Македонија
Петровска на свеченоста за Денот на Командата за операции: Оваа команда е столбот на македонската Армија
Министерката за одбрана, Славјанка Петровска, денеска, во касарната „Боро Менков“ во Куманово, се обрати на свеченоста по повод 17 Октомври, Денот на Командата за операции, најмногубројната команда во Армијата, која во себе ги вклучува сите видови армиски родови и служби.
Министерката Петровска оваа команда ја нарече „столбот на нашата Армија“, која многупати ги покажа своите квалитети.
„Командата за операции во текот на сите овие години ги покажа своите квалитети. Во вашата структура е Лесната пешадиска баталјонска група, нашиот НАТО-состав, кој интензивно се обучува и се опремува со најнова и најсофистицирана опрема. Припадниците на Армијата, кои со своето учество во мултинационалните сили на НАТО во Латвија, Романија и во Бугарија, даваат суштински придонес кон колективната безбедност на НАТО, во најголем дел доаѓаат токму од оваа Команда. Вашите припадници беа упатени и во Словенија во помош и поддршка на нашите сојузници во справувањето со големите поплави“, рече министерката.
Петровска истакна и дека војниците, кои се секогаш и секаде подготвени да им помогнат на граѓаните при елементарни непогоди, доаѓаат токму од единиците што се во рамките на Командата за операции, што го покажува нејзиното значајно место во одбраната. Додаде дека Министерството продолжува активно да инвестира и во подобри услови и поголема мотивираност на секој армиски припадник.
„Процесот на модернизација и опремување, чии резултати се веќе видливи, е процес што ќе продолжи да се движи со позабрзано темпо. Во буџетот, кој е во фаза на планирање за в година, се издвојуваат 2 процента од домашниот бруто-производ за одбраната, а една третина и понатаму ќе биде наменета од тој буџет за продолжување на процесот на модернизација. Тоа значи дека можеме со сигурност да кажеме дека Армијата ќе продолжи континуирано да се опремува со нова, модерна и софистицирана воена опрема“, истакна министерката.
На свеченоста се обрати и командантот на Командата за операции, бригадниот генерал Бесник Емини, кој порача дека Командата за операции како еден од главните столбови на одбраната во континуитет работи на способностите и вештините на единиците.
„Развојот на човечкиот потенцијал, како и подобрувањето на условите за работа, се од особено значење и претставуваат главен предуслов за адекватен развој на вооружените сили и главен фокус на лидерите во Армијата“ и додаде дека амбиција на Армијата е во континуитет да се приспособува со цел успешно пресретнување и справување со новите предизвици и закани.
Генералот Емини на војниците им порача да продолжат успешно и со ентузијазам да ги извршуваат обврските и задачите бидејќи само со посветеност, интегритет и храброст ќе придонесат за натамошно градење на ликот на Армијата.
По повод Денот на Командата за операции, беа доделени стимулативни мерки, а 1. пешадиски баталјон е прогласен за најдобра единица во Командата.
Денот на Командата за операции, 17 Октомври, е денот кога во 1887 година за време на македонското Кресненско востание е формиран првиот воен штаб на воена формација во македонската историја.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Посебен сообраќаен режим утре и задутре во Тетово поради предизборни митинзи
СВР Тетово информира дека поради одржување на митинзи на политичките партии во рамки на предизборната кампања во следните два дена (недела и понеделник) ќе има посебен сообраќаен режим во центарот на градот.
– Ќе се воведе посебен режим на сообраќајот и тоа по булевар „Илирија“од влезот на Тетово сè до плоштадот, односно кружниот тек со булевар „Илинденска”, при што нема да се дозволува паркирање на возилата низ булеварот. Исто така, за време на митинзите сообраќајот ќе биде пренасочен по другите улици, и тоа по улиците „ЈНА“, „Тодор Ципоски-Мерџан”, „Јане Сандански“ и улица „Никола Тесла“, се вели во соопштението на СВР Тетово.
Отттаму со апел возачите да бидат трпеливи и да ги почитуваат наредбите што ќе ги издаваат полициските службеници.
Македонија
Ковачевски: Имаме задача да не се откажеме од европскиот сон за подобра и просперитетна држава за идните генерации
„Нашата генерација има задача да не се откаже од европскиот сон на земјата и да направи сè за Македонија да стане рамноправна членка на Европската Унија“, порача претседателот на СДСМ, Димитар Ковачевски, на митингот на Коалицијата за европска иднина во Кичево.
Ковачевски истакна дека денеска кога чествуваме 121 година од смртта на македонскиот револуционер, идеолог и учител, Гоце Делчев, важно е да се потсетиме дека низ историјата нашиот народ не се откажувал дури ни пред најтешките предизвици. Порача дека 8 мај е нов историски крстопат, денот кога сите прогресивни и демократски сили во државата треба да одлучат државата одлучно да продолжи на патот кон Европската Унија.
„Само така ќе изградиме подобра и просперитетна држава за идните генерации. Држава со европски животен стандард, европски вредности, европски правила на игра“, рече Ковачевски.
Ако ВМРО ДПМНЕ и Силјановска се дограбат до власта, ќе стават рампа на патот на Македонија кон Брисел и ќе можеме да се збогуваме од ЕУ, истакна Ковачевски.
„Не смееме да ја повториме грешката од минатото и да дадеме преголема моќ во рацете на десничарска партија како ВМРО ДПМНЕ. Уште се свежи раните што ѝ ги нанесоа на државата за време на нивното 11-годишно владеење на Македонија. Сетете се на заробените медиуми, замолчените вработени во јавниот сектор, натепаните студенти во библиотеките и плоштадите. Сетете се на милионите потрошени за жални врби, лажен барок, евтин стиропор само за да се богатат поединци од ВМРО – ДПМНЕ“, истакна Ковачевски.
Лидерот на СДСМ пред граѓаните на Кичево најави повисоки плати и пензии, пакети за поддршка на учениците и студентите, одговорна социјална политика и одлучна борба против криминалот и корупцијата.
Македонија
Проданоски: Експресниот пат Градско-Прилеп ни од далеку не е готов, да ставиме крај на лагите на СДСМ на 8 мај
Тука сме на лице место за да ги разобличиме лагите кои што СДСМ се обидуваат да ги пласираат до јавноста, рече Дејан Проданоски, претседател на ОК на ВМРО-ДПМНЕ Прилеп.
– Овде во Дреновската клисура каде што сме на самиот старт на почетни градежни активности, а за кои што слушнавме дека во 90 % експресниот пат е завршен. Овие се истите лаги исто како оние на почетокот на нивниот мандат кога Фејсбук и Гугл чекаа на граница, истите лаги како фабриката за автомобили во Тетово. Но, македонските граѓани треба да видат и да знаат дека овде на ова место е сам старт на почеток на градежни активности, а не е видлив ниту крајот на она како што тие сакаат да го пласираат. Да не зборувам тука и за третата фаза од експресниот пат за која што има обезбедено средства и за која што можеше исто да биде завршена ако не беа платени пеналите кон компанијата на која што и се бараше рекет за да остане да го гради автопатот и се изгуби значително голем период од изградба на патот и барање на друга компанија, рече тој.
На лагите од СДСМ им нема крај, овие лаги мора да завршат, затоа на 8-ми мај ве повикувам сите да заокружите број 2 за да и ова автопатско решение биде завршено и биде ставено во функција на секој граѓанин на Република Македонија, додаде Проданоски.