Македонија
Од вицепремиер го направија пророк, јавноста во дилема како Груби знае дека „аудито“ на комшијата е запалено поради него

Палењето на луксузното „ауди“, го отвори прашањето, чиј е опожарениот автомобил – на вицепремиерот Артан Груби или 35-годишен скопјанец кој е негов сосед. Полицијата евидентирала дека возилото не е формална сопственост на Груби, а тој излезе со извинување до пријателот-сопственик, со тврдење дека возилото е запалено поради неговата професија. Не даде одговор – зошто пироманите би запалиле туѓо возило, за да го заплашат него.
За настанот има низа реакции од професори, новинари, правници, политичари, особено поради тоа што Груби нема пријавено во Државната комисија за спречување корупција дека е сопственик на „ауди“ туку дека има само стар „цитроен“ од 2001 година. Дел од нив се и иронични.
„ДКСК во анкетен лист да воведе графа ‘корисник на имот’, да видиме колку политички корисници на движен и недвижен имот имаме, чиста работа“, напиша адвокатот и екссудија, Владимир Туфегџиќ.
Професорката Мирјана Најчевска, коментира дека се плаши, да нѐ му текне на некого, да го запали нејзиниот автомобил, поради вицепремиерот.
„Се надевам нема да ми го запалат мојот автомобил за да му испратат порака на Груби“, напиша Најческа.
Се надевам нема да ми го запалат мојот автомобил за да му испратат порака на Груби.https://t.co/K2ijADBZiY https://t.co/il7XXjQSXa
— Mirjana (@ibogovitelicno) July 23, 2023
Со коментар излезе и актерката и експратеничка, Софија Куновска.
„И не му ја палите колата, пак нова ќе треба да му купиме“, напиша таа.
Ексминистерот за финансии, Џевдет Хајредини, прашува: „Не е јасно зошто Груби му се извинува некому на кого некој друг, а не он, му ја запалил колата“.
Tоа што Груби нема пријавено дека има „ауди“, а запалениот автомобил го поврзува со него, предизвика и коментари кај граѓаните.
„Аудито на Артан толку се оштетило во пожарот што во ДКСК го пријавил како ‘цитроен ксара’ од 2001 година“, пишува во еден од коментарите.
Новинарката Жанета Трајкоска, прашува, дали сега комшијата ќе му даде ново „ауди“ на Груби или комшијата ќе му даде ново „ауди-играче“ за да си вози вицепремиерот низ Скопје.
„Важно е да имаш сериозни пророчки способности како Груби, па 102 отсто да знаеш дека колата на комшијата што тебе ти ја дал да си играш (и што не кошта 1000 евра) е запалена заради тебе, а не заради комшијата на пример?! Важно е и да не прашаш кој е комшијата што може да му даде ауди играче на Груби и колку има комшијата други вакви ‘аудиа’ што ги дава по комшии?! Важно е и цела држава заедно со Бујар Османи да е згрозена од палењето на автомобилот на комшијата на Груби, ама никако министерот да не праша зошто вицепремиерот Груби користи возило на својот сосед за партиски и владини средби, зарем толку е фрустриран од својата ‘Ксара’ и ако ова му е таква фрустрација па мора да користи комшиско ауто, како е бре вицепремиер?! Утре што ќе му земе на комшијата?!“, напиша Трајкоска.
Фамозното луксузно „ауди“ беше запалено вчера, во текот на ноќта. МВР излезе со информации, но не го поврзува со Груби. Подоцна, вицепремиерот излезе со статус во кој се извини на комшиите и пријателот кој е сопственик на возилото.
Крешник Бектеши во објава на својот Фејсбук профил изрази жалење за, како што вели, обидот за напад врз првиот вицепремиер Артан Груби, а во врска со палењето на автомобил на негов сосед за кој медиуми шпекулираат дека всушност е на Груби.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Родители и блиски на жртвите во Кочани бараат Обвинителството да објасни кој е обвинет, а кој ослободен

