Македонија
(Видео) Џафери: Не влијаев мојот баџанак да биде дел од антикорупциската комисија

Претседателот на Собранието, Талат Џафери, на денешната прес-конференција, по изборот на членовите на антикорупциската комисија, рече дека немал никакво влијание во однос на изборот на неговиот баџанак Нури Бајрами за член на комисијата и дека нивната релација нема да влијае врз работата на телото.
„Како вашиот колега новинар влезе во тој состав на антикорупциската комисија?, одговори Џафери со контра прашање упатено до новинарите на нивното прашање како ја коментира одлуката за избор на Бајрами во Државната комисија за борба против корупцијата.
На забелешката на новинарите дека и во минатото имало вакви случаи на баџанаци што биле критикувани во јавноста, како случајот со баџанакот на првиот човек на тајната полиција Сашо Мијалков, Џафери рече дека разликата е што сега, покрај Собранието, и други релеватни институции гласале за избор на Бајрами.
„Разликата е што сега, покрај пратениците, и претставниците на медиумите, невладините организации и народниот правобранител беа вклучени во изборот. При процесот на испитување имаше и претставници на МАНУ. Во тоа е разликата. Какво влијание имам јас во изборот? Во чинот на гласање гласав за листата, а не за поединци“, рече Џафери. Со 65 гласа „за“ и 10 „воздржани“ избрана е новата антикорупциска комисија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Муцунски по повод Денот на македонската дипломатија: „Таа е мост помеѓу народите и чувар на мирот“

По повод 29 април – Денот на македонската дипломатија, министерот за надворешни работи и надворешна трговија, Тимчо Муцунски, упати честитка преку социјалните мрежи.
Во објавата, министерот потсети дека македонската дипломатија своите почетоци ги има во Бирото за односи со странство, формирано во 1969 година, како прв институционален облик за водење на надворешната политика.
„Овој ден е посветен на дипломатите и сите вработени во Министерството за надворешни работи, чиишто посветеност, професионализам и дипломатска умешност се клучни за градење на меѓународниот углед на нашата земја, за унапредување на билатералните и мултилатералните односи и за одржување на врските со македонската дијаспора“, напиша министерот Муцунски.
Тој додаде дека Денот на македонската дипломатија нè потсетува на важноста на дипломатската мисија како мост меѓу народите, чувар на мирот и промотор на соработката, упатувајќи честитка до сите актуелни и поранешни дипломати и вработени во Министерството за нивниот придонес.
Македонија
Стојаноски: Интерпелацијата за Тошковски e доказ за глодарство и злоба

Интерпелацијата e доказ за глодарство, злоба и бескруполозност на политички актери кои што немаат никаков друг интерес, освен политичко профитерство, изјави пратеникот од редовите на владејачката ВМРО-ДПМНЕ, Бојан Стојаноски на денешната собраниска седница каде што се расправаше за интерпелацијата за министерот Панче Тошковски.
„Имаме можност денес да дебатираме по поднесената интерпелација за министерот Панче Тошковски. И мислам дека неколку работи денес треба да бидат кажани, директно кажани, јасно со цел да растуриме некои премиси кои што се создаваат во јавноста, како и која е целта на ова интерпелација, затоа што сметам дека многу неискреност има и многу зборови се споменаа во досегашните дискусии како морал, како одговорност, а за несреќа на оваа држава барем во претходните десет години можеме да направиме еден пример како се поставува по ваква трагедија, а како се постапувало, или не се постапувало во претходниот период, но и да видиме една одвратна малодушност и политички рефлектирано глодарство кое се граничи со мизерни и нечовечки особини“, рече Стојаноски на денешната собраниска седница каде што се расправаше за интерпелацијата за министерот Панче Тошковски.
Стојаноски е категоричен дека за поднесената интерпелација ќе биде потппишан писмен доказ за глодарство и злоба на политички актери кои што немаат никаков друг интерес освен политички да профитираат.
Македонија
Таравари на локалните оди со посебни советнички листи: Нема враќање назад

Министерот за здравство и лидер на едното крило од Алијансата за Албанците, Арбен Таравари, не отстапува од одлуката на локалните избори да одат со сопствени советнички листи иако на власт дојдоа како дел од коалицијата „Вреди“, која се подготвува да прерасне во една политичка партија.
„Засега имаме сигурна одлука дека одиме со посебни советнички листи и тоа е одлука на партијата и од тоа нема враќање назад. За сè друго сме подготвени и отворени да разговараме со сите во однос на локалните избори“, рече Таравари денес при посетата на вакциналниот пункт во Поликлиниката „Букурешт“.
И денес тој уверуваше дека владината коалиција е стабилна и има редовна комуникација со премиерот со кого очекува средба откога ќе се врати од службено патување.
Неговите досегашни коалициски партнери од „Вреди“, пак, сметаат дека Таравари сам се исклучил од коалицијата и треба да си замине и од Владата оти не може и да биде дел од Владата и да преговара со ДУИ.