Македонија
Тасевски доби поддршка и од делегацијата на ЕУ: На 10 јануари ќе го затвориме небото над Македонија ако не се постапи по нашите барања

Претседателот на Синдикатот на контролорите на летање, Александар Тасевски, денес, на делегацијата на ЕУ во земјата ѝ реферирал за вчерашниот упад во контролата на летање, но и за сите случувања во М-НАВ. По средбата со претставниците на ЕУ, Тасевски рече дека добил поддршка и од нив, уште еднаш ги повтори барања на Синдикатот и најави дека на 10 јануари ќе го затворат небото над Македонија доколку Владата не постапи како што најави оти повеќе ниеден патник со авион кон и од Македонија не е безбеден.
„Бевме повикани во канцеларијата на ЕУ само поради вчерашниот напад на контролорот на летање. Очигледно дека и делегацијата на Европската Унија во нашата земја и амбасадорите ревносно ги следат сите случувањана не само во контролата на летање туку и во другите институции. Беа премногу добро запознаени со она што се случува и со сите овие лица што се инволвирани во сите овие настани. Ги разбраа нашите барања за професионализам и рекоа дека тоа се сосема нормални очекувања. Не треба да биде поинаку. Рекоа дека е нѐ следат, ќе ни дадат поддршка, ни стојат на располагање. Жално е што ова веќе одекнува насекаде. Ние моравме да ги известиме преку нашите институции со кои соработуваме, сите синдикати во Европа. Ја известивме светската организација на контролорите на летање, известени се меѓународните организации, како ‘Еуроконтрол’. Ова веќе ги преминува границите на нашата држава бидејќи е очигледно дека во рамките на оваа држава, во рамките на нашите институции, не ја добиваме целосната поддршка за она што треба да се направи за контролата на летање да биде професионална во рамките на некое европско ниво“, рече Тасевски и најави дека европските синдикати се организираат со посета на Македонија да им дадат поддршка.
Тасевски рече дека МВР постапило по нивното барање и од синоќа ја обезбедува нивната зграда оти немаат доверба во нивното обезбедување, кое пропушти четири автомобили и овозможи упад во контролата на летање. Тие доцна синоќа, освен обезбедување, побараа и МВР веднаш да почне постапка за пронаоѓање на учесниците во целиот настан, да ги открие и вработените и лицата што не се вработени кај нив, а учествуваа во нападот. Ги повикуваа тројцата извршни директори во М-НАВ АД Скопје веднаш да си дадат оставки од функциите, пред сѐ, од морални причини поради ескалацијата на состојбата оти покажаа дека не може успешно да раководат со македонската навигација, ниту да ги заштитат своите вработени, како и самиот објект од упад на неовластени лица. Ги повикаа да не чекаат да бидат разрешени, како што доцна синоќа најави Владата.
Тасевски вели дека нивните следни чекори зависат од Владата.
„Очекуваме дека ќе го исполнат она што го најавија преку медиумите, да ги разрешат, да постават соодветни кадри, да ја поведат постапката која ќе констатира дали има потенцијални криминали корупции, што и да е она што е противзаконски направено кај нас. Во случај тоа да не се реализира, решени сме од 10 јануари да го затвориме воздушниот простор над Македонија од причина што веќе не станува збор само за подобрување на работните услови, сега имаме битка што се води за обезбедување и гаранција на безбедноста на секој патник што патува со авион“, најави Тасевски.
Владата доцна синоќа најави дека на следната седница ќе го разреши целото раководство во М-НАВ и ги повика Јавното обвинителство, Државната комисија за спречување корупција, Управата за финансиска полиција и меѓународните тела за контрола на авиосообраќајот да направат целосна ревизија на досегашното работење на М-НАВ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Филипче и СДС нека се освестат, го трансформираме здравството во сервис на граѓаните, конечно се реконструира КАРИЛ, велат од ВМРО-ДПМНЕ

„Венко Филипче и СДС треба да почнат да се освестуваат. Филипче кој беше министер за здравство во владата на СДС очигледно е дека не направи ништо за ресорот, освен што местеше тендери и се обидуваше да распродава области од здравството, како лабораторски от дел, стерилизацијата и слично“, велат од ВМРО-ДПМНЕ.
