Македонија
Телото пронајдено во бездна кај Демир Капија е на исчезнатиот Илија по кого две години се трагаше

Илија Лазаревиќ, момчето што исчезна кон крајот на март 2021 година, е починатото лице што беше пронајдено во бездна кај местото наречено Просек, Демир Капија, на 27 март годинава.
Веста ја потврди мајка му Снежана. Таа вели дека местото на кое бил пронајден во минатото Илија честопати го посетувал бидејќи сакал да шета во природа. Бидејќи теренот е стрмен, најверојатно, се лизнал и така паднал во бездната.
„По две години потрага, нашиот син Илија Лазаревиќ од Демир Капија, наместо добра и убава вест да слушнам, слушнав тажна вест дека мојот син е најден мртов во Демир Капија на Просек во бездна. Погребот ќе биде утре, во 10 часот ќе биде изложен во капелата“, објави мајката на Илија.
За тоа дека било забележано тело во длабока бездна во Просек уште во март, информираа од СВР Велес, од каде што појаснија дека станува збор за непристапен терен, па специјални екипи дури по четири дена успеаја да го извлечат. Потоа телото беше предадено на обдукција, од која резултатите семејството ги добило дури сега.
Илија излегол од дома да се прошета и не се вратил повеќе. Мајка му во очај тогаш апелира до јавноста да помогне во пронаоѓањето на синот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Учество на Муцунски на состанокот на министрите за надворешни работи на НАТО: Нагласен фокусот на Алијансата врз Западен Балкан

На покана на генералниот секретар на НАТО, министерот за надворешни работи и надворешна трговија, Тимчо Муцунски, вчера и денес учествува на состанокот на министрите за надворешни работи на земјите членки на НАТО, кој се одржа во седиштето на Алијансата во Брисел, Кралството Белгија, информира Министерството за надворешни работи и надворешна трговија.
Состанокот претставува добра можност министрите заеднички и во поширок формат да се осврнат на актуелните безбедносни случувања кои имаат импликации за европскиот континент и пошироко.
Фокусот на првиот ден од состанокот беше ставен на состојбите поврзани со руската агресија врз Украина, при што беше реафирмирана силната поддршка за дипломатските напори предводени од САД за постигнување прекин на огнот и траен, долгорочен мир преку политички дијалог и почитување на меѓународното право.
Министрите разговараа и за потребата од зголемување на издвојувањата во областа на одбраната, како и зајакнување на капацитетите и способностите на НАТО за градење колективна безбедност и одбрана, со цел ефективен одговор на заедничките закани и предизвици.
Особено беше нагласен фокусот на Алијансата врз Западен Балкан, како важен елемент за обезбедување на регионалната, но и на севкупната европска безбедност и стабилност, известуваат од Министерството.
Во време на сложени геополитички услови, кои носат широки безбедносни предизвици, министерот Муцунски ја нагласи важноста од одржувањето на единството меѓу сојузниците како столб на заедничката безбедност, значаен за заштитата на заедничките вредности.
Во оваа насока, тој ја потенцира и важноста на нашиот регион како простор од стратешко значење и за НАТО и за Европската Унија, со потреба да остане високо на агендата на двете организации. Притоа, побара зголемено внимание и стратешки пристап, особено во контекст на напорите на земјите од регионот за реализација на нивните европски и евро-атлантски аспирации преку брза имплементација на интегративните процеси, соопшти Министерството надворешни работи и надворешна трговија.
Македонија
Уште една жртва од пожарот во Кочани, почина управителот на дискотеката „Пулс“

Уште една жртва од несреќата во Кочани. По неколкунеделно лекување почина Александар Карадакоски, кој бил управител на ММММ Кафе дооел, која што управувала и со дискотеката Пулс во која изби пожарот на 16 март.
Карадакоски на лекување беше испратен во Литванија каде и починал.
Тој е 60 жртва од катастрофата во Кочани.
Македонија
ДУИ: Дали „новиот општествен договор“ е антипод на Охридскиот договор и почеток на реформатирање на уставниот модел на државата?

„Како е можно лидерска средба за таканаречен „нов општествен договор“ да се одржи меѓу првопласираната и третопласираната партија на изборите? Дали критериумот за учество во овие преговори е етничката припадност, наместо демократскиот легитимитет? Дали ова значи дека се воведува нова практика на едноетничко моделирање на државата, каде што Албанците и другите заедници се сведени на набљудувачи“, прашуваат од ДУИ.
„Дали „новиот општествен договор“ е продолжение на коалицијата на олигархијата Мицкоски–Заев? Дали оваа иницијатива претставува почеток на пост-Охридско прекројување на уставниот модел на Северна Македонија?
Зошто на средбата не беше присутен ниту еден претставник од албанската заедница – ниту од позицијата, ниту од опозицијата – ако навистина се разговара за иднината на државниот поредок?
Дали оваа средба е обид за воспоставување на нова политичка хиерархија врз основа на етничка припадност, каде што Албанците се отстранети од суштинските процеси на одлучување?
Дали во оваа рамка се разгледува и меѓусебна заштита од политичка и правна одговорност – еден вид неформален пакт за неказнивост – за трагедијата во Кочани, наспроти трагедијата со модуларната болница во Тетово?
И конечно – дали албанските партии избрани од премиерот биле воопшто консултирани за оваа средба?
Дали ја дале нивната согласност или биле целосно заобиколени? Дали можеме да слушнеме барем еден јасен став од нив за ваквото едноетничко кроење на иднината на државата?
Дали се информирани дека македонскиот дел од Владата веќе договорил формирање на работни групи со етничката македонска опозиција за дефинирање на овој „нов договор“?
Или нивната улога е сведена на неми набљудувачи што ѕиркаат од ходниците, додека се скројува политичката реалност во која и тие, и нивните гласачи, не се прашуваат за ништо“, се додава во соопштението на ДУИ.