Македонија
Продолжуваме со унапредување на антикорупциската правна рамка, порача Лога

Министерот Кренар Лога во рамките на двете сесии од денешниот форум ја поздрави заложбата на ЕУ за вклучување на земјите кандидати во својот извештај за владеење на правото како инструмент за рана детекција или превенција на проблемите со владеењето на правото. Ваквиот чекор на ЕУ претставува воспоставување еднаква основа со земјите членки во поглед на следењето на тековните реформи и ќе биде од особено значење во процесот на забрзана интеграција, што дополнително ќе ни помогне при идентификување на состојбите во областа во која ќе бидат потребни подобрувања.
Се осврна и на клучниот елемент на континуираното усогласување на правната рамка со законодавството на ЕУ за која Република Северна Македонија во областа на правосудството бележи исклучителен напредок за што сепак од одлучувачка природа ќе биде нивната имплементацијата идниот период. Фокусот во наредниот период ќе биде ставен на донесување на новата развојна стратегија за правосудниот систем (2023 – 2027) и спроведување на активностите од нејзиниот акциски план.
Во однос на регионалниот проект за набљудување на судските процеси – борба против организираниот криминал и корупцијата во Западен Балкан, истакна дека извештајот со понудените препораки и мерки ќе придонесе кон зајакнување на функционалноста и ефикасноста на правосудниот систем и ефикасната борба против организираниот криминал и корупцијата. Продолжуваме со натамошно унапредување на антикорупциската правна рамка, која ги следи европските и меѓународните стандарди. Министерот Лога изрази задоволство што ЕК ја прифати иницијативата на Северна Македонија и Република Албанија досегашното следење на предметите преку ексел-табели да го замени со нов софистициран систем – е-платформа за собирање податоци за корупција и организиран криминал.
Од почетокот на руската агресивна војна против Украина, многубројни извештаи, за жал, укажуваат дека се извршени и се вршат злосторства против човештвото и воени злосторства. Меѓународното хуманитарно право мора да се почитува и сите одговорни за воените злосторства треба да одговараат за своите постапки и да бидат изведени пред лицето на правдата.
Да го вратиме мирот преку соработка, солидарност и почитување на човековите права и владеењето на правото. Најважни се нашата безбедност и просперитетот, кои се тесно поврзани и не може да опстојат доколку не се во меѓусебна корелација, беше истакнато.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Земјотрес рано утринава ги разбуди граѓаните на Валандово и на околината

Утрово во 5:54 часот, земјотрес со јачина од 3,3 степени според Рихтеровата скала го стресе регионот околу Валандово, информира Сеизмолошката опсерваторија при Природно-математичкиот факултет во Скопје.
Телеметриската сеизмолошка мрежа на Македонија го регистрирала потресот на неколку сеизмолошки станици ширум државата, при што е утврдено дека епицентарот се наоѓа во епицентралното подрачје Валандово, оддалечено околу 120 километри југоисточно од главниот град.
Според првичните информации од Сеизмолошката опсерваторија, земјотресот бил почувствуван во Валандово и околните населени места со интензитет од IV степени според Европската макросеизмичка скала (EMS).
Засега нема информации за причинета материјална штета или повредени лица, но локалното население на социјалните мрежи известува дека потресот бил „краток, но силен“, и ги разбудил во раните утрински часови.
Сеизмолозите продолжуваат да ја следат ситуацијата и ги повикуваат граѓаните на смиреност, посочувајќи дека ваквите потреси се честа појава во сеизмички активниот регион на југоисточна Македонија.
Македонија
Колони на границите, на „Богородица“ се чека до 40 минути, на „Табановце“ до 30 минути

Сообраќајот на државните патишта се одвива непречено и по суви коловози, но фреквенцијата на возила, особено кон граничните премини, денеска е значително зголемена, информира Автомотосојузот на Македонија (АМСМ).
Најголема гужва има на Граничниот премин Табановце, каде времето на чекање за влез и излез од државата е од 15 до 30 минути. На Богородица ситуацијата е уште поинтензивна – за излез од државата се чека до 40 минути, додека на ГП Дојран времето на задржување е 20 до 30 минути.
„Состојбата на патиштата е стабилна и коловозите се суви, но фреквенцијата е зголемена. Апелираме до сите учесници во сообраќајот да возат внимателно, со прилагодена брзина и да ја почитуваат сигнализацијата, особено на делниците каде што има опасност од одрони“, велат од АМСМ.
Посебна претпазливост се препорачува на патните правци низ котлините, речните долини и клисурите – Катланово – Велес, Маврово – Дебар – Струга, Виница – Берово и Кочани – Делчево – каде што постои ризик од појава на одрони.
На останатите гранични премини од македонска страна, нема подолги задржувања за влез и излез од државата.
Македонија
Денес сончево со ветер, од утре повторно температурата во постепен пораст

Управата за хидрометеорологија (УХМР) за денес прогнозира претежно сончево време со умерен до засилен ветер од северен правец, кој наместа ќе достигнува брзина од 60км/ч.
Минималната температура ќе биде во интервал од 11 до 20, а максималната ќе достигне од 27 до 36 степени.
Во Скопје, сончево со умерен до засилен северен ветер. Минималната температура ќе се спушти до 19, а максималната ќе достигне до 35 степени.
Од понеделник следува период на стабилно и потопло време со постепен пораст на дневнaтa температура.