Советот на Град Скопје на денешната седница ја усвои Одлуката за изменување и дополнување на ценовникот на услугите што ги извршува ЈП „Градски паркинг“. Со измените на оваа одлука ќе поскапе паркирањето за вработените во Клиничкиот центар, односно вработените во Клиничкиот центар наместо 300 ќе плаќаат 800 денари месечна карта за паркирање во комплексот на Клиничкиот центар.

Градоначалникот, Петре Шилегов истакна дека се укинува повластената цена од 300 денари и се врши усогласување со цените што ги плаќаат граѓаните за услугите на ЈП „Градски паркинг“. Тој образложи дека измените на цените се во насока на регулирање на сообраќајниот хаос во рамките на Клиничкиот центар.

„На Клиничкиот центар заради евтин популизам се издадени 1.500 месечни карти за кои вработените плаќаат повластени 300 денари во услови кога на паркингот има 670 места. За пациентите или корисниците на услугите на ЈП „Градски паркинг“ на Клиничкиот центар цената останува иста“, изјави Шилегов и додаде дека очекува намалување на хаосот, бидејќи досега граѓаните немале каде да паркираат.

Синдикатот на вработените во клиничкиот центар „Мајка Тереза“ реагираше дека од одлуката најпогодени ќе бидат вработените кои имаат ниски примања. Како што велат од синдикатот, оваа категорија вработени треба приближно еден месец во годината да работи за да го плати паркинг-местото на своето возило за време на извршување на своите работни обврски. Синдикатот претходно се закани дека ако Советот даде зелено светло за поскапувањето, ќе бидат принудени да превземат соодветни мерки за да ги заштитат правата и интересите на своето членство.

Реагираат и дел од докторите и останатиот медицински кадар на клиниката. По најавите за зголемувањето на цените за паркингот, во петокот доктор од клиниката за „Макфакс“ порача дека за вработените паркингот треба да биде бесплатен и обезбеден со картички. Оттаму додаваат дека приватните болници не наплатуваат паркинг-места за медицинскиот кадар, ниту, пак, за пациентите.