Македонија
Работни средби на Грковска во Брисел: Продолжува силната поддршка од европските институции за забрзан напредок на нашата земја

Со денешните средби со Ангелина Ајхорст, извршна директорка за Европа и Централна Азија при Европската служба за надворешни работи (ЕЕАС) и Сајмон Мордју, советник за надворешна политика на претседателот на Европскиот совет, се заокружи работната посета на Брисел на заменичката на претседателот на Владата задолжена за политики за добро владеење, Славица Грковска.
Ајхорст на средбата истакна дека Северна Македонија има бројни пријатели во Брисел како никогаш порано и дека тие силно се залагаат за успех во нашиот евроинтегративен процес. Во таа насока, двете соговорнички се согласија дека е клучен напредокот во владеењето на правото, како и во разрешувањето на предмети поврзани со висока корупција. Во однос на претстојните избори, Грковска истакна дека владата е посветена на организирање фер и правичен изборен процес, како показател за демократскиот напредок на земјата.
Грковска и Ајхорст се осврнаа и на ефектите од геополитичките случувања врз земјите од регионот, вклучително и на руската агресија врз Украина. Вицепремиерката ја истакна безрезервната поддршка на Северна Македонија за пријателска Украина, и изрази уверување дека таа ќе продолжи и покрај бројните предизвици произлезени од глобалните кризи.
Грковска попладнево одржа средба и со Сајмон Мордју, советник за надворешна политика на претседателот на Европскиот совет, Шарл Мишел, на која тој нагласи дека проширување на ЕУ ќе има и дека Северна Македонија не смее да ја испушти оваа шанса. На средбата беше потенцирано дека нема промена на преговарачката рамка, и во таа насока клучни се уставните измени, со кои ќе се надминат пречките за нашата земја во пристапниот процес.
На средбата со Мордју стана збор за Планот за раст за Западен Балкан, кој цели кон забрзување на реформските процеси во целиот регион. Во тој поглед вицепремиерката Грковска ги истакна активностите преку кои политиките на добро владеење се вградуваат во институциите, вклучувајќи ја и дигиталната трансформација на општеството, која овозможува воведување ефикасни алатки за борба со корупцијата и организираниот криминал.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ призна дека ги прислушкувал Мицкоски, новинари и бизнисмени, вели Петрушевски

СДСМ призна дека го прислушкувал и го следел претседателот на ВМРО-ДПМНЕ, Христијан Мицкоски, како и новинари и бизнисмени, обвинуваат од ВМРО-ДПМНЕ. Претеникот Бране Петрушевски истакна дека ова признание открива целосно злоупотребување на државниот апарат за политички цели.
„СДСМ прво тврдеше дека не прислушкувале и не следеле никого, а сега, преку ова признавање, се обидуваат да ја свртат приказната за 180 степени со глупи тези за наводната содржина на материјалите“, изјави Петрушевски.
Според него, признанието на СДСМ ги потврдува двете клучни точки:
– „Прво, го следеле и прислушкувале претседателот Мицкоски.“
– „Второ, иако прислушкувале пет години, велат дека не нашле ништо спорно или противзаконски. Доколку нешто било спорно, велат, ќе отвореле постапка одамна“.
„Со ова, СДСМ го дава најголемиот доказ дека целиот државен апарат бил ставен во функција за тие да опстанат што подолго на власт“, рече Петрушевски.
Тој додаде дека Јавното обвинителство не смее да молчи.
„Очекуваме веднаш акција и разрешница. Нема време за одлагање кога станува збор за ваква злоупотреба на институциите“, истакна пратеникот.
Петрушевски нагласи дека ваквиот скандал не смее да остане неказнет, и дека граѓаните очекуваат одговорност од сите кои учествувале во прислушкувањето.
Македонија
Учениците се оставени без учебници, родителите печатат материјали од Вибер, реагираше СДСМ

Образовниот систем во Македонија ја почна хаотично новата учебна година, откако се покажа дека учениците немаат учебници, иако од ВМРО-ДПМНЕ го ветуваа спротивното.
„Иако во предизборните ветувања беше кажано дека сите ученици ќе добијат нови учебници, вистината е сосема поинаква. Самата министерката Јаневска призна дека учебници нема, иако се потрошени над 11 милиони евра од буџетот на граѓаните“, истакнуваат од СДСМ.
Недостасуваат учебници за математика и историја за 8-мо одделение, а родителите се приморани да печатат материјали од Вибер-групи. Проблемот е уште поголем за стручните училишта, каде што цели генерации немаат учебници по управно, процесно, правно и државно уредување.
„Учебници има само за најмалите ученици, од прво до трето одделение, додека за четврто и петто одделение ситуацијата е катастрофална. Одговорноста за овој хаос е кај министерката Јаневска и премиерот Мицкоски. Тие излажаа и ги изневерија учениците, родителите и наставниците“, велат од СДСМ.
Од партијата додаваат дека ваквите состојби не смеат да се повторуваат и повикуваат на итна интервенција за обезбедување учебници за сите ученици.
Македонија
Ѓолека, Јаоски и Азизи влегуваат во трка за градоначалници, сподели Али Ахмети

Претседателот на Демократската унија за интеграција, Али Ахмети, вчера ја свика 23-та седница на Централното претседателство на партијата, каде се дискутираше за актуелните политички случувања, мобилизацијата на Националната алијанса за интеграција и претстојниот референдум закажан за 19 октомври.
На седницата едногласно беа усвоени три нови кандидатури за градоначалници: Фламур Ѓолека за Долнени, Али Јаоски за Пласница и Исамедин Азизи за Бутел.
„На 19 октомври народот ќе го врати достоинството и ќе ја потврди својата историска улога. Убеден сум дека ќе извојуваме плебисцитарна победа која ќе биде наша заедничка гордост“, изјави лидерот на ДУИ, Али Ахмети, по завршувањето на состанокот.
ДУИ најавува дека е во завршна фаза на селекција на сите кандидатури со кои Националната алијанса за интеграција ќе настапи на локалните избори.
„Сите сме на нозе, сите сме мобилизирани за победа, ова не е само партиска битка, туку битка за достоинството и иднината“, стои во соопштението на партијата.