Македонија
Прва конститутивна седница на Советот на социјална сигурност

Советот за социјална сигурност денеска ја одржа првата конститутивна седница во Министерството за труд и социјална политика.
Министерката Јованка Тренчевска во своето воведно обраќање до членовите на Советот ја истакна улогата на овој Совет која е од големо значење за заштита и промоција на социјалните права и интереси на корисниците на пензија, преку преземање мерки за унапредување на социјалната положба и подобрување на животниот стандард на корисниците на пензија.
„Подобрувањето на квалитетот на живот на старите лица и обезбедување достоинствена старост е еден од приоритетите на Владата на Република Северна Македонија и Министерството за труд и социјална политика. Во таа насока се сите политики и мерки кои заедно со граѓанскиот сектор, ги креираме и имплементираме“, истакна Тренчевска.
Таа се осврна на последните измени на Законот за пензиското и инвалидското осигурување, со кои се воведе нова методологија на усогласување на пензијата, а ќе почне со исплатата на септемвриските пензии. Согласно измените, пензиите ќе се усогласуваат со комбиниран модел од 50% пораст на просечната плата и 50% пораст на трошоци на живот.
Согласно дневниот ред на денешната седница, се изврши избор на претседател и заменик претседател на Советот за социјална сигурност. За претседател на Советот е избран д-р Стојанче Стефановски, а заменик претседател Станка Трајкова.
На седницата беа изгласани и измени на Деловникот за работа на Советот за социјална сигурност, согласно кои седниците ќе се свикуваат најмалку еднаш во годината, замена на отсутен член на Советот и седниците ќе ги отвора претставник на Министерството за труд и социјална политика.
Пред присутните членови на Советот беше образложена и Информацијата за состојбата со средствата за Солидарен фонд, согласно која средствата за посмртнина кои се исплаќаат од Солидарниот фонд, изминатиот период беа намалени, ќе се враќаат кај граѓаните. Притоа беше образложено дека, настаната ситуација е резултат на зголемениот број на починати пензионери во време на пандемија. При што, Одборот на регистрирана организација за Солидарен фонд донесе времена одлука за зголемување на износот за задршка за посмртна помош и намалување на средствата за исплата за посмртнина на 25.000 денари. Со право на исплата од 5000 денари до редовна исплата од 30.000 денари. Разликата од 5000 денари ќе почне да се исплаќа со јулската исплата на пензии.
Министерката Тренчевска на членовите на Советот им посака плодни и конструктивни седници на ова значајно тело чија цел е заштита и унапредување на социјалните права и интереси на корисниците на пензија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
По врнежите од дожд и силните ветрови кои зафатија делови од државата, нема пријавени штети, соопшти ЦУК

По врнежите од дожд и силните ветрови кои зафатија делови од државата, до овој момент до Центарот за управување со кризи не се пријавени материјални штети или повредени лица, информираат од таму.
„Директорот на ЦУК, Мухамед Али, заедно со вработените од Оперативниот сектор и Дежурната служба, внимателно ја следи состојбата на терен.
Центарот за управување со кризи останува во постојана готовност и продолжува со координирани активности за обезбедување брза и ефективна институционална реакција при евентуални потреби“.
Македонија
Зголемена фреквенција на возила надвор од градските средини

Поради изведба на проектот „Изградба на патна делница Градско – клучка Дреново“, дел од Коридор 10д, ќе има временa изменa на режимот на сообраќај на Експресниот пат А1, делница Градско – Дреново. Измените ќе важат од 04.08.2025 до 16.09.2025 година, при што сообраќајот ќе биде пренасочуван и регулиран со поставена соодветна сообраќајна сигнализација, соопшти АМСМ.
Според информацијата, во целост е отворен за сообраќај државниот пат А1 Градско – Прилеп од раскрницата кај бензинската станица Лукоил до клучката кај бензиската станица Салида.
Сообраќајот на државните патишта се одвива непречено, по претежно влажни коловози.
Интензитетот на сообраќај на патните правци надвор од градските средини е зголемен. Поради летните одмори се бележи зголемена фреквенција на возила, но на граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Таравари од човек со став, стана потрчко на Ахмети, велат од ВМРО-ДПМНЕ

ДУИ и нивните сателити реагираа. А и како не би врескале, кога Таравари конечно го положи испитот на максимална послушност, велат од ВМРО-ДПМНЕ.
„Од АА на Таравари сега слушаме апсурдна логика: ако ВМРО-ДПМНЕ ги критикува, значи се на вистинскиот пат. Не, не сте!
Вие сте на патот на ДУИ. А тоа значи: пат на корупција, клиентелизам и лични договори зад грбот на народот. Кога ДУИ ќе ви аплаудира, кога нивните портали ќе ве бранат, кога поранешни противници ќе ве фалат, знаете дека сте направиле нешто многу погрешно“.
Во соопштението од владејачката партија велат дека Арбен Таравари не е нападнат затоа што некој се плаши од него. Напротив, додаваат од ВМРО-ДПМНЕ, жално е да се гледа како еден лекар, некогаш со кредибилитет, сега мора да се правда преку соопштенија на ДУИ и да се радува кога тие го „тапкаат“ по рамото.
Од ВМРО-ДПМНЕ оценуваат дека партијата е „нападната затоа што е пречка за криминалот на ДУИ и нивните нови соработници.
И тоа е вистинската причина за нервозата. А Таравари, колку и да се труди, нема да може да ја избрише вистината: од човек со став, стана човек со валкани домашни задачи. Да потпишува партиски соопштенија напишани во Мала Речица.
Дали е на „вистинскиот пат“, најдобро покажуваат анкетите. Од 2,7% поддршка, падна на 1%, а според некои и под 1%. Ако тоа значи да си на вистинскиот пат, да станеш потрчко на Ахмети, и да ти се сруши рејтингот тројно, тогаш навистина „добар пат“ има фатено.
На добар пат е Таравари да ја доживее целосната НДП-изација и ДПА-изација на својата структура. Да се сведе на 3–4 илјади клиентелисти што ќе чекаат Ахмети да им додели некоја функција или тендерче, со некоја идна влада на СДС, ако некогаш таква се случи. Таков е нивниот „пат“, таква им е стратегијата – и тоа е нивно право“.
Наше право и обврска како ВМРО-ДПМНЕ, велат од партијата на Мицкоски, е да внимаваме во иднина, во која било идна коалиција, никогаш да нема Таравари или некој сличен по „интегритет“.
Му порачуваат на Таравари да си ги обнови релациите со Филипче и со Заев и нека остане, како што велат, во друштво во кое најдобро се пронаоѓа.
„Ахмети ќе му најде место. А народот, ќе си пресуди. Како што знае“.