Македонија
Стојаноска од Брвеница: На 15-ти јули ќе се казни двапати аболицираниот политичар кој го пцуе својот народ
Носителот на изборна единица 6, Дафина Стојаноска заедно со претседателот на ВМРО-ДПМНЕ, Христијан Мицкоски ја посетија општината Брвеница, при што остварија средба и со мештаните. Стојаноска посочи дека на овие избори ќе се одлучи кој и како ќе ни се води државата. Таа кажа дека е време Заев да си оди од власта и дека е време за обнова на Македонија.
„За мене е огромна чест и одговорност да бидам носител на листа во која што се запишани луѓе кои си ја сакаат и чуваат Македонија. Луѓе кои се подготвени да се борат за правда и нејзин напредок, за честа и достоинството на сите нас, за заедничка корист за сите, а за ничија штета“, истакна Стојаноска.
Таа додаде дека изминативе три години македонскиот народ бил многу оштетен, ограбен, понижен, осиромашен, излаган и навредуван
„Заев си го исклучи воздухот кој што си го дишеше, ги искина жиците на клавирот и гитарата, а заборави на она што некогаш го вети. Ги предаде своите таткови и чичковци, и се прашувам што сега му објаснува на својот сопствен син за Македонија од која направи црна дупка“, посочи Стојаноска.
Таа рече дека ова доволно зборува за Зоран Заев и затоа на 15-ти јули од македонскиот народ ќе заврши како политички Пинокио.
„СДСМ во политичката понуда нема ништо ново, ги злоупотребија и ваучерите од Ковид пакетите, на граѓаните делат по 3-4.000 денар, а власта меѓу себе дели милиони. Јас верувам дека мојот народ на овие избори ќе го направи вистинскиот избор. Дека ќе им сврти грб на лажливите политичари кои правдата ја испорачуваат во торби полни со пари, кои викаа на цел глас низ Македонија дека нема правда и нема мир, а цела Македонија ја направија една огромна неправда за само три години. Наместо правдата на дело, Заев ги извади криминалците од затвор и истовремено ни ги креираше политиките на „Рекет 1“, „Рекет 2“, аферите „Кеш“, „Дрон“, „Леонардо“, „Боро Малборо“, „Марихуана“ итн.“, нагласи Стојаноска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Видео) Џафери: Груби ниту е Влада, ниту е партија
Ниту Европскиот фронт, ниту ДУИ не повикуваа, ниту мотивираа на бојкот, беше оставено на слободната волја на граѓаните да ја изразат на гласачкото место, кажа премиерот Талат Џафери на денешната прес-конференција.
Во однос на бојкотот на Артан Груби, на вториот круг на претседателските избори, Џафери кажа дека неговиот став е индивидуален и дека не став ниту на Владата, ниту на партијата.
„Индивидуалните ставови не можат да се претставуваат како генерални ставови на субјектот. Груби ниту е Влада, ниту е партија. Јас имав изјава како премиер на избирачкото место и потврдив дека ги земав двете ливчиња и гласав. Индивидуалниот став не е општ став по кој може да се извлече заклучок. Нека си е министер, индивидуа е во однос на Владата, не е став на Владата, ниту на партиски органи. Индивидуално може да каже што сака, тоа е слобода и на мисла и на изразување“, одговори Џафери и додаде дека не може да се повикува на одговорност.
Македонија
Главчев: Се надевам дека Северна Македонија ќе ја продолжи европската перспектива, повеќе нема да правиме отстапки
Се надевам дека Северна Македонија ќе ја продолжи својата европска перспектива. Од наша страна, немаме каде да правиме повеќе отстапки. Згора на тоа, позицијата што ја имаме е паневропска позиција.
Ова го изјави вршителот на должноста премиер на Бугарија, Димитар Главчев по победата на кандидатот на ВМРО-ДПМНЕ Гордана Силјановска-Давкова на претседателските избори во Северна Македонија, јави „БГНЕС“.
„Да почекаме да видиме каква влада ќе се формира во Северна Македонија“, рече привремениот премиер.
Главчев додаде дека Бугарија нема повеќе да прави отстапки во однос на пристапните преговори на РСМ во ЕУ и ставот што го имаат е паневропската позиција.
„На нашите пријатели од Северна Македонија мора да им биде јасно дека ако не ги почитуваат барањата за прифаќање членство во ЕУ, тоа нема да функционира“.
Македонија
Џафери не кажа дали е подготвен да оди во опозиција: Тоа е прашање кое зависи од исходот на преговорите за состав на нова влада
По отчетот за 100 – те дена техничка влада, техничкиот премиер Талат Џафери вели дека е фокусиран на обврските од сегашната влада чиј мандат се уште трае. На новинарско прашање дали е подготвен да оди во опозиција со оглед на неколкуте изјави на лидерот на ВМРО-ДПМНЕ, Христијан Мицкоски, дека нема да преговара за коалиција со Демократската унија за интеграција, Џафери не даде конкретен одговор.
„Јас сум премиер и размислувам за мандатот што треба да го завршам. Тоа се прашања на органите на партијата и во тој контекст да завршат преговорите, другото е прашање на исходот од преговорите за состав на нова влада“, рече техничкиот премиер Џафери.
Немаше конкретен одговор ниту на прашањето дали граѓаните треба да очекуваат тој да добие уште еден мандат како премиер оти неговата матична партија е дел од коалицијата која освои 19 пратенички мандати.
„Јас сум фокусиран на обврските на составот на Владата што ја водам, впрочем мандатот на оваа Влада е до избор на нова. Работата на конфигурацијата на новата влада е работа на преговори на политичките субјекти кои што добиле мандати во Собранието по изборите одржани на 8 мај. По тоа прашање треба да се очекува резултат од таму“, рече Џафери.
На парламентарните избори во средата коалицијата „Европски фронт“ на ДУИ освои 19 мандати, а нивниот опонент во албанскиот блок, коалицијата ВЛЕН доби 13 мандати.
Лидерот на ВМРО-ДПМНЕ кои освоија 58 мандати во Собранието, по изборите кажа дека преговара со ВЛЕН за состав на новата Влада