Македонија
Мицкоски: Освен скандали во земјоделството, не сме виделе ништо друго од власта и ресорниот министер
Христијан Мицкоски, претседател на ВМРО-ДПМНЕ, при денешната посета во Прилеп запрашан како гледа на „пофалбите“ од Владата дека го подржуваат земјоделството рече дека покрај скандалите во земјоделството, нема ништо друго ниту, пак, некој го видел министерот за земјоделство да излезе.
„Покрај скандалите во Министерството за земјоделство, јас навистина друго и не знам, ниту некој го видел овој министерот за земјоделство ниту слушнал нешто од него“, рече Мицкоски.
Мицкоски потсети дека на земјоделците за периодот 2019-2022 година им се должат отприлика 4 милијарди денари или 65 милиони евра.
-Последното што можев да го видам како податок е дека околу 4 милијарди денари, некаде околу 65 милиони евра им се должат на земјоделците по основ за останати субвенции, за периодот 2019-2022 година, значи некаде отприлика 4 милијарди денари или 65 милиони евра. Од друга страна, ја видовме цената откупна која што ја објавија мелничарите, таа треба да е некаде околу 8, 9 денари ако не се лажам, а производната цена е 19 денари, значи загубата од самиот старт е 11 денари и сега за што зборуваме?, запраша тој.
На крајот, Мицкоски порача дека доаѓа вистинска влада, влада на ВМРО-ДПМНЕ, земјоделска влада, која што ќе се грижи за земјоделците.
„Зборуваме само за луѓе што многу крадат. Доаѓа вистинска влада, која ќе се грижи за земјоделците, земјоделска влада, онаа влада на ВМРО-ДПМНЕ што навистина суштински ќе им помага и навистина суштински ќе се грижи за земјоделците“, додаде тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателката Сиљановска Давкова со полскиот амбасадор: разменети мислења за актуелните политички случувања во двете земји
Претседателката Гордана Сиљановска Давкова денеска го прими амбасадорот на Република Полска, Кшиштоф Гжелчик.
На средбата се разменија мислења за актуелните политички случувања во двете земји, тековните предизвици и можностите за искористување на потенцијалите со цел продлабочување на билатералната соработка.
Во годината кога се одбележува триесетгодишнината од воспоставувањето на дипломатските односи, заемна констатација беше дека односите меѓу двете земји се на исклучително ниво и беше искажано задоволство од континуираниот политички дијалог, соработката во рамки на меѓународните институции и партнерството во НАТО Алијансата.
Претседателката се заблагодари за континуираната поддршка од Полска во реализацијата на македонските стратешки цели и изрази подготвеност за натамошна соработка на евроинтеграцискиот план и исполнувањето на реформската агенда.
Во таа насока, претседателката ја потенцираше важноста од непречено одвивање на нашиот пристапен процес во ЕУ и изрази очекување дека полскиот активизам и поддршка, билатерално, како пријатели на Групата за проширување на ЕУ и преку Вишеградската група, ќе продолжат со иста енергичност и во иднина.
На средбата беше истакната подготвеност за унапредување на образовната соработка и беа поздравени чекорите во насока на проширување на економската соработка, трговската размена и соработката во енергетскиот, информатичкиот и земјоделскиот сектор.
Скопје
Дел од ромската населба во Злокуќани станува гето, такво насилие, крволочност, со употреба на лопати, секири, ножеви, е незапамтено во општината, велат од Карпош
Општина Карпош е згрозена од синоќешниот немил настан во ромската населба во Злокуќани.
„Такво насилие, крволочност, со употреба на лопати, секири, ножеви… (за среќа извадениот пиштол не успеал сопственикот да го репетира), е незапаметено во историјата на Карпош. Оваа масовна тепачка во ова населено место не е прва. Дел од ромската населба во Злокуќани станува гето, опасност за живеењето на жителите кои сакаат мирно да ги поминуваат деновите, но уште поопасно за граѓаните кои што гравитираат во тој дел како и фирмите кои што имаат имот во оваа населба. Готово да нема граѓанин кој што физички не е нападнат. Не постои куќа или фирма која повеќе пати не е брутално ограбена, а сторителите се познати и на мештаните и на органите на прогон“, велат од општина Карпош.
„За насилниците од оваа населба градоначалникот на општината повеќе пати изврши разговор со полициската станица Карпош и со Основното јавно обвинителство за да насилниците бидат санкционирани, затоа што овие луѓе не само што ги загрозуваат жителите на Злокуќани, туку и жителите на Бардовци и Влае 1“, се вели во соопштението на општината.
Општина Карпош бара од полицијата, обвинителството и судот, најстрого да бидат санкционирани учесниците во оваа нецивилизирана, преполна со агресија тепачка својствена на средниот век, а не на цивилизирана заедница како што е оваа општина. Доколку овој немил настан не се санкционира соодветно, а границата е помината веќе со години, состојбата ќе биде уште полоша, а агресивните насилници ќе земаат се повеќе замав, се додава во соопштението на општина Карпош.
Македонија
„Тарифата на нотарите енормно зголемена – партиите на власт со нов удар по џебот на граѓаните“, велат од партијата Левица
„Министерот за правда во заминување, Кренар Лога, неколку дена пред напуштање на функцијата, која ја извршуваше катастрофално и со секојдневни скандали, им зададе нов удар на сè посиромашните граѓани на Република Македонија зголемувајќи ја два-трипати и без тоа веќе високата нотарска тарифа! Ова зголемување доаѓа по претходно мислење од Нотарската комора и добиената согласност од корумпираната техничка Влада составена од министри на ДУИ, СДС и ДПМНЕ!“, соопшти партијата Левица.
„Почнувајќи од 1 септември, трошоците на граѓаните за составувањето на задолжителни нотарски акти, отсега ќе изнесуваат најмалку високи 8000 денари! За споредба, досегашниот минимален надомест за нотарски акти изнесуваше 800 денари, што претставува ДЕСЕТКРАТНО ЗГОЛЕМУВАЊЕ на трошоците за нотарски акт од мала вредност.
Истовремено, дури и едностраните правни исправи во форма на нотарски акт поскапуваат повеќе од тројно, од досегашните 400 денари на 1300 денари. Воедно, повеќето заверки на документи, кои за граѓаните се товар кој мора да го понесат за завршување и на најмала бирократска работа и процедура, отсега ќе се наплаќаат од страна на нотарите двојно поскапо!
Ова претставува уште едно во низата поскапувања кои го отежнуваат секојдневното живеење и функционирање на граѓаните, а е наметнато од владејачките партии кои наместо да го штитат животниот стандард на граѓаните, ги застапуваат интересите на различни лоби – групи, го отежнуваат пристапот до правни услуги на безимотните и го продлабочуваат класниот јаз.
#Левица принципиелно се залага за олеснување на пристапот до правда во македонското општество и прилагодување на трошоците на граѓаните, согласно реалните економски прилики во државата.
Левица ќе се заложи за преиспитување на ваквата одлука и во прва можност во Собранието ќе побара од новиот министер за правда и од Владата да ги намалат трошоците на граѓаните за нотарските услуги, имајќи го предвид нискиот стандард на живот и застапувајќи ги интересите на сиромашните и безимотните класи“, се додава во соопштението на партијата Левица.