Родителите, роднините, пријателите на загинатите деца, како и нивните поддржувачи, излегоа на уште еден марш во Кочани, барајќи правда за 62-та жртви кои загинаа во трагичниот пожар во дискотеката „Пулс“. Тие упатија јавен апел до Јавното обвинителство – конечно и директно да ги информира за тоа кои лица се обвинети, а за кои е запрена постапката.
„Ние не сме правници, соопштението ни е дадено по членови и закони… и реално ништо не сфативме. Претпоставувам и другите родители, освен градоначалниците и обезбедувачите, не сфатиле“, рече Марија Петрушева, мајката на загинатиот Андреј Панов.
Таа истакна дека во понеделник официјално ќе испратат барање до Обвинителството, со кое ќе побараат лична средба со надлежните обвинители.
„Чувствуваме морална и човечка должност да се обратиме. Сметаме дека е од суштинско значење Обвинителството конечно и целосно да нѐ запознае со исходот од истражната постапка и со содржината на поднесениот обвинителен акт, кои лица се опфатени, а кои се изземени од одговорност, за да ги отстраниме сите дилеми кои се јавуваат кај нас. Неприфатливо е за нас да добиеме информации преку медиуми. Очекуваме транспарентност и директна комуникација“, порача Петрушева.
Таа изрази загриженост што, и покрај укажувањата, одредени лица сè уште не биле повикани ни на распит.
„Нашата болка е тешка, но борбата е праведна. Бараме одговорност и вистина“, додаде таа.
Со остар тон се обрати и Васка Стојанова, мајката на загинатиот Томче, која директно го обвини газдата на „Пулс“, познат како Деко, дека во моментот на пожарот се скрил, оставајќи ги младите да се борат за живот.
„Јас не знам зошто партиите преку медиумите кажуваат кој што и колку дал. Господ рекол кога левата рака дава, десната не треба да знае. И обратно. На нашите деца никој и ништо не им помогна, само помогнаа со тоа што им ја затворија вратата и што многу повеќе уништија. Да била вратата отворена, немало толку да бидат уништени и ќе се спасија. А не како оној монструмот Деко што се криел долу во скривницата, за да се спаси, а нашите деца ги оставил на милост и немилост“, изјави Стојанова со солзи во очите.
Присутните граѓани порачаа дека нема да престанат со протестите додека не добијат јасни и транспарентни одговори од институциите. Бараат правда, но и човечка емпатија – не правни термини и соопштенија кои, како што велат, никој од нив не ги разбира.
Македонија
Шведски експерти и преживеани од трагедија ќе понудат поддршка во Кочани

Од 16 до 18 јуни, во Кочани ќе престојува седумчлена делегација од Гетеборг, Шведска, составена од социјални работници, пожарникари и лица кои преживеале трагедија слична на онаа што неодамна го потресе овој град. Посетата е во организација на групата „Support Kocani“, која информира дека целта на настанот е споделување на искуства, поддршка и заедничко градење на сила и надеж.
Шведската делегација доаѓа како симбол на солидарност, откако пред 27 години, во нивниот роден град Гетеборг, избувна пожар во дискотека при што загинаа 63 лица – трагедија што длабоко го промени шведското општество.
„Ова не е само делегација, туку група луѓе кои лично ја почувствувале болката што ја носи ваква трагедија. Тие ќе споделат како низ годините се соочувале со последиците, како изградиле психолошка издржливост и како повторно нашле надеж“, велат од „Support Kocani“.
Тие додадоа дека посетата има силна симболика и за Кочани – како потсетник дека заедницата не е сама и дека солидарноста не познава граници.
„Ги пречекуваме со отворени срца. Тие се сведоци на болка, но и симболи на сила. Заедно ќе споделиме искуства, ќе создадеме мостови на поддршка и ќе покажеме дека од болката може да се роди нова енергија за живот“, велат „Support Kocani“.
Скопје
Арсовска го прозва Стојкоски: Аценце, ти направив 27 улици, ни фала не кажа и уште бегаш од дуел за хемиските фабрики

Градоначалничката на Скопје, Данела Арсовска, преку објава на својот профил на Фејсбук му се обрати на градоначалникот на општина Ѓорче Петров, Александар Стојкоски, со серија критики за неговото однесување и, како што тврди, неспособност да го признае придонесот на Град Скопје во реализацијата на инфраструктурни проекти.
„Ова е објава за читање за сите интелигентни и слободоумни граѓани, другите не читајте!“ – започнува Арсовска во својот пост, порачувајќи му директно на Стојкоски:
„Аценце, ти се обраќам да се потсетиш, како неспособната што спиела 3 години ти направи 27 улици во 5 населени места во Ѓорче Петров“.
Таа додава дека улиците биле изградени преку Јавното претпријатие „Улици и патишта Скопје“, без учество на општински средства, а Стојкоски само се појавил за да се слика, без притоа, како што вели, ни да се заблагодари.
„Ти ги направивме со скопското јавно претпријатие ‘Улици и патишта Скопје’, ти освен што се сликаше, не потроши ни денар, а не се ни заблагодари“, напиша Арсовска.
Во објавата, Арсовска повторно го повикува Стојкоски на ТВ дуел во врска со деталниот урбанистички план кој, според неа, овозможува изградба на хемиски фабрики и 31 висококатница во централното градско подрачје на Ѓорче Петров.
„Уште чекам да прифатиш ТВ дуел за ДУП-от кој го донесе за да се изградат хемиските фабрики и 31 висококатници сред Ѓорче Петров. Тоа што плаќате медиуми и партиски ботови да ве фалат, а другите да ги понижуваат, не значи дека сте во право!“, заврши градоначалничката.