Македонија
Матичните лекари со штрајк ќе го одбележат Денот на здравството

Матичните лекари од целата држава денеска ќе излезат на штрајк пред Министерството за здравство.
Одлучиле со штрајк да го одбележат Денот на здравјето, 7 Април, оти здравствените власти не покажале слух по претходните два протеста кога тие остануваа во ординациите, но не работеа преку системот „Мој термин“.
„Управниот одбор во саботата ја донесе одлуката за штрајк на Денот на здравјето. Имавме претставници од цела Македонија и уште еднаш констатиравме дека сме во тешка ситуација по низата покачувања. Продолжуваат да стигнуваат огромни сметки за индустриска струја, горивото сите знаеме колку се зголеми, а имаме колеги што патуваат и по 85 километри за да ги отворат амбулантите, се затвораат амбуланти, незадоволството само се таложи и ние во моментот сме доведени до точка на вриење. Ова е наш трет обид Владата да нè чуе дека ние го одржуваме здравствениот систем, да сфатат дека е неопходно да ги сменат законите. Недозволиво е ова што сега се случува, кога еден матичен лекар оди во пензија, амбулантата се руинира и ако некој млад лекар се одлучи да работи, принуден е да почне од нула за што нема потреба. Доволно е само да ја продолжи работата со пациентите на лекарот што оди во пензија. Ова е последен крик за спас на примарното здравство. Просечната старост ни е 57 години, сите сме пред пензија, ќе нема кој да ги лекува луѓето“, вели Лилија Чолакова-Дервишова, претседателка на Здружението на приватните лекари, за „Макфакс“.
Најавата на заменик-министерот за здравство, Владимир Рендевски, за формирање работни групи што ќе работат на решавање на наталожените проблеми по претходните протести, останала само како ветување. Чолакова-Дервишова вели дека нема никакво поместување за решавање на проблемите по протестите.
И на овој протест матичните лекари ги имаат истите барања, односно покачување на капитацискиот бод, укинување на казните за препишување лекови по истечен извештај од специјалист и менување на правилниците за работа со кои ќе се внимава на достоинството и на пациентите и на лекарите.
Драган Ѓорѓиевски, претседател на Здружението на лекарите по општа – семејна медицина, вели дека го поддржале штрајкот, кој е во организација на Здружението на приватните лекари, оти премногу долго чекаат реформи.
„Првите два протеста немаа никаков ефект, ништо од барањата не е прифатено, а тие се стари десет години, толку време нема реформа во приватното здравство. Ние даваме целосна поддршка оти сметаме дека треба правилно да се вреднува трудот на специјалистите во оваа област. Меѓу другото, бараме загарантирана минимална плата за општите лекари, за специјалистите по семејна медицина и за медицинските сестри“, вели Ѓорѓиевски.
Ординациите на матичните лекари од другите градови, утре, поради протестот, ќе бидат затворени, а за време на протестот, затворени ќе бидат и ординациите на лекарите во Скопје.
Поддршка за штрајкот матичните лекари добија и од Здружението на приватните здравствени стоматолошки установи и приватните доктори по дентална медицина (ЗПЗСУ ПДДМ).
„ЗПЗСУ ПДДМ сака да ја искаже својата безрезервна поддршка за најавениот протестот на матичните лекари, кој ќе се одржи на 7 април 2022 година во 12 часот пред Министерството за здравство поради катастрофалната и неиздржлива состојба во стоматологијата и потребата за решавање на проблемите, со барање за реформи и промена на начинот на исплата во стоматологијата од страна на ФЗО“, соопшти Здружението на приватните стоматолози.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Очекуваме до милион и пол туристи во Македонија

