Македонија
Собранието изгласа дека иницијативата на Тодор Петров е неуредна
Собранието утврди дека иницијативата на Tодор Петров за собирање 150.000 илјади потписи за распишување референдум не е уредна и не била согласно со Законот за референдум. Одлуката беше донесена со 49 гласа „за“, девет „против“, а тројца пратеници беа „воздржани“.
„Според изгласаниот заклучок, иницијативата не е уредна бидејќи не е во согласност со член 24 од Законот за референдум и други облици на непосредно изјаснување на граѓаните на кое се повикува подносителот. Прашањето содржано во граѓанската иницијатива за кое се предлага распишување дополнителен референдум е поставено пред донесување на актот што го уредува ова прашање, а референдумското прашање не е во согласност со името на државата. Согласно со член 19 од Законот за референдум и други облици за непосредно изјаснување на граѓаните, а имајќи го предвид веќе одржаниот референдум, граѓаните не може да се изјаснат повторно за исто прашање пред истекот на рокот од две години пред денот на одржаниот референдум“, рече претседателот Талат Џафери.
Пратеници на ВМРО-ДПМНЕ остро реагираа, откако Собранието го усвои овој заклучок со кој иницијативата на Петров не доби зелено светло. Тие прашуваа како може иницијативата на комсиите за политички систем и законодавно-правната комисија да ја оценат како уредна, а претседателот на Собранието да не го земе предвид комисиското мислење.
„Со ова господине Џафери уште еднаш потврдувате дека не е првпат да ги кршите процедурите и деловникот на Собранието. Не ги земате предвид мислењата на комисиските тела кои дадоа согласност дека иницијативата е уредна. Но, граѓаните гледаат и ќе судат за вашите постапки“, рече пратеникот на ВМРО-ДПМНЕ Трајчо Димков.
Пратеникот Никола Мицевски ги прозва пратениците кои се членови на комисиите како одеднаш го смениле мислењето дека иницијативата не е уредна.
„Се прашувам како вие колеги пратеници кои во комисиите гласавте дека иницијативата е уредна сега ќе гласате дека е неуредна. Ниту имаше дебата, ниту некој ја оспори уредноста на оваа иницијатива“, рече Никола Мицевски од ВМРО-ДПМНЕ.
Инаку, предлагачот Тодор Петров иницијативата ја поднесе уште во декември, но беше повлечена како неуредна. Во јануари тој ја поднесе во форматот како што налагаат процедурите и беше ставена на разгледување кај стручните собраниски комисии. Комисиите дадоа зелено светло, но таа со заклучок за кој гласаа мнозинство пратеници, беше отфрлена на денешната собраниска седница.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Џафери за порасната трева околу Владата: Градоначалничката доби соодветен одговор со изборниот резултат, граѓаните гледаат и вреднуваат
Техничкиот премиер Талат Џафери по денешниот отчет за сработеното во првите 100 дена од Владата што ја предводи, даде објаснување за порасната трева околу Владата за што имаше многу реакции од граѓаните. Одговарајќи на новинарско прашање за тревата, Џафери објасни дека тоа е обврска на Град Скопје, па од таму и изборниот резултат на партијата што ја предводи градоначалничката на Скопје, Данела Арсовска.
„Разбирам дека има реакции по тоа прашање. Според процедурите и прописите, земјиштето е сопственост и во надлежност на Град Скопје. Според договореното и обврските, ‘Паркови и зеленило’ како јавно претпријатие што се грижи за изгледот на градот е надлежно и за оваа работа. Владата ниту има предвидено средства ниту, пак, може да предвиди средства за работи што се надлежност на друга институција. Во овој контекст, јас жалам што излезе вака, но, секако, и на изборите соодветен одговор доби и градоначалничката на градот Скопје во однос на изборниот резултат. Граѓаните гледаат, граѓаните оценуваат, вреднуваат и си го дадоа својот одговор“, рече Џафери.
Нова алтернатива, партијата која на изборите ја предводеше градоначалничката Данела Арсовска, освои 3.516 гласа, односно 0,35 отсто од гласовите на запишаните избирачи.
Македонија
(Видео) Џафери: Груби ниту е Влада ниту е партија
Ниту Европскиот фронт ниту ДУИ не повикува ниту, пак, мотивира на бојкот, беше оставено на слободната волја на граѓаните да ја изразат на гласачкото место, рече премиерот Талат Џафери на денешната прес-конференција.
Во однос на бојкотот на Артан Груби на вториот круг на претседателските избори, Џафери рече дека неговиот став е индивидуален и дека не став ниту на Владата ниту на партијата.
„Индивидуалните ставови не може да се претставуваат како генерални ставови на субјектот. Груби ниту е Влада ниту е партија. Јас имав изјава како премиер на избирачкото место и потврдив дека ги зедов двете ливчиња и гласав. Индивидуалниот став не е општ став по кој може да се извлече заклучок. Нека си е министер, индивидуа е во однос на Владата, не е став на Владата, ниту на партиските органи. Индивидуално може да каже што сака, тоа е слобода и на мисла и на изразување“, одговори Џафери и додаде дека не може да се повикува на одговорност.
Македонија
Главчев: Се надевам дека Северна Македонија ќе ја продолжи европската перспектива, повеќе нема да правиме отстапки
Се надевам дека Северна Македонија ќе ја продолжи својата европска перспектива. Од наша страна, немаме каде да правиме повеќе отстапки. Згора на тоа, позицијата што ја имаме е паневропска позиција.
Ова го изјави вршителот на должноста премиер на Бугарија, Димитар Главчев по победата на кандидатот на ВМРО-ДПМНЕ Гордана Силјановска-Давкова на претседателските избори во Северна Македонија, јави „БГНЕС“.
„Да почекаме да видиме каква влада ќе се формира во Северна Македонија“, рече привремениот премиер.
Главчев додаде дека Бугарија нема повеќе да прави отстапки во однос на пристапните преговори на РСМ во ЕУ и ставот што го имаат е паневропската позиција.
„На нашите пријатели од Северна Македонија мора да им биде јасно дека ако не ги почитуваат барањата за прифаќање членство во ЕУ, тоа нема да функционира“.