„Ако на Филипче интересот му е насочен кон здравството, еве ние го информираме да се смири бидејќи листите за снимања во ПЕТ центарот се двојно намалени, акцелераторот кој не работеше скоро осум години на Онкологија сега е во функција, и да сега ќе се реконструира Клиниката за анимација, реанимација и интензивни лекување или позната како КАРИЛ и да, поради тоа ќе функционира со намален капацитет, но пациентите ќе бидат згрижени. Пациентите ќе ги преземат ГОБ „8 Септември“, Хируршката клиника „Св. Наум Охридски“ и Клиниката за неврохирургија.
Што (не)направи Филипче за КАРИЛ?
Договор за реконструкција на КАРИЛ е потпишан на 15 март минатата година од страна на тогашниот министер Илир Демири. Што значи дека Филипче не направил ништо за време на неговото министерување. Знае ли Филипче воопшто какви се условите за пациентите на интензивните одделенија, или какви ги оставил по министерувањето, очигледно не.
За разлика од времето на Филипче, сега новото раководство ги заврши процедурите и ги обезбеди сите документи за безбедност за пациентите, стартува реконструкција.
Што се случуваше пак во времето на Филипче?
Ги остави болниците без интензивни одделенија, во пожарот во модуларната болница во Тетово изгореа 14 лица, во несреќата кај Ласкарци загинаа 16 лица поради нефункционален здравствен систем, во корона кризата животот го загубија десеттина илјади граѓани, а со тоа Филипче ја смести Македонија на високо петто место по смртност во светот.
На Филипче и СДС сега им останува само да се смират, се е под контрола Владата предводена од ВМРО-ДПМНЕ работи во корист на граѓаните и го трансформира здравството во вистински сервис за граѓаните“, соопшти ВМРО-ДПМНЕ.
Македонија
Милошоски: Кој бил мотивот на Коцевски незаконито да поставува ЈО кои ќе си вршат надзор над сопствени предмети?

Пратеникот на ВМРО-ДПМНЕ, Антонио Милошоски преку објава на социјалните мрежи аргументираше „зошто државниот обвинител е зрел за менување“.
„Аргумент плус дека државниот обвинител е зрел за менување дава и неговата Одлука за надзор, со која тој ги прекршил нормите од Законот за спречување на корупција и судир на интереси.
Поточно, на 07.10.2024г обвинителот Коцевски потпишува Одлука за вршење надзор на работата на Вишото обвинителство – Скопје и за таа цел формира работна група, во која битна улога И дал на обвинителката Лиле Стефанова. Но, Коцевски морал да знае дека обвинителка која што постапувала по одредени предмети во прв степен не е законито да врши надзор на истите предмети во втор степен“, вели Милошоски.
„Имено, обвинителката Лиле Стефанова лично учествувала и како обработувач и како застапник на поранешното СЈО во предметите „Поштенска банка“ и предметот „Драган П. Латас“, а потоа со одлуката на Коцевски добила противзаконито овластување да врши надзор за истите предмети кај нејзините колеги од вишото обвинителство.
Оваа одлука е дополнително контраверзна бидејќи во моментот на ангажирањето на Лиле Стефанова, обвинителот Коцевски знаел дека за неа се води истрага како осомничена во предметот „Бонусите на СЈО“ за незаконито примени 94.000€, кој предмет во втор степен по жалба се разгледувал токму во Вишото обвинителство- Скопје, каде таа добила задача да врши надзор. Личниот интерес на обвинителката Лиле Стефанова како осомничена не можел, а да не влијае на нејзиниот надзор или притисок кон колегите во ВЈО-Скопје.
Останува дилема кој бил мотивот на Коцевски незаконито да поставува ЈО кои ќе си вршат надзор над сопствени предмети?! Дали имал лукративен мотив, или имал цел да ја заштити групата од СЈО од сомневања за незаконско работење во замена за нивната поддршка, или можеби добил политички насоки?!
Но, без оглед на мотивите, со оваа постапка обвинителот Коцевски го прекршил начелото на професионалност во обвинителство, како и членовите 72 и 75 од Законот за спречување на корупција и судир на интереси.
Ова е уште еден пример за крупна професионална грешка од страна на Коцевски, во соработка со неговата колешка Лиле Стефанова, заради која истиот треба да си поднесе оставка или да биде разрешен од страна на Собранието!“, пишува Милошоски.
Македонија
(Видео) Мицкоски од Вашингтон: Македонија е верен сојузник на САД, направивме многу отстапки, Европа треба да биде принципиелна наместо со двојни стандарди

Премиерот Христијан Мицкоски вчера се обрати на конференцијата „CPAC“ во Вашингтон, при што ја искористи приликата да ја запознае американската публика со историските и културните знаменитости на Македонија.
„Македонците се многу традиционални, ги сакаат своите семејства, можеби сме малку, но македонската заедница во САД е многу важен дел од американското општество. Знам дека го подржаа претседателот Трамп за време на изборите, тие се конзервативци и знам дека ќе продолжат да го поддржуваат претседателот Трамп. И тоа што би го додал, а е важно, е дека и ние бевме избрани како нова власт со огромно мнозинство пред осум месеци“, рече премиерот Христијан Мицкоски објаснувајќи го македонското општество како мултиетничко со две третини Македонци, а една третина се Албанци, Власи, Срби, Турци, и други.
„Ние имаме голема дијаспора низ светот, речиси еднаква по бројност колку што живеат во татковината“, рече Мицкоски.
Опишувајќи ја Македонија како срцето на Балканот и југоисточна порта на Европа, Мицкоски нагласи дека како таква беше актуелна на патот на мигрантите пред извесен период кон Европа.
„Ние бевме на „фронтот“ и се боревме против илегалната миграција, штитејќи ја Европа од илегалните мигранти“, рече Мицкоски и посочи дека токму тоа денес е главниот фокус и на администрацијата на американскиот претседател Доналд Трамп.
Премиерот Мицкоски се осврна и на стратешкото партнерство на САД и Македонија, откако беше истакнато дека нашата земја е една од земјите со најголем придонес во НАТО по глава на жител.
„Одвојуваме над 2 проценти, посветени сме и ги поддржуваме политиките на претседателот Трамп и сметаме дека 2 проценти треба да биде ниската граница, а не високата“, рече македонскиот премиер Мицкоски на собирот на американските конзервативци во Вашингтон.
Публиката со аплауз ја награди забелешката на водителката на интервјуто кога забележа дека токму премиерот Мицкоски бил единствениот на Минхенската мировна конференција којшто аплаудирал на говорот на американскиот потпретседател Венс.
„За мене тоа беше историски настан и според моето скромно мислење, може некои европски политичари ќе ми се налутат, тој негов говор беше многу инспиративен. После говорот дел од публиката го критикуваа сметајќи дека тоа на некој начин е мешање во внатрешните работи на суверени држави“, забележа Мицкоски.
„Од самиот почеток на нашата самостојност од поранешната југословенска федерација ние имавме две стратешки цели. Прво да станеме полноправна членка на НАТО и втората е да станеме полноправен член на Европската Унија. Ние станавме членка на НАТО, но пред тоа го сменивме знамето, ја сменивме нашата валута, го сменивме нашиот Устав, го сменивме нашето име, затоа што некој од нашите соседи станал член на НАТО пред нас и го злоупотреби ветото за да ги исполни билатералните барања. Ако ова не е мешање во внатрешните работи тогаш што е?“, запраша Мицкоски, којшто потенцираше дека двојните стандарди продолжуваат и денес.
„Ние не сме во можност да станеме членки на ЕУ, затоа што повторно имаме притисок да го смениме нашиот Устав. Ако Уставот не е внатрешно прашање на суверена земја, тогаш се прашувам што е? Зарем тоа е фер? Ако некој го критикува говорот, кое според моето скромно мислење беше многу инспиративен, треба да си го впери прстот во себе и да види што тој прави. Европските вредности не се билатеризација на процесот на пристапување кон Унијата“, заклучи премиерот Христијан Мицкоски на интервјуто за време на најголемиот годишен собир на американските конзервативци во Вашингтон.