Македонија
Општина Гази Баба: Граѓаните да ги пријават штетите предизвикани од невремето
Состојбата по вчерашното невреме во општина Гази Баба била сложена, но сега истата е под контрола на службите, информираат од општината.
„Вчерашното невреме, кое на моменти беше критично, предизвика штети со поплавување дворни и подрумски простории на куќи и земјоделски површини. Во текот на вчерашниот ден екипи на општината, заедно со градот Скопје и јавните претпријатија, ја следеа состојбата и ги санираа сите штети од невремето“, се наведува во соопштението.
Од општината истакнуваат дека по невремето целосната локална патна мрежа, како и обиколницата биле исчистени и повторно проодни од нанесените кал и камења. Како што се наведува, биле изведени работни зафати на канализациската мрежа во Ченто, Сингелиќ и Инџиково.
„Каналите беа во постојан мониторинг и во текот на вчерашниот ден се интервенираше на повеќе места за да се спречи излевање. Во текот на денешниот ден се работи по целата должина на каналската мрежа, од Брњарци спрема Стајковци до Сингелиќ“, информираат општинските власти.
Како што се истакнува, Советот на денешната седница ги изгласал одлуките за формирање омисии за утврдување на штетите.
„Формирана е комисија за проценка на штетите на градежните објекти, како и комисија за проценка на штетите за земјоделското земјиште. Сите граѓани на кои во текот на вчерашното невреме им е предизвикана штета ќе можат од утре (8 мај), на едношалтерскиот систем во општината да пополнат образец, по што формираните комисии на терен ќе ја констатираат штетата“, наведуваат од општина Гази Баба од каде велат дека службите остануваат на терен и ќе ја следат состојбата во текот на наредните денови.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Постапката за екстрадиција на Палчо ќе биде спроведена преку МВР, на осомничениот веќе му е определен притвор
Јавното обвинителство на Република Северна Македонија е известено дека Министерството за правда добило официјална информација од Република Турција дека се одобрува екстрадицијата на лице осомничено за две кривични дела грабнување, како и за две убиства на свиреп начин.
Постапката за екстрадиција ќе биде спроведена преку Министерството за внатрешни работи.
По предлог на Основното јавно обвинителство Скопје на осомничениот веќе му е определена мерка притвор која треба да започне да се применува веднаш по неговото испорачување, се додава во соопштението на Јавното обвинителство на Република Северна Македонија.
Македонија
Дозволена екстрадицијата на Љупчо Палевски Палчо
Министерството за правда преку писмено соопштение информираше дека е добиено официјално известување дека екстрадицијата на Љупчо Палевски е дозволена.
Претходно министерот за правда Кренар Лога на социјалните мрежи потврди дека е дозволена екстрадиција на Палевски.
„Ве информирам дека денес со официјална информација од Република Турција добивме одобрение за екстрадиција на лицето Љупчо Палевски. Позитивниот исход на постапката произлегува после сите максимално преземени мерки и активности од делокругот на надлежности на Министерството за правда.“
Љупчо Палевски е осомничен за убиствата на 14-годишната Вања Ѓорчевска и велешанецот Панчо Жежовски.
Македонија
Битиќи: Патриотски ќе одиме кон повисоки плати и пензии, кон „Едно општество за сите“
„Ова зад мене е Спомен-костурницата, симбол на прогресивното и мултикултурно Куманово, темелот на АСНОМ-ска Македонија. Градот кој во 2015 година го потресе трагедија која беше одраз на еден режим кој сакаше да ја скрши Македонија. Сеќавањата сè уште остро нè потсетуваат и опоменуваат на тие мрачни времиња кога ВМРО-ДПМНЕ ја држеше заробена државата во мрак исполнет со стравови“, вели во видео обраќање од Куманово, Фатмир Битиќи, потпретседател на СДСМ и ко-носител на листата на кандидати за пратеници на Коалицијата за европска иднина во Изборна единица 2.
Тој нагласува дека СДСМ седум години градеше општество на соживот, меѓусебно разбирање и почитување на различностите, притоа предупредувајќи дека „наследниците на режимот бараат повторно да се издигнат од пепелта, нивната шовинистичка политика повторно надвиснува над Македонија“.
Битиќи предупредува дека со ВМРО-ДПМНЕ и неговиот национализам постои опасност државата да се врати во периодот кога имаше поделби на етничка и религиозна основа.
„Со ВМРО-ДПМНЕ и нивниот национализам може само да се вратиме во времето кога вештачки се обидуваа да креираат поделби и раздори на етничка и религиозна основа. На овие парламентарни избори, секој глас за нив, е глас за времињата налик на тие од 11 години режим. Но наспроти нив, стоиме ние, СДСМ и Коалицијата за европска Македонија, со кои, патриотски, а не националистички, ќе одиме кон повисоки плати, повисоки пензии и пред сè, кон Едно општество за сите“, вели Битиќи.