Македонија
Марјан од „ДоказМ“ посочил и втор обвинител како соработник за текстовите против шефот на скопското Вишо обвинителство

Сашо Рајчев не е единствен обвинител посочен од Марјан Стаменковски, како соработник за текстовите објавени на порталот „ДоказМ“ против шефот на Вишо обвинителство, Мустафа Хајрулахи. Стаменковски во писмена изјава со извинување за објавен текст, кажал дека имал помош и од обвинителка. Ова за „Макфакс“ го откри Хајрулахи. Тој се надева дека Стаменковски пред Граѓанскиот суд ќе каже и име и презиме на жената која е дел од правосудниот систем, а соработувала при објавувањето на текстовите против него.
Хајрулахи додава дека ако се утврди дека споменатата обвинителка соработувала со Марјан Стаменковски, со тоа што порачувала текстови со невистината и навредувачка содржина, ќе се поведе дисциплинска одговорност за обвинителката.
„Во приватната тужба ги наведов насловите на објавените текстови како и текстовите кои беа објавени против мене и на истото, во законски предвидените процедури, Марјан Стаменковски до мојот адвокат достави писмо во кое меѓу другото наведува дека имал соработка со една јавна обвинителка. Во писмената изјава не наведува име и презиме на обвинителката но се надевам дека во текот на постапката пред граѓанскиот суд ќе излезе со податоци за споменатата обвинителка“, вели Хајрулахи за „Макфакс“.
Шефот на скопското Вишо обвинителство посочува дека пред вчерашната седница, немал информации за евентуална соработка меѓу неговиот колега Рајчев и осудениот Стаменковски.
„Со изнесените наводи од страна на обвинетиот Марјан Стаменковски бев затекнат и фрапиран. Не сакам да верувам во наводите искажани од страна на обвинетиот Марјан Стаменковски но секако дека истите ќе се проверат и доколку се поткрепат со докази кои ќе го потврдат истото, тогаш ќе се поведе дисциплинска постапка се со цел да се утврди евентуална одговорност на споменатиот јавен обвинител“, додава Хајрулахи.
Прашан, дали освен обвинителите, знае за евентуално вмешана трета личност од јавниот живот во нарачките, тој додава: „Навистина не знам и не располагам со такви податоци“.
Марјан Стаменковски е осуден на затвор во траење од три години и еден месец. Меѓу делата за кои се гонеше беше и уцена. Обвинителството пред Кривичен докажа дека Стаменковски со намера за себе да прибави противправна имотна корист, му се заканувал на оштетен дека ќе открие нешто што може да му наштети на неговиот углед и чест.
Против Стаменковски е отворен уште еден предмет кој се води во скопското Обвинителство, каде меѓу другото, се истражува кој ги нарачувал текстовите објавени на „ДоказМ“. Стаменковски на јавна седница во Апелација посочи дека едно од лицата е обвинителот Рајчев, кој го застапуваше предметот пред второстепениот суд и побара изземање поради судир на интереси.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Паника во Катланово и Петровец поради голем пожар, Ангелов смирува дека нема опасност да се запали бензинската

Попладново пожар изби и помеѓу Катланово и Петровец. Директорот на Дирекцијата за заштита и спасување Стојанче Ангелов вечерва во видео-изјава посочи дека пожарот е пресечен и не претставува закана за бензинската пумпа која е во близина.
„Пожарот кој што изби помеѓу Катланово и Петровец во близина на безинската пумпа е делумно локализиран, односно е пресечен и не претставува опасност за блиската бензинска пумпа. Се движи кон село Чифлик, а на негово ставање под контрола работат скопските пожарникари. Рано наутро ќе се упати и ер-трактор, а ќе упатиме и неколку возила. Се работи за непријатен пожар кој се наоѓа на непристапно место, но верувам дека утре пожарникарите ќе го стават под целосна контрола. Видлив е од автопатот и предизвикува вознемиреност, но граѓаните да не се плашат бидејќи не може да ја зафати бензинската пумпа“, изјави Ангелов.
Македонија
До 18 часот вкупно 29 пожари на отворен простор, гори уште на 14 места

До 18 часот вкупно 29 пожари на отворен простор, од нив 14 активни, четири под контрола и 11 изгаснати.
Како што информираат од ЦУК активни пожари има во Општина Василево, Радовиш и Берово – с. Нивичино (планината Голем Готен и Малешевските планини – нискостеблеста шума, смрека, грмушки и ниска вегетација), Општина Прилеп – с. Бешиште, Бешишки Рид, кон с. Градешница (опш. Новаци) и кон границата со Р. Грција (мешана шума), Прилеп и Кавадарци – помеѓу с. Царевиќ, Смолани, Радобил, Дрен, Галиште и Трстеник (мешана шума и ниска вегетација), Македонски Брод – помеѓу с. Црешево, Локвица и Крапа (деградирана дабова шума и грмушки, Желино – помеѓу с. Церово и Групчин (нискостеблеста и деградирана шума),Крива Паланка – с. Нерав (висока борова шума), Старо Нагоричане и Куманово – с. Облавце, Бељаковце, Довезенце, Орах и Ругинце (ниска вегетација), Битола – с. Велушина (ниска вегетација), Битола 2 – с. Миџитлија (ниска вегетација), Кичево – с. Горно Трско (ниска вегетација и ниска шума), Македонска Каменица – с. Косевица (борова шума), Струга – с. Ново Село и с. Делогожда (ниска вегетација и стрниште), Штип – помеѓу с. Драгоево и Селце (нискостеблеста шума, прнар и сува трева),Петровец – с. Ржаничино (ниска вегетација).
Пожарите кај Македонски Брод 1 – с. Грешница, Македонски Брод 2 – с. Латово, Карбинци – с. Јунузлија и кај Петровец – с. Средно Коњаре кај р. Пчиња се ставени под контрола.
Македонија
Алиу ветува 205 милиони евра за болници кои инспирираат доверба, а не страв

Верувам дека здравството е повеќе од систем. Тоа е нераскинливо морално ветувањето што си го даваме едни на други: дека кога најмногу ни треба, ќе има некој тука за нас“, порачува во видео обраќање министерот за здравство, Азир Алиу.
Тој нагласува дека тоа ветување денес има потреба да се врати во системот, но без импровизирани одлуки, туку со јасна визија. Без носталгија, со податоци и храброст.
-Визијата станува реалност со голем прв чекор: 205 милиони евра за болници кои инспирираат доверба, а не страв, вели министерот Алиу, додавајќи дека во Штип ќе се гради модерна клиничка установа и Факултет за медицина за идните генерации лекари.
-Во Тетово, болницата ќе добие современа медицинска опрема и два нови објекти, со што ќе прерасне во симбол на грижа и достоинство. Во Кичево, каде што болницата остана нереализирано ветување од минатиот век, од темел ќе градиме нова, светла, топла и достојна за секој од вас, вели министерот Алиу.
Тој истакнува дека ова е само почеток, бидејќи хоризонтот на неговата визија е многу подалеку.
-Да изградиме модерно, хумано и дигитализирано здравство. Ние не сме тука да чекориме по патеки од минатото кои не водат никаде, ние сме овде да градиме доверба за идните генерации. И заедно со вас, ќе ја направиме оваа визија реалност, порачува министерот за здравство, Азир Алиу во неговото видео обраќање.