Премиерот Христијан Мицкоски, одговарајќи на новинарско прашање во врска со забележаниот раст на туризмот во Македонија за 20 проценти, како и за тоа на што се должи растот и кои се очекувањата на Владата, изјави:
„Да, тоа е добар податок во првите четири месеци од оваа година. Добар податок во смисла на тоа дека повеќе од 20% имаме и туристи и ноќевања. Тоа значи повеќе пари, за граѓаните кои што нудат услуга на овие туристи. Тоа значи дека, ако просекот е некаде околу 800 евра, дека секој од нив оставил, надвор од аранжманот. Тоа се навистина стотици милиони евра коишто ќе останат тука, кај нас, во угостителството, во услужната дејност итн., итн.
Очекуваме засилување, уште поголемо. Обидот, да директно преговараме со туроператори е успешен, 40.000 туристи од Западна Европа, веќе престојуваат тука, во вкупен број зборувам. Тоа се некаде околу 160.000 ноќевања, надвор од сезона, кога зборуваме за Охрид, иако и во другиот дел на државата, цела година е сезоната.
За следната година очекуваме, надвор од сезона, половина милион ноќевања. Веќе разговараме со други туроператори и очекуваме повторно двоцифрен раст на туризмот. Влијае на бруто-домашниот производ, влијае на економскиот раст на државата.
Минатата година имавме 1.200.000 туристи. Оваа година очекуваме до милион и пол да дојдеме. Минатата година имавме 3,5 милиони ноќевања, а оваа година очекуваме до 4 милиони ноќевања минимум да дојдеме“, изјави премиерот Мицкоски.
Македонија
(Видео) Реализирани 11 проекти во Клиниката за детски болести во делот на инфраструктурата и набавка на модерна медицинска апаратура

Успешно се реализирани 11 значајни инфраструктурни и медицински проекти на Детската клиника, соопштија денес премиерот Христијан Мицкоски и министерот за здравство, Азир Алиу, истакнувајќи дека нивната цел е сите клиники да бидат инфраструктурно и технолошки опремени и со добар кадар.
Двајцата ја посетија Клиниката за детски болести, пришто Мицкоски изрази благодарност за оние што се грижат за овој објект, бидејќи тој треба да се грижи за здравјето на нашите најмлади, а тоа се децата.
Директорот на клиниката, Реџеп Мемеди информираше дека веќе се реализираат активности за зајакнување на кадарот, клучен предуслов за функционален и одржлив здравствен систем. Во тек е реализација на нови вработувања за доктори, административен кадар, медицински сестри, лаборанти и биолози. Исто така, е завршена е постапката за вработување четворица специјализанти, а наскоро ќе се објави и нов оглас за тројца лекари, за кои веќе се добиени согласности.
Во претстојниот период ќе бидат воведени три медицински процедури и ќе се отвораат нови кабинети за хемодијализа и ултразвучна цистографија на одделот за нефрологија, обезбеден е и апарат за стрес-тест на одделот за кардиологија.
На новинарско прашање, министерот Алиу информираше дека од денес има нова веб страница на Министерството за здравство, поставена е апликација за отворен кабинет, преку која граѓаните ќе имаат можност од наредната недела секој петок да се пријават од 10 до 15 часот и да закажат за 15-минутна средба со министерот.
Македонија
Институциите до работодавачите: Да се работи од далечина каде што е изводливо, работниците да не бидат надвор од 11 до 17 часот

Министерството за економија соопшти дека во согласност со усвоената Информација за спроведување на мерки од Фаза 3 на Акцискиот план за превенирање на последиците од топлотните бранови врз здравјето на населението (2025 – 2030), активно ги координира и имплементира препораките за заштита на работниците и подобрување на работните услови во летниот период.
Во услови на екстремни топлотни бранови, Министерството ги повикува сите работодавачи во јавниот и приватниот сектор да ги применуваат следните мерки:
-Одложување на работните активности во најтоплите часови од денот, од 11 до 17 часот, особено за работници кои се изложени на директна топлина;
-Воспоставување можности за работа од далечина, флексибилно или двократно работно време каде што е изводливо;
-Обезбедување на соодветни микроклиматски услови во работните простории, со температура до 25°C, освен каде што природата на работниот процес тоа не го дозволува;
-Ослободување од работни обврски на бремени жени и лица над 60 години, доколку не се обезбедени соодветни услови за работа, со исклучок на вработените во критична инфраструктура (здравство, полиција, армија, транспорт, енергетика, јавни комунални претпријатија).
Министерството за економија и труд ќе продолжи да ги следи и координира активностите за заштита на здравјето и безбедноста при работа, во соработка со Министерството за здравство и останатите релевантни институции.
Овие мерки, како што се додава, имаат за цел да ги намалат ризиците од топлотен стрес и други здравствени последици за вработените, како дел од националниот одговор на предизвиците од климатските промени и екстремните временски услови.
Министерството ја повикува јавноста и бизнис секторот на соработка и одговорност во спроведувањето на препораките за заштита на работниците и обезбедување безбедни и здрави работни услови.