Daily news
Турски билборди ја политизираат Македонија
Скопје денес осамна преплавено од билборди со политичка содржина која е туѓа на нашата внатрешна ситуација. Од содржината станува очигледно дека се работи за турска политичка пропаганда во врска со минатогодишниот обид за државен удар со кој Македонија нема ништо, а на неколку начини се обидоа да ја вклучат турската влада и претседателот Таип Реџеп Ердоган. На билбордите стои „Никогаш нема да го заборавиме 15 јули“, т.е. денот кога се случи неуспешниот обид за државен удар со дополнителна порака “Секогаш ќе застанеме зад демократски избраната влада на Турција“.
Ова е првпат политички настан во странска држава на ваков начин да се прелева кај нас, со цел да се анимира не само турската заедница за поддршка на Ердоган, туку и да се влијае на начинот на кој Македонците ја гледаат политичката ситуација во таа земја. На билбордите како нарачувач стои Мусиад, турска бизнис и индустриска асоцијација која има преставници во 63 земји, а фигурира како независна.
Претходно, истата асоцијација организираше специјална програма поради истиот повод , т.е. првата годишнина од државниот удар кој му послужи на турскиот претседател да разреши, да отпушти од работа и да притвори илјадници судии, универзитетски професори, новинари, воени лица и главно опозиционери. Деновиве опозицијата како одговор на авторитарноста на власта организираше мировен марш, пешачејќи од Анкара до Истанбул, што беше силна демонстрација на незадоволство во земјата.
На оваа специјална програма денес учествувале и Аднан Ќахил, министер без ресор во Владата на Македонија, амбасадорката на Турција во Скопје, Тулин Еркал Кара, претставници на турските институции и здруженија во земјата, како и бизнисмени. Ќахил посочил дека владата избрана од страна на народот не може да се сруши со државен удар или на кој било друг начин.
„Ние ќе бидеме заедно со нашите браќа кои живеат во Турција. И сега сме заедно, и во иднина ќе биде така. Тоа е наша демократска перцепција. Оние што размислуваат за каков било државен удар, нека размислат добро затоа што ќе се соочат не само со народот кој живее во Турција, туку и со сите народи во светот што ги знаат и ги разбираат Турците и демократијата“, рекол Ќахил.
Ќахил истакнал дека посакува ова да не се повтори каде било во светот, особено не во Турција и дека македонската држава и Турците кои живеат во земјата секогаш ќе стојат зад турскиот народ. Ваква активност беше најавена и во Косово, Босна и Херцеговина и во Грција.
Пренесувањето на внатрешните политички случувања во други држави, што е манир на оваа власт во Турција, веќе испровоцира реакции изминатите месеци во Европа, а пред се во Германија која му забрани на Ердоган да држи говори и спроведува политичка кампања за Турците на нејзина територија и да забрани влегување на еден турски министер. Слична забрана упати и Франција пред референдумот за Уставот во Турција.
Турција е последна од земјите на листата на соседи кои ја злоупотребуваат нашата меѓуетничка ситуација, политичка толеранција и незавидна положба, по прославите на разни бугарски здруженија низ Македонија, српските прослави на, за нас, окупаторски поводи, српското учество во крвавиот настан во Парламентот и албанската прослава на знамето не толку одамна кај нас, од која излегоа најави за некакво албанско обединување.
Слободанка Јовановска
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.