. Ги здруживме квалитетот и стручноста за децата да добијат врвна медицинска нега. Се создадоа услови да станеме интересни за многу пациенти од целиот регион и наши доктори да се вратат во Македонија. Од следниот месец тука ќе работи докторка анестезиолог, која сега работи во Кувајт. Во преговори сме и со наши доктори во Германија, кои сакаат да се вратат“, рече доктор Жан Митрев.
На оваа клиника од пред два месеца се оперираат и бебиња до една година, а трошоците целосно ги покрива Фондот за здравствено осигурување. Доктор Владимир Чадиковски, кој со својот тим од Детската клиника премина во „Жан Митрев“, вели дека во болницата на располагање имаат 12 кревети за интензивна нега, операциона сала, магнет и компјутер во секое време, а целта им е да ги згрижат најтешко болните деца во Македонија.
„За два месеца, колку што сме овде а по 20 години поминати на Клиника, направивме повеќе од 10 интервенции. Од нив, шест беа под надзор на доктор Жан Митрев, а другите ги следеше тимот од американски доктори. Дете болно од цироза веќе е подготвено да си замине дома, чека трансплантација. Две новороденчиња под два килограма телесна тежина починаа во овој период. Тие не беа оперирани и за нив бевме во постојана комуникација со колегите од Бугарија“, рече Чадиковски.
Заедно со него во „Жан Митрев“ се дојдени четворица педијатри, двајца анестезиолози и три сестри од Детската клиника. На располагање им се стручни мислења од колегите од Бугарија, а ќе соработуваат и со експерти од Тексас, Вашингтон и од Хјустон.
„Странските експерти кои имаат искуство вредно злато ќе ги плаќа клиниката“, рече Митрев.
Министерот за здравство, Венко Филипче, уште еднаш повтори дека посегнале по јавно-приватно партнерство оти не можеле на Универзитетската клиника и со инвестирање да создадат услови какви што веќе има во „Жан Митрев“. Тој најави дека нова физибилити-студија треба да покаже во кои сè делови од здравствениот систем може да се примени јавно-приватно партнерство со цел да им се понуди квалитетна услуга на пациентите.
Директорот на Фондот за здравствено осигурување, Данаил Дончев, нагласи дека плаќаат иста цена за услугите во „Жан Митрев“ како што плаќале и на Детската клиника. За годинава се предвидени 65 милиони денари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ДИК: До 13 часот за претседател гласале 302.158, на парламентарните 312.070 граѓани
До 13 часот пристигнати се податоци за одѕивот на гласачите за претседателските избори од 2.472 избирачки места. Од вкупно запишани 1.261.526 гласачи на овие избирачки места, гласале 302.158, односно 23,95 %.
Најголем одѕив во моментот за претседателските избори има во Крива Паланка – 46,44 %. Најмал одѕив за претседателските избори има во Липково – 3,28 %.
Во споредба со вториот куг од претседателските избори во 2019 година имаме зголемување на одѕивот од 3,49 % на овие избори, А во споредба со првиот круг од претседателските избори во 2024 имаме намалување од 0,7 %.
До 13 часот пристигнати се податоци за одѕивот на гласачите за парламентарните избори од 2.348 избирачки места. Од вкупно запишани 1.207.922 гласачи на овие избирачки места, гласале 312.070, односно 25,84 %.
Најголем одѕив во моментот за парламентарните избори има во Кривогаштани – 48,65 %. Најмал одѕив за парламентарните избори има во Маврово и Ростуше – 11,91 %.
Во споредба со парламентарните избори во 2020 година имаме зголемување на одѕивот од 2,03 % на овие избори.
Одѕивот по изборни единици за парламентарните избори е следен:
Изборна единица 1 – 31,18 %
Изборна единица 2 – 23,91 %
Изборна единица 3 – 29,18 %
Изборна единица 4 – 26,40 %
Изборна единица 5 – 25,04 %
Изборна единица 6 – 16,71 %
До овој момент до ДИК се доставени вкупно 313 приговори за заштита на личното избирачко право. Од нив, 105 приговори се усвоени и на избирачите им е овозможено да го остварат своето право на глас, 9 приговори се отфрлени како неуредни, а 40 приговори се одбиени. Другите приговори се во обработка.
Овој изборен ден го набљудуваат 1.303 домашни набљудувачи, 860 меѓународни набљудувачи и 83 странски новинари.
Активен е и бесплатниот телефонски број 0800 555 44, на кој заинтересираните граѓани може да постават прашање или да пријават неправилности до Државната изборна комисија.
Исто така, активна е и видеолинијата на бројот 076 488 360, преку која граѓаните со оштетен слух и говор ќе може во текот на изборниот ден преку видеоповик да постават прашање до Државната изборна комисија и да добијат одговор на знаковен јазик.
Македонија
Засега мирен изборен ден и за обвинителствата, Бајрами чека кривични пријави по сомнежите за изборен поткуп во Охрид и Крива Паланка
Во согласност со информациите добиени од јавните обвинителства во целата држава, денешниот изборен ден, на кој се гласа на парламентарните и на вториот круг од изборите за претседател, до овој момент, генерално, поминува мирно и без поголеми нарушувања на изборниот процес, рече Џељаљ Бајрами, претседател на Комсијата на Обвинителството за следење евентуални кривични дела поврзани со изборите. Од почетокот на гласањето утрово до јавните обвинителства и на посебната електронска адреса [email protected] не се пријавени инциденти или неправилности на гласачките места, а кои би имале елементи на кривично дело.
„Во текот на вчерашниот ден веќе известивме дека по поднесена пријава во ОЈО Велес, со сомненија за изборен поткуп и пронајдено оружје и муниција, беше оформен предмет во ОЈО Велес за две лица. За едното веќе има итна постапка со предлог за притвор за поголемо количество оружје и муниција, кои беа пронајдени кај него. За второто лице предметот ќе оди во редовна постапка, а во исто време ОЈО Велес веќе презема дејства за проверка на наводите што се однесуваат на изборен поткуп. Исто така, известувања за сомненија за поткуп на гласачи беа примени и во Охрид и во Крива Паланка, меѓутоа до овој момент за овие настани не е поднесена кривична пријава до надлежните обвинителства. Доколку биде поднесена пријава, обвинителствата веднаш ќе преземат дејства на проверки“, вели обвинителот Бајрами.
Поради малиот број настани кои би можеле да имаат обележја на кривично дело, Бајрами цени дека може да се даде генерална оценка дека целиот изборен процес до овој момент минува без поголеми нарушувања од аспект на јавнообвинителското постапување.
Привремената комисија на Јавното обвинителство за следење евентуални изборни нерегуларности продолжува да го следи целиот тек на изборниот процес. Електронска адреса [email protected] останува отворена за сите евентуални пријави на сомненија за кривично дело, кое би можело да го наруши текот на изборите. И денеска се организирани вонредни дежурства во сите основни јавни обвинителства, а координации се прават и со други институции надлежни за следење на изборниот процес. Сите евентуални сомненија за кривични дела, кои би можеле да го нарушат изборниот процес, ќе бидат испитани, а предметите ќе имаат приоритет на постапување во јавните обвинителства.
Македонија
(Видео) МВР: Изборниот ден тече мирно, со регистрирани помали инциденти
До сега Министерството за внатрешни работи нема регистрирано посериозни нарушувања на јавниот ред и мир во текот на гласањето, кое, генерално, се одвива мирно, без проблеми, соопшти портпаролот на МВР, Тони Ангеловски, на денешната прес-конференција.
„Од отворањето на гласачките места до 11 часот регистрираме две пријави за поставен штанд на политичка партија во близина на гласачко место во Шуто Оризари, како и за залепени плакати и расфрлани летоци на подрачјето на Чаир во Скопје и се преземааат мерки за расчистување на случаите. Исто така, имаме пријави за агитирање во Тетово, Скопје, Куманово, село Баница, Струмичко, и во општина Боговиње, но по преземените мерки од страна на полициските службеници, тие наводи до сега не се потврдени“, соопшти Ангеловски.
Министерството за внатрешни работи апелира до граѓаните и до учесниците во изборите и во преостанатиот дел од гласањето да се воздржат од инциденти, а доколку има какво било нарушување на изборниот процес, граѓаните веднаш да ја известат полицијата на броевите 192 и 112 или да пријават во најблиската полициска станица.