Европа
Османи за соработката на ОБСЕ со Азиските партнери: Заедничките безбедносни предизвици бараат заеднички одговор

Европа и Азија се соочуваат со заеднички безбедносни предизвици. Војната на Русија против Украина има негативен ефект врз глобалните текови и затоа од големо значење е придонесот на нашите Азиски партнери за безбедноста во регионот на ОБСЕ.
Ова го истакна Претседавачот со ОБСЕ и министер за надворешни работи, Бујар Османи во неговото видео обраќање на Конференцијата „Европа и Азија: Решавање на заедничките предизвици во непредвидливата глобална безбедносна средина преку мултилатерална соработка“, организирана од ОБСЕ во Виена.
„Постои блиската и нераскинлива меѓусебна поврзаност помеѓу безбедноста во регионот на ОБСЕ и безбедноста на неговите соседи. Всушност, во нашиот глобален свет, сè повеќе предизвици се заеднички. Со заедничките предизвици, сепак, доаѓаат и заеднички можности. Затоа е од клучно значење за нас да работиме заедно, да учиме едни од други и на крајот да го заживееме мултилатерализмот“, рече Османи.
Како клучен елемент на работата на ОБСЕ и на Претседавањето на Северна Македонија со Организацијата, рече Османи, е унапредување на безбедноста на луѓето што е предуслов за нивната благосостојба. Таа може да се постигне преку:
„Зајакнување на дијалогот, споделување на заложби, размена на експертиза, заедничко идентификување на области од заеднички интерес и генерирање на идеи за заедничко справување со безбедносните предизвици – сето тоа се начини на кои Европа и Азија можат да ги зајакнат своите врски и нивната безбедност“, истакна тој.
Османи ги повтори клучните приоритети на Претседавањето на Северна Македонија со ОБСЕ, безбедноста, со посебен акцент на сајбер безбедноста, климатските промени, човековите права, демократијата и владеењето на правото. Сите овие области се соочуваат со предизвици што директно влијаат и на безбедноста, поради што соработката во ова време е суштинска за справување со нив.
„Од ефективната соработка во справувањето со предизвиците од безбедносните закани помеѓу ОБСЕ и нашите Азиски партнери придобивки може да има целиот регион на ОБСЕ“, рече Османи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Ковчегот на папата Франциско затворен, погребот в сабота наутро

Од средата наутро, кога телото на покојниот папа Франциско беше пренесено во базиликата „Свети Петар“, низ неа поминаа 150.000 луѓе од целиот свет. Ковчегот на папата беше затворен вечерва, а погребот ќе се одржи в сабота наутро.
Пред церемонијата на запечатување, во ковчегот на папата беа поставени 12 монети, по една за секоја година од неговиот понтификат, како и краток запис и извештај за неговото папство. Церемонијата ја водеше кардиналот Кевин Фарел, камерлегно на Светата Римска црква.
Реки верници доаѓаат во Рим за да присуствуваат на утрешниот погреб на папата Франциско, а се очекува и пристигнување на бројни делегации од целиот свет.
Во Рим се воведени строги безбедносни мерки, со илјадници волонтери и полицајци, систем против дронови, снајперисти на покривите и борбени авиони подготвени за полетување.
Европа
Жена во Шпанија ја продала новородената ќерка за 2.000 евра на двојка која не можела да има деца

Шпанската полиција уапси 37-годишна жена која ја продала својата новородена ќерка на пар кој се лекува од неплодност, јавува АФП.
Полицијата соопшти дека жената била уапсена минатиот месец во Мостолес, јужно предградие на Мадрид. Брачен пар осомничен за купување дете и двајца нивни роднини беа уапсени во јужниот град Кордоба.
Според прелиминарната истрага, жената се согласила да им ја предаде својата новородена ќерка на двојката за 2.000 евра. Сепак, по породувањето, таа се предомислила и побарала да ѝ го вратат детето.
Двојката, според АФП, одбила да го врати бебето освен ако жената не им го врати платениот износ, плус дополнителни 1.000 евра за покривање на трошоците што тврделе дека ги направиле во текот на месецот што го поминале со неа во Кордоба пред да се роди детето.
Полицијата започна истрага откако една жена поднесе жалба тврдејќи дека семејство во Кордоба го „киднапирало“ нејзиното новородено бебе. Детето е предадено во центар за заштита на деца во Кордоба. Полицијата, исто така, објави дека властите ѝ одзеле уште шест деца на жената во 2022 година поради занемарување.
Европа
Зеленски: Подготвени сме да разговараме за територија, но само под еден услов

Украинскиот претседател Володимир Зеленски изјави денес дека Украина ќе биде подготвена да разговара за територијални прашања како дел од мировните преговори, но само откако Русија ќе се согласи на целосен и безусловен прекин на огнот.
„Целосно и безусловно примирје отвора можност да се разговара за сè“, изјави Зеленски пред новинарите во Киев.
Тој ја коментираше и изјавата на американскиот претседател Доналд Трамп, кој во интервју за „Тајм“ изјави дека „Крим ќе остане со Русија“.
„Она што го кажува претседателот Трамп е вистина. Се согласувам со него дека денес немаме доволно оружје за да ја вратиме контролата врз Кримскиот Полуостров“, рече Зеленски.
Да потсетиме дека украинските претставници претходно решително ја отфрлија можноста за какви било територијални отстапки во замена за мир со Русија.