Македонија
Тренчевска: Ги означуваме последните чекори на кампањата „Гласна и храбра“

Министерката за труд и социјална политика, Јованка Тренчевска, го почна денот со посета на „Преплет“, женско претприемаштво, продавница за подароци, формирано од успешни жени и веќе функционира 10 години. Министерката беше пречекана од страна на сопственичките на „Преплет“, графичките дизајнерки Викторија Лаговска-Хајредин и Магдалена Аврамовска, архитектката Емилија Ланговска и нивните две вработени – Фросина Крстевска и Сандра Костовска. Во рамките на кампањата „Гласна и храбра“, Министерството за труд и социјална политика остави трага на местата каде што се одржаа настаните за економско зајакнување и ментално здравје со семиња од цвеќе. „Преплет“ ги дизајнира производите што беа дел од кампањата, а имаа цел да ја пренесат пораката на „Гласна и храбра“.
За време на посетата на продажното место и работилницата на „Преплет“ беше разговарано за инспирацијата за работа, историјата на нивниот бизнис и нивната мрежа на купувачи. Овој бизнис претставува и пример за инклузија. Во изминатите години поддржани од мерките на Фондот за иновации и технолошки развој имаат дизајнирано маици испишани на Брајово писмо. Сопственичките ја известија министерката за уште една нивна иновација – подароматот, кој може да им овозможи на купувачите да купат од нивните производи во кое било време од денот.
„Вие сте пример за тоа дека со ентузијазам, упорност и решителност може да се успее! Токму како пораката на семето, порака за успех“, посочи Тренчевска за време на посетата.
Министерката ја поздрави нивната иницијатива и се заблагодари за нивниот труд што ја одбележа кампањата „Гласна и храбра“, со што се остави трага и се даде вистинската нота и насока.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Тетово повика на јавна дебата за промена на имињата на улиците

Општина Тетово в петок, со почеток во 15:00 часот, организира јавна дебата за предлози за имиња на улиците.
„Ги повикуваме сите граѓани, здруженија, невладини организации и граѓанскиот сектор да учествуваат на оваа јавна дебата за именување на улиците“, велат од општината преку допис.
Додаваат дека секој предлог од граѓаните е важен и помага овој процес да биде инклузивен и успешен за граѓаните и градот Тетово.
Македонија
Тошковски: Припадниците на МВР денеска примија плата зголемена за 10 отсто

Припадниците на МВР денеска примија плата зголемена за 10 отсто, информира министерот за внатрешни работи, Панче Тошковски.
„Изминативе години сосема оправдано имаше критики дека платите во МВР се ниски, а очекувањата и одговорностите големи. Често се укажуваше на разлики во однос на некои сродни служби, а чувството на потценетост беше реално и оправдано. Ова зголемување не е доволно, но е еден од многуте чекори што ќе следат во насока на враќање на достоинството и угледот на полицаецот. Целта е јасна – да изградиме модерна, професионална и силна полиција која ќе биде вистински сервис на граѓаните. Продолжуваме понатаму кон обезбедување на подобри услови, поголема поддршка и вистинско вреднување на трудот што секојдневно се вложува“, напиша Тошковски во објавата на социјалните мрежи.
Македонија
Оставката на Папазов помина на владина седница

Владата ја прифати оставката на градоначалникот на Кочани, Љупчо Папазов.
Советот на општината ќе треба да назначи в.д. градоначалник на Кочани, откога одлуката ќе биде објавена во „Службен весник“.
Инаку, Папазов ја поднесе оставката по пожарот во дискотеката „Пулс“ каде животот го загубија 59 лица, а околу 200 беа повредени и префрлени низ клиниките во земјава и странство.
Папазов по оставката беше приведен и одреден му беше притвор. Во куќен притвор се и неговите двајца претходници од градоначалничката фотелја.
Според истрагата, тројцата осомничени градоначалници на Кочани во периодот од 2012 година до 16 март кога се запали дискотеката, не ги извршиле своите правни обврски во согласност со Законот за заштитата и спасувањето, со што овозможиле кабарето „Пулс“ незаконито да продолжи со вршење угостителска дејност. За целиот овој период, како што беше истакнато, Општината примала уплати по основ на надоместок за угостителски